2020 لوين رايحين ؟ الحلقة الثانية

روزا سيناترا

الحوار المتمدن-العدد: 6704 - 2020 / 10 / 15 - 23:08
المحور: اليسار , التحرر , والقوى الانسانية في العالم
    

الحلقة الثانية
من العربية الفصحى إلى العربية المحكية نحو البساطة

من بداية 2020 وأنا عم فكر بسؤال لهالجواب وتحديداً ببداية الأزمة الرأسمالية الحكومية العالمية الصحية يلي سموها كورونا..
تاجية أو مدورة أو مربعة مش هيدا هو المهم ،المهم لوين رايحين، ودايما وكل ما كنت بمر بمرحلة شخصية جديدة بحياتي كنت اسأل حالي هيدا السؤال لحتى اتقدم وأبني شي جديد وأمحى من راسي كل الفترات الماضية يلي عشتها خاصة المؤلمة منها وعندي قدرة عجيبة على النسيان واختراع الزهايمر انتقائي بذاكرتي، بتذكر شو بدي بس وباقي الشغلات الصعبة ببعتها على سلة المحذوفات تماما زي لما بتعملوا بمجلداتكن على اللابتوب لأنه بالنسبة لي كل يوم جديد هو بمثابة فرصة جديدة للحب والفرح والحياة مهما كانت الحياة صعبة، بس بشي مرحلة اضطريت ارجع بذاكرتي للماضي اكتر واعمل استرجاع لملفات الذكريات لحتى أفهم ويمكن لحتى أشفى من جروحي الشخصية وبعدها بعمل "ديليت" للأبد، وطبعا هيدا المقال لا رح يكون شخصي ولا هو خطاب مطول عن التفاؤل وأخواته بس مقدمة صغيرة لحتى أقدر وصللكن الفكرة.

هيدا المقال رح يخاطب كل عقل بشري بفكر (طبعا بصفتكن شركائي الحلوين على هالكوكب)، لذلك عقول الكسالى يلي ما حابة تشتغل لو سمحتوا صفوها "بباركينج" بعيد شوي .
طيب وين كنا ؟
عند العقل البشري العظيم وليش عم نحكي عن العقل؟
لأنه العقل والمنطق أساس الفكر والفكر بداية المعرفة حتى لو مرات كان الانسان يكتشف الأشياء بالصدفة زي لما اكتشف الزراعة بالصدفة.
بالصدفة ؟
أي نعم بالصدفة..كان جوعان وأكل من ثمار الأشجار،البذور وقعت عالأرض وبلشت الاشجار تنمو فاكتشف الانسان الزراعة..
راجعة معكن للزراعة بس خلونا نرجع شوي اكتر لورا لحتى نفهم لوين رايحين..

مرقت البشرية بعدة مراحل لحتى تتطور فمثلا كان الانسان القديم يعتمد في حياته ، كل حياته على الطبيعة،عايش ولا عباله بيصطاد الحيوانات وبيجمع الثمار وبينتقل من كهف للتاني لحتى يشوف وين وكيف ممكن تتوفرله فرصة افضل للاختباء والحياة والصيد.
(جماعتنا الخضريين لا تعصبوا..ايه الانسان البدائي القديم كان كمان ياكل لحمة وكان بعده مش واصل للمرحلة يلي اكتشف فيها كيف يزرع ليطعمي حاله..روقوا جاييتكن بالحكي).

لحتى يقدر الإنسان يتأقلم مع حياته في الطبيعة كان عايش صراع البقاء مع الكائنات الأخرى فطوّر أدواته وبلش يستعمل الحجارة وهيك كمان اكتشف كيف يعمل مطبخه !
مطبخه ؟؟ نعم مطبخه..يعني مطبخنا يلي اليوم صار اله هيبة وطنة ورنة غير شكل..شي للكعك وشي للبانكيك والخ (على فكرة عم بكتب هالمقال وأنا عم أنطر ليصير البانكيك يلي عم احضره..وطبعا صحي بدون سكر جربوه ..ببقى اتركلكن الوصفة).

بنرجع لموضوعنا ..ايه المطبخ بلش عند الانسان الحجري من الحجارة فكان يختار حجارته بعناية لحتى يقدر يصقلها ويستعمل جزء منها للمطبخ وتقطيع اللحوم والجزء الثاني لمواجهة المخاطر .
شوي شوي تطور الانسان واكتشف انه بقدر يصنع من المعادن أدوات تانية متطورة اكتر ليقدر يكمل مسيرة حياته، من ضمنها الحديد والنحاس مثلا .

بعدها تحديدا بلش العصر الزراعي على كوكبنا العظيم
أي نعم كان الانسان عايش لوحده ولسة ما اكتشف حياة القبائل وتكوين فرق وجماعات وهوني كانت وحدة من مراحل انتقال البشرية المهمة جدا فيها اكتشف الانسان الزراعة وبلش يزرع جوار الأنهار والمجمعات المائية ليستفيد من نعمة المي العجيبة وخلال هالفترة تغيرت شغلات كتيرة من ضمنها أنه الإنسان بلش يتطور عنده مفهوم الحياة كمجموعة وبطل يعيش بمفرده وتعرف على أهمية المي كوسيلة انتاج أولية للطاقة والاستهلاك والري وبلش يتشكل على هالكوكب شي اسمه قرى وتحديدا قرى زراعية وشوي شوي صار الانسان يفهم انه بقدر يعتمد كمان على الحيوانات مش بس ياكلها ويستفيد من لحمها او جلودها صار كمان يستخدمها في الحراثة ومساعدته في الارض.
هاها وشو صار هوني يا حزركن ؟
تبلورت عنا (مش عنا نحنا..عند هداك الانسان القديم الأمور ابو عيون جريئة)المهم تبلورت الفكرة الأولى لشي اسمه انتاج وبهالمرحلة تحديدا لما الانسان صار يزرع وتتنوع زراعاته لأنه طبعا اكتشف شو انواع البذور والحبوب ولما بلش يصير هالتنوع ويزيد الانتاج بلش نظام المقايضة يعني يتبادلوا بين بعض،يلي عنده عدس يبدل مع اللي زارع حمص وهكذا..
(ركزوا معي بقصة الانتاج والمقايضة لأنه رح نرجعلها لنفهم لوين رايحين ).
طيب خلصنا لليوم ؟
طبعا لا
فكركن وقفت عالزراعة ؟ مهو قاعد بهالارض شغلته يكتشف ويتطور فكركن قاعد عبد للشاشة والتيك توك والسناب تشاب والسناب مات ؟ طبعا لا !

زرعنا وأكلنا وانبسطنا وشبعنا وكله "ألسطة ياباشا" هلأ بدنا نبلش نتفنن ..بدنا نرسم وبدنا نكتب وبدنا نهيص ويمكن بلشت عند الانسان فكرة الخلود او الذكرى او ترك الأثر..ما بعرف شو اجا عباله بس المهم صارت عنده حاجة ليكتب ويرسم ويتفنن ويتواصل (وسائل التواصل متذكرين)؟

وطبعا بهالمرحلة لما بلش الانسان يتعرف على قدراته ويتوسع اكتر بمساحاته السكانية والزراعية بلشت حياة المدن وبدأت الانظمة يلي انولدت كحاجة لتنظيم حياة الناس وبهالمرحلة تحديدا انتقلت حياة الانسان كمان نقلة نوعية لما اكتشف ابونا الإنسان المفكر الأمور انه بقدر يولد طاقة من الطبيعة وتحديدا من انجلترا لما بلشت الثورة الصناعية بالآلة البخارية وبعدها بالآلات الأخرى لأنه وضع الناس في انجلترا وقتها كان من أنجح الاقتصادات، كان الناس فيها يزرعوا ويعيشوا ويضل معن شوية فلوس عجنب ليطوروا آلات ومشاريع صناعية وبعدها توسعت الثورة لكل أنحاء العالم بعد ما تطورت بداية بأوروبا، وهالرصيد المالي والتقدمي في انجلترا جعلها قادرة على تكوين أنواع مختلفة من المؤسسات المالية والبنوك.
البنوك ؟
كيف بلشت البنوك ؟
رح نحكي عن هالموضوع بعدين.

صح صار في مشكلة عند مجموعات كبيرة من البشر لأنه دخلت الآلة مكان الأيدي العاملة البشرية وصار في استغلال رهيب للعمال وما كان عندن نظام تأمين صحي ومن هوني كمان بلشت ثورات كبيرة لتحقيق العدالة والمساواة وظهر النظام الشيوعي خاصة بعد كتابات كارل ماكس وفريدريك إنجلز ولكن ما فينا ننكر انها كانت نهضة بتاريخنا الإنساني وقدرنا من خلالها نتطور بحياتنا أكثر لأنه اكتشفنا اهمية الفحم الحجري والبخار والكهرباء..

طب شو علاقة هيدا كله بلوين رايحين ؟

تذكروا حكينا عن الزراعة كوسيلة حياة ونظام المقايضة ووسائل التواصل ووسائل توليد الطاقة هيدا له الدور الأكبر لوين نحنا موجودين اليوم ولوين رايحين .

بكفيكن لليوم..فكروا شوي !
راجعتكن لنكمل السيرة بمقال جديد عن النقلة الجديدة يلي بلشت والأغلبية يمكن ما استوعبوا انه بلشنا.

#روزا_سيناترا (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل