قصيدة شارعنا - الشاعر مروان سالم

مروان سالم

الحوار المتمدن-العدد: 8347 - 2025 / 5 / 19 - 23:37
المحور: الادب والفن
    

شارعنا بيشغى تملى بيغلى
عيل بالع قرص وطالع
على الناصية واقف بالكلسون
شيخ الجامع عامل مش سامع
وطلع بيدن فى الميكرفون

ماشية زكية ومتحنية
مسددة اقساط الجمعية
دكانة ع الناصية عاملة اوكازيون
على صندل وشرابات كولون
جوزها لسة يدوب مسجون
علشان توصيلة التليفون
واقساط العربية

وشوربجى صاحب الورشة
فتحله دكانة كرشة
ماسك فى خرقة ومنشة
ويوماتى بيخانق فى زبون

والاسطى فخرى العجلاتى
مشارك الحاج زناتى
على شيشة عجمى
وتلفزيون وشوال افيون
نصير وبكر جيران انما
بجوز حريم يجيبوا العما
فى الشرشحة يطلعوا للسما
اخر النهار اهل وخلان
قطعو النسوان

والحاج شلبى بتاع الدش
جاب الاوربى عشان بينش
حلف عليه صاحب الدكان
ما يعتبه ولا حتى يخش
الا اما ياخد وصلة بلاش
وكمان عربون

والسوق بيشغى وعيال بتبكى
توكتوك بيجرى يلحق زبون
يخبط فى حيط حلمى المأذون
تخرج جارتهم نشوى بشيفون
تلطم على البيت المسكون
يخرجله حلمى فى ايديه جادون
والناس تخش مش عاوزة وش
علشان وجب ساعة العصرية
وشيخ الجامع عامل مش سامع
عمال بيدن فى الميكرفون

#مروان_سالم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل