احمد جميل مرتض
الحوار المتمدن-العدد: 6436 - 2019 / 12 / 13 - 01:35
المحور:
الفلسفة ,علم النفس , وعلم الاجتماع
من نسمع كلمة فلسفة مباشرة ذهنا راح يبحث في اللاوعي عن دلالة مفهومه لهاي الكلمة بس للاسف في اغلب الاحيان كلشي ما راح يلكه عنها غير جملة مشهورة سامعها منا او مناك وهي :اهوو راح يتفلسف علينا؟!
كانو الفلسفة شيء غامض ومعقد ومابيه فايده والي يحجون بيها هم ناس كاّبة ويقبضون الكلب!
وبالواقع احنا معذورين من هذا الجانب لان بحكم التربية الي اتربينا عليها اضافة لانظمة التعليم الي ما كدرت توصل صورة مشرفة للفلسفة وعوامل اخرى كلدين والطبقة المثقفة والدولة والحالة المادية ..الخ
الفلسفة كلمة يونانية تعني (محب الحكمة), ومن نكول عن شخص حكيم يعني شخص عنده القدرة يخلي كلشي بمكانه الصحيح وبالوقت الصحيح واكو مجتمعات لحد الان يسمون الطبيب ب(الحكيم) مثل شعب لبنان والي رايح ام ملتقي باحد اهناك راح يفهم شنو اقصد ,وبصراحة ما استغرب من هاي التسمية خصوصا الي يدري انو اهواي امراض ما تحتاج ادوية بقدر ما تحتاج حكمة في التعامل مع الحياة عموما..
ان تكون متفلسفا لا يعني بالضرورة ان تكون فيلسوف بحجم روسو او كانط او ماركس ,فهي مفهوم لا يفرق كثيرا عن غيره من المفاهيم له عدة مستويات يبدا اولها بالاسئلة البسيطة الي يطرحها الطفل مثل "بابا,شنو هاي","بابا,ليش هاي" وغيرها الي بعضها تكون مزعجة كلش بالنسبة النا ونعتبرها سخيفة بينما بالنسبة اله فتعتبر قيمة ومجرد ان تقول له ان الدجاجة اسمها دجاجة يعتبر مصدر فخر اله ,على اعتبار انه اكتشف شيء لم يكن يعلمه,فمن هذا الشكل تبدا الفلسفة ولا تنتهي باكبر العقول الفلسفية فوجود الفلسفة يعني حضارة وتاريخ واكتشافات يعني الحياة بمجملها...كل الناس يتفلسفون ولكن استمرار التفلسف جهد استثنائي يحتاج بيئة حاضنة ما تربط العقل بقوالب ثابته تخليه يفقد هذه الصفة المميزة.
اتخيل العالم كجهاز والفلسفة هي الطريقة الي تكتشف بيها هذا الجهاز فكلما اتعمقت اكثر كلما فهمت اكثر وكلما فهمت كلما كدرت تستعمل الجهاز احسن وكلما استعملت احسن كلما كدرت تستفاد منه اكثر وممكن تستمتع وتضر بيه اكثر؟
واهنا يجي دور العقل بالفلسفة الي هو حجر الاساس بيها, ودور العقل اهنا هو اداة الفلسفة لاكتشاف هذا العالم المجهول العقل بيه ميزة انو يرفض اي شيء بدون سبب هو متطور بهاي الطريقة بحيث يبحث عن اسباب الاشياء واذا ما لكه ممكن حتى يخلق سبب وهمي بس حتى يرضي جوعه للاسباب ,اكيد اي واحد منا سامع لقاءات لمجرميين وقتله من تسال وتكله ليش قتلت؟, محد بيهم يكلك هيج بدون سبب, لان عقله مستحيل يقبل شيء بدون سبب فتشوفه يخلي اسباب سطحية مثلا اريد اتعشى وي الرسول !
هسة كلنا التفلسف هو طريق الحكمة وكلنا الحكمة هي وضع كلشي بمكانه وبتالي الحصول على حياة مرضية وكلنا العقل هو اساس هذه العملية زين لعد شنو المشكلة؟
المشكلة هو الضعف التدريجي بهاي الخصلة يعني الانسان كلما يكبر يبدي يتجاهل هذا الحس الطفولي الجميل لهواي اسباب ما اريد اذكرهن اهنا لان يطول الموضوع , بس باختصار التفكير يحتاج طاقة ووقت وهو اما ماعنده وقت او يتعاجز يتعلم فيلجا للتقليد, الي يكون اسهل ويحقق اله رضى نفسي بحيث يشوف نفسه يسوي مثل ما يسوي الباقيين ويكلك شوف هذا سوه وذاك سوة (وهذا نوع من انواع اعطاء مبرر للعقل عن الافعال الي حجينا عنه) ظلت علي, فمرور الزمن راح يتكون مجتمع بشكل واحد يلبسون ويفكرون وياكلون بشكل واحد وخطورة هيج مجتمع هو سهولة السيطرة عليه وقيادته وغياب التجدد والابداع بيه,فالاختلاف والتنوع والنقاشات هي الي تخلي المجتمع حي (طبعا اقصد الاختلافات العلمية مو الاختلافات السطحية),واهنا اكو ناس تشكل وتكول منو كال بالضرورة نكون فلاسفة حتى نسوي حضارة ...مثلا الصين عدها حضارة وما عدهم فلاسفة عظماء؟
فنكول اي عادي ممكن للمجتمعات ان تتعلم الادارة والصناعة والتطور وتسوي حضارة ...لكن هل يمكن لهذه المجتمعات الي فقدت او ما طورت الحس الفلسفي ان تبدع انماط جديدة بمستوى نظريات انشتاين في العلوم وكانط في الاخلاق وغيرها من جوانب الحياة!
اكيد لا,....والفكرة هي حتى تنتقل لمستوى اعلى تحتاج تفكر بصورة مختلفة, فالسير على نفس الطريق ما راح يوصلنا لغير ما وصل اله الي قبلنا.
ونفس الشيء على مستوى الافراد , فانت مو مهم شكد الاخر عنده فلوس اكثر, بكد مهم انو شكد انت تفكر احسن من ذاك الاخر
فالعقل هو الي يصنع من لا شيء شيء بينما الفلوس مجرد وسيلة حصول مو وسيلة خلق !
اتخيل الفكر هو الطريق والفلوس هي التبليط والانارة والديكور فانت بدون الفلوس تكدر تعرف الطريق وتوصل, صح ممكن تتعب بس توصل بلنهائية, بس الفلوس وحدها شكد ما صارت ما راح تبني طريق ابدا,
وابسط مثال هو لو انطيت مليون دولار لمجنون شنو تتوقع راح يسوي بيه؟!
اكيد ما عنده اي فكرة بكثرة الاشياء الي ممكن يسويها بهذا المبلغ لان فاقد القدرة العقلية اللازمة
ونفس الشيء ينطبق على الشخص الحكيم والشخص العادي فالاول عنده القابليات انو يحول ابسط الامور الى امور ذي فائدة حقيقة وممتعه في حين الاخر قد يمتلك فرص كثيرة لكن فقدان الحكمة تخسره كلشي
على مر التاريخ اختلف الناس كثيرا سواء عرقيا او دينيا او فكريا ,لكنهم اتفقوا جميعا انو قوة الفكر المتمثل بالعقل والتي تنتج العلوم هي سر القوة والتفوق والهيمنه ,هي الحد الفاصل ابينا وبين باقي المملكة الحيوانية , تنشيط هاي القدرة بالضرورة راح ينطي نظرة مختلفة للكون , وبداية هذه القوة هي السؤال فما نعرفه ان الانسان هو الكائن الوحيد الذي يسال ,اما نهاية الامر فهو معرفة وحكمة لانهائية..لكن لا تنسى ان تضع ببالك ان ما تصل اليه ليس بالضرورة هي الحقيقة المطلقة فربما لغيرك وجهة نظر مختلفة ,فابتعد عن التعصب وتعلم ثقافة الاختلاف.
#احمد_جميل_مرتض (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
