محسوبكم .... ورئيس الوزراء الاسرئيلي...

بشار خطاب

الحوار المتمدن-العدد: 1638 - 2006 / 8 / 10 - 10:24
المحور: كتابات ساخرة
    

محسوبكم: شلوم عليكم سيادة رئيس الوزراء الاسرئيلي

رئيس الوزراء :مش شلوم ولا سلام , مين معي ..

محسوبكم : سؤالك صعب يا سيادة رئيس الوزراء لو بعرف أنا مين ما كنت اتصلت عليك ,وعلى العموم أنا مواطن درجة خامسه حسب تعريفي الحزبي ببلدي, ودرجة تاسعة حسب الأبجدية العربية بتصنيف الشعوب , أما بالنسبة لمنظمات حقوق الإنسان العالمية والعربية فالله يكون بالعون . وأما تصنيفي بجمعية الرفق بالحيوانات الأليفة والمنزلية فانا وضعي كويس ممكن تقول بين الكلب والقطة يعني أحسن من الحمار بشوي . ..

رئيس الوزراء( مقاطعا): أصلان هذا هو يلي شاطرين فيه الكلام الفاضي,
أختصر وأحكي أنا مواطن عربي وأنا بفهم من حالي ..

محسوبكم : ايوة مواطن عربي من بلاد العرب أوطاني وعندي لك سؤال ممكن يحصرك بالزاوية لأنه من كافة الشعوب العربية. ومن خمسين سنة ونحن بدنا نعرف الجواب.

رئيس الوزراء: أسال بسرعة ما عنا وقت, القيادة عنا عم تحضر للمجازر الجديدة القادمة بغزة والضفة ولبنان وقريبا جدا بسوريا..

محسوبكم : طيب سيادة رئيس الوزراء نحن هون الشعوب العربية من المحيط إلى الخليج العربي أو الفارسي مثل ما بدك سميه نحن بأمرك .عنا سؤال مهم للغاية ,
بالنسبة لبرقيات التنديد والشجب والاستنكار يلي عم نرسلها من خمسين سنة عم تصل لسيادتكم ولا مثل عنا الحاشية والحرس القديم والحرس الجديد عم تخفي عنكم تنديد وشجب واستنكار الشعوب العربية مثل عنا ما بيخفوا الأمور الخاصة بالشعوب ..أنا بعرف انه سؤال محرج بس نحن بحاجة للجواب الشافي من سيادتكم ..؟؟

رئيس الوزراء( متنهدا) : شوف يا مواطن يا عربي نحن بالبداية كنا البرقيات عم نستخدمها بأشياء مفيدة نوعا ما إلى أن وصلنا إلى أفضل شئ ممكن نعمله تقديرا وأحترامنا للشعوب العربية. وصارنا نستخدمه ورق للمرحاض و هو من أجود أنواع الورق المباع عنا هون وأغلى سعر وبإمكانك النزول إلى أقرب بقالة بتل أبيب أو حيفا والسؤال على أغلى ورق مرحاض فرح تجد الجواب هو برقيات التنديد والاستنكار والشجب العربية أما السعر الثاني مباشرة بعده راح يكون برقيات التهديد والوعيد العربي والسعر الثالث قرارات مجلس الأمن وهيك تنزل الأسعار وصولنا إلى تقارير منظمات حقوق الإنسان العربية .. بس عنا طلب عندكم يا ريت تساعدونا فيه ..

محسوبكم( متحمسا ): سيادتك طلباتك أوامر و على الرأس من فوق ..

رئيس الوزراء : يا ريت تسألوا القيادة عنكم بأنه البرقيات بس بداية الصفحة من فوق يكتبوا تنديد شجب استنكار تهديد ..الخ وباقي الصفحة فاضية فهمنا هذا الحكي الفاضي, وبيكون أريح أستخدمه وهو فاضي حرصا منا على سلامة ..... المواطن هون ..

محسوبك (فرحان بعد تلقيه طلب من سيادته وبتلهف ) : ونحن هون يهمنا سلامة ..
....مواطنكم. نحن سيادتك راح نعرض الموضوع على القادة العرب في الاجتماع العادي للقمة العربية السنة القادمة, وان شاء الله يكون القرار عند حسن ظنك فينا وفيهم ..

رئيس الوزراء .. يا ريت تعملوه عليه اجتماع طارئ بيكون أحسن وأسرع ..

محسوبكم : بس سيادتك وأنت خير العارفين و مثل ما أنت شايف لبنان صار أكثر من نص شعبه مهجر ولأجئ, ومدمره البنية التحتية تماما , ومع هيك ما استطعنا نجمع 15 صوت على قمة عربية طارئة , بدها ثلثين الأعضاء فيمكن هيك موضوع لا نستطيع جمع عليه الأغلبية الساحقة ..

رئيس الوزراء : أنت ما عليك أطلبوا عقد قمة عربية طارئة بس, وأنا علي انه زودك بموافقة 25 دولة عربية على الأقل ويكون حققنا أكتر من الثلثين المطلوبة ..

محسوبكم: سيادتك نحن بس 22 دولة إلى الآن ..

رئيس الوزراء ( مستغربا) : ليش لسه ما وصلكم التقسيم الجديد للشرق الأوسط ......

#بشار_خطاب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات