هل الوطن ملك للحاكم؟

مجدى سامى زكى

الحوار المتمدن-العدد: 7200 - 2022 / 3 / 24 - 18:12
المحور: اليسار , الديمقراطية والعلمانية في مصر والسودان
    

مقال هام جدا من إحدى صفحات المفكره الكبيرة د.إلهام بركات
Elham Barakat
أتمنى أن يطلع عليه المصريون حتى يعارفوا من يحكم بلادهم.
شكرا مقدما على تكرمكم بالسماح بنشره.
مع خالص التحية والمودة والتقدير.
مجدى سامى زكى



شعب عجيب غباؤه منقطع النظير ومع ذلك يتبجح بانه من اذكى شعوب الارض!.. والله لم ار حمارا اكثر منه.. ودون نرفزه او استفزاز اسالك:

هل الوطن ملك للحاكم؟!

اى حاكم ايا كان ملته ودينه..؟ هل يملك الحاكم الوطن...

ها..!!

بسرعه هاتقولي لاء الوطن ملك للشعب وها تبدا تغني وتهتف بلادي بلادي وتحيا تحيا وتصدعني بينما الحقيقه تقول عنك انت ان الحاكم يملكك ويملك الشعب ويملك الارض ويملك الوطن واصبر جايالك!!!

وده عندك عقيده ولا تندهش وها ارجعك بس عام ٥٢ حينما قرر الزعيم ناصر اهداء العقبه للاردن وراح مطلع ورقه وسخه وقرار وختمها للشقيقه للاردن من اجل ان يكون لها منفذا على البحر!!!!!!

طب حضرتك يا شعب قلت ايه.. هل اعترضت هل قمت من نومك وزلزلت من يهدي ارضك وبلدك للغير.. هل استاذنك هل عبرررررك حتى وخد رايك واستشارك؟!

طبعا لاء

وبالجزمه نفذ قراره!

ولم يخرج وطني واااااحد فيكي يا مصر يقوله انت بتهبب ايه يا زعيم!!!

بلاش العقبه!

ام الرشراش(ايلات) ناصر رفض اقتراح كينيدي اللى اشار عليه يعمل كوبري عليها ليربط الشرق بالغرب!! اخر عبط وهبل من اميركا اللى للان راكبه على فكره!! ورفض ناصر واصر السادات الزعيم ايضا نضع ايلات مع ملف طابا في التحكيم الدولي وحلف براس جده ابداااااا ما نسيب ذرة رمل من ام الرشراش!!

كويس.. وخد طابا وانسى ايلات وللابد واللى ها يتكلم يعتقله فالبلد ملك له وهو حر ومش عاوز دوشه!!

بقولك ليه الوقتي الكلام ده؟

علشان اقولك انت من عام ٥٢ ملك خاص انت والارض والدوله والحاكم حر فيك بكل شكل يولع فيك يقرفك ينعم عليك بجنيه او او هو حر وفي نفس الوقت التربيه الوطنيه(الاعلام) بيقولك الوطن ملك للشعب وكيان غير قابل للبيع او التنازل عنه او تيخ طاخ تيخ وهاتك يا كلام وهتافات واغاني وهبل...!

طب لاحظ كده يا اذكى شعوب الارض:

ناصر استلمها من سلالة محمد علي باشا مصر والسودان ومشرفه على منابع النيل في الحبشه!!

الحاكم تنازل عن السوداااااااان ومعها منابع النيل!!!!

هل خد رايك.. هل انت كشعب استاذنك الزعيم وقالك والله مش شايف اي لازمه للسودان دى ولا منابع النيل!!!!

طيب جه السادات خد مصر كلها وسلمها لاميركا بلا روسيا بلا شيوعيين ومنح نفسه الرىيس المؤمن لدوله اسلاميه واتفضلي يا اميركا مارسي قذارتك وسياستك ودوسي بجزمتك بلا هويه بلا اقتصاد بلا غيره المهم الدوله الاسلاميه المؤمنه وملناش دخل بالسودان ولا اثيوبيا ونفتحها بحري مع المملكه السعوديه نستلم كناستها عندنا ونسجن كل مفكر في بلادنا!والكرسي حلو!!

هل الحاكم ابو زبيبه خد رايك.. عبرررررك اصلا؟ ليه.. لانك شرعا رعية لا تمثل عند الحاكم العربي المسلم اى شى او اى وزن ويدوسك!

جه مبااارك هل استرد الممتلكات المصريه من تركيا.. طب من اليونان.. طب من اثيوبيا.. طب من السودان؟؟!

لاء طبعا وعاش زى سنجة الميزان لا يهش ولا ينش وخلى كل متر فيكي يابلد افسد من التاني وضرب به المثل في الفساد!

جه المبروك العبيط اللى على باب الله بئى مش مصدق انه على كرسي مصر وقضاها سنه خايف مذعور ليقبضوا عليه ويدخلوه السجن!

جه الحاج قلبها مراجيح واصبح الحاكم لكل شئ فيكي يا بلد وقالك اهو كده وهاتعيشوا كده وولا لقمه يا كلااااب وولا ميه كمان واطلق للمملكه وللامارات ما لم يحلموا به من ارض وزرع وميديا ووو ووووو...

هل خد رايك

هل عبررررك؟!

اومال شعب ايه انتم اصلا وهل الارض دى تخصكم وهل النيل ده يخصكم...

لاء حبيبي دا كله ملك للحاكم وانتم هش يعني هش!

دى اجابتي لسؤال للصديق م. حسب الله-القاهره وردني خاص.. وسلم لي ع خالتك الbig boss بتاعة «حقيقه ولا اشاعه» الله يرحمك يا صفوت بئى!!!!

على فكره تانط دى حبيبتي وبتحبني.

#مجدى_سامى_زكى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن