قصيدة /فى شرع مين

مصطفى راشد

الحوار المتمدن-العدد: 6392 - 2019 / 10 / 27 - 09:15
المحور: الادب والفن
    

ليتنى شمعة فى الظلام
تحرق أبواق وكتب الجهل والتخلف والٲوهام
ليتنى شمعة فى الظلام
تُضىء النفق المظلم المُخيف للفقير والٲيتام
ليتنى شمعة فى الظلام
تٌرنم تراتيل المحبة بين المسيحية والإسلام
بين كل البشر والٲديان
وأنادى ياٲخوة من ادم وحوا ارجوكم عيشوا فى سلام
ٲرجوكم كفاية كراهية وعداوة وخصام
كلنا هنموت ليه بس نبدد منا الٲيام
ليتنى شمعة فى الظلام
ترسم للحزانا والمحرومين شعاع الٲمل والٲحلام
ليتنى شمعة فى الظلام
تُضىء لكل المسجونين ظلماً والمقهورين فى كل مكان
وٲمل لكل الغلابة والمحتاجين بغض النظر عن الٲديان
ليتنى شمعة فى الظلام
تكسر وتحرق حدود التٲشيرة والبلاد والٲوطان
ليسود العدل فى الدنيا بين بنى الإنسان
لية طفل غنى والتانى فقير رغم ان الاتنين انسان
فى شرع مين
ياناس ياعالم ---- يهود مسيحية بوذية هندية اسلام
ليه الحروب --- والضحية فى النهاية انسان
فيه ايه لو عيشنا كلنا فى مودة وحب وسلام
وتشاركنا خير الدنيا -- عمر مايكون بينا محروم أو غضبان
من فضلكم بدلوا السلاح والبوارج طعام وٲغصان
وافتحوا قلوبكم لكل البشر بالحب والٲحضان
انت عمرك مهتعيش عمر فوق عمرك ياإنسان
ولا تاكل أكتر من طاقتك مهما كنت جعان
فليه الشر والمشاكل دا الكل راحل مع دورة الٲيام
وانت عارف ومتٲكد ان الخلود مش قسمتك ياإنسان
وعمرك فى فراغ الزمن لمحة بتسميها سنين وايام
من فضلكم عيشوا الحياة بلاش تعيشوا ميتين
وايديكم ومشاعركم وقلوبكم بالدم مجروحين
صالحوا كل الناس وبالأخص الأقارب والجيران والمحبين
فى شرع مين ندفا وغيرنا فى العراء بردانين
ساعات الكلمة الحلوة تدفى أكتر من كل البطاطين
وسامحوا كل الناس يرضى عنكم رب العالمين
فى شرع مين نبنى المساجد والكنايس والمعابد بالمليارات والملايين
والناس فقيرة ومحتاجة وصوتها تعب لله يامحسنين
فى شرع مين الدمار والحرب والقتل وتفجير المسالمين
فى شرع مين ياكافر تقتل وتفَجَر بٲسم رب العالمين
فى شرع مين يتجَبَر الحكام على الشعوب المقهورين
فى شرع مين ناس تموت من التخمة وناس بيموتو جعانين
فى شرع مين ناس عايشة وناس قتلها الحزن والٲنين
فى شرع مين يتنعم اطفالكم وأطفالنا مكسورين محرومين
فى شرع مين تموت احلامنا ولٲحلامكم تقول الدنيا كلها أمين
فى شرع مين يتهان الصادق وتعظموا الكدابين
فى شرع مين تكون كل العطايا والمناصب للمطبلاتية والمنافقين
فى شرع مين تقلبوا الآية على الشرفاء وتنصروا المجرمين
فى شرع مين تسرقوا حق الغلابة والمطحونين
فى شرع مين الرقاصة تبقى نجمة والعلماء مجهولين
فى شرع مين نلغى الكفاءات ونعين حسب المحسوبية والمحتالين
فى شرع مين الإزعاج حتى لوكان اذان بميكرفون ونقول أمين
فى شرع مين البلطجة فى الشوارع والشرطة مطنشين
فى شرع مين نَخَوُن الوطنى والخاينين فى الإعلام مفروضين
فى شرع مين نسجن الحرامية الصغار والكبار مسئولين
فى شرع مين عدم تطبيق القانون على الكبار والمسنودين
فى شرع مين التفرقة بين المواطنين على اساس النوع والدين
فى شرع مين تعيشوا فى قصور وبذخ والناس جعانين
فى شرع مين طبقة فى مارينا والباقى معدومين
فى شرع مين ميزان العدل والكرامة والوظيفة على حسب انا ابن مين
فى شرع مين تعيش فى تخمة وبزخ وغيرك ميتين
فى شرع مين تتعالج بره وانا فى مستشفى المحسنين
فى شرع مين ادفع ضرايب وملاينك معفيين
فى شرع مين اعيش بره وطنى مع المهجرين
فى شرع مين ياخد وظيفتى الدواعش والمفسدين
فى شرع مين تحرمونى من حقى انا الوطنى الٲمين
فى شرع مين تفتحوا الإعلام بس للمنافقين
فى شرع مين يكون فى السجن مظلومين
فى شرع مين تنظفوا بيوتكم وللشارع مهملين
فى شرع مين تهتموا بالشكل وعن الجوهر غافلين
فى شرع مين تكون البعيد بلا احساس أو دين
فى شرع مين تكونوا فى الإيمان ممثلين
فى شرع مين لحية وسبحة وجواك شر وشيطان مبين
فى شرع مين تقتل وتسرق وتنصب وتعمل امير المؤمنين
فى شرع مين تلمعوا الفاسد وتُسكِتوا وتسجنوا المفكرين
فى شرع مين تبقوا كفار وتقولوا نحن المؤمنين
فى شرع مين تهين كرامة الإنسان وانت اسفل السافلين
فى شرع مين تستقوى على جارك بزيادة عدد أهلك المغفلين
فى شرع مين يَدّعِى الأمام على اخوتنا فى الوطن ونقول أمين
فى شرع مين نشوف عيوب الناس وعن عيوبنا مغيبين
فى شرع مين نحترم الٲشرار ونهين الطيبين
فى شرع مين تنتخبوا المنافقين وتنصبوهم عنكم ممثلين
فى شرع مين تتركوا افضل عقولنا مهجرين
قولولى بس فى شرع مين
والله انتم ٲشرار وكفرة برب العالمين
امتى هتعرفوا ان الإيمان فى اسعاد المحتاجين
واسعاف المرضى والمصابين
ورفع الظلم عن المظلومين
وقول الحق عند كل جباراً عظيم
وحب الغير مهما اختلف معاك فى الدين
والبسمة والطبطبة على المهمومين
واطعام الجوعى وكسوة العريانين
وإحترام الكفاءات والعلماء والمفكرين
وتختاروا عنكم صاحب المبادئ الصالح الأمين
وتحب وتحترم أهلك وجيرانك الطيبين
وتنظفوا شوارعكم قبل الصلاة يامؤمنين
وتمنعوا الإزعاج والميكرفون وكل المهللين
ولو دعى الأمام على الناس قولوله عيب ياعدو الدين
هو ده الايمان يااللى بتدعوا انكم مؤمنين
وانتم أشرار أندال كذابين
وبالعهر والفساد والانبطاح والغل والنصب مشهورين
ليتنى شمعة لٲحرق كل الٲشرار الفاسدين
فتنتصر الإنسانية على كل مدعى الدين
وهم فى الحقيقة أشرار أنجاس كدابين
لعنة الله عليهم دنيا وأخرة فى العالمين
الشيخ د - مصطفى راشد للنقد ت وواتساب 0061452227517

#مصطفى_راشد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل