رد السيد الأراجوز على بيان السيد العجوز من ‎شمروخ الأراجوز العدد العاشر شكشة شعرية غير دورية بالفصحى وبالعاميه

سمير عبد الباقى

الحوار المتمدن-العدد: 6282 - 2019 / 7 / 6 - 10:24
المحور: الادب والفن
    

سايق عليك الوطن
رد السيد الأراجوز على بيان السيد العجوز
معالى سيادة رئيس الوزر
مؤكد سيادتك أتاك الخبر
بان ابن آدم مشى ع القمر
وصنع مراكب خشب م الشجر
----------
طلع فوق جبال غطس فى بحور
وطار فى الفضا كالطيور النسور
وأمر المكن بالإشارة يدور
وبالعلم ع الصحرا نزل مطر
----------
اكيد انت شفت وسمعت وقريت
ولفيت ورحت وصاحبت ورأيت
وإلا دى كارثة إذا كنت جيت
على اكتافنا ربعت صدفه قدر
------------
لذا اسمح لى افضفض لحضرة سيادتك
ولو فيه تعدى على غالى وقتك
انا مصرى برضه وعهده ف رقبتك
دقيقتك معايا جميل معتبر
ومش رايح اقلب فرحكو مناحة
وعشمى ح تقبل كلامة بسماحة
على قد ما فى الزمن من قباحة
وإلا راح اخرس وأصرف نظر
----------
بإخلاص وعيت للى قلته فكلامك
فخمنت دوغرى السبب فى ابتسامك
يا إما .. لا شايف وراك من أمامك
إما انت فاكرنا عالم بقر
----------
بتوصف اسس اقتصادنا المنعية
وحكمة إدارتك فى صرف الوديعة
بأسلوب فخيم للخديعة الرفيعة
يخلينى اتمنى حكم التتر
-----------
وتحلف بإن احنا آخر حلاوة
وقاعدين بفضل الرخا فى الطراوة
ما فيش حاجة إلا شوية غباوة
بتغرى لصوص الفلوس بالسفر
-----------
ثقافة قطيفة بمايوه شفتشى
كفاية وزيرها اللى ما بيترشى
واعلام لولاه الشرف كان مشى
وفاتنا فريسة لدبى وقطر
------------
وشهدت جميع الدول لاقتصادنا
وداخلين وخارجين سياحة بلدنا
جيوش من الطافة توعى ولادنا
يحبوا السلامة فتصبح عبر
--------------
وإيه يعنى حبه فساد أو بطالة
ما طولعمرنا خلق عايشين عواله
وطول عمرها فى الشوارع زبالة
عادتنا اما نشبع بنرمى بطر
------------
وساعات بننسى احنا مين كنا فين
ومن غير معونة بنشحت منين
مؤكد باقى لنا يا دوب رمش عين
وتبقى الحقيقة شبه للصور
---------------
وأكبر دليل أنه صار الرغيف
ملقح ولا الرز فوق الرصيف
على مد إيد الفقير الظريف
اللى ياكل ويشبع وتلقاه نكر
-------------
جميع اللى زيى وسمع راح مسقف
لقيتنى اللى ح اطلع حمار مش مثقف
لذا قلت لازم ضرورى واظرف
اقولها زجل تبقى وجهة نظر
--------------
سيادة كبير الوزارة ورئيسها
بلدنا ماهيش بايرة وانت عريسها
دى مصر اللى أصل الحضارة وأساسها
ومن بدرى فجر الضمير للبشر
---------------
ومش رايح احاسبك عل اللى انت قلته
لأنى يا دوبك مواطن سكرتو
ولا فارقه عندك قبلته رفضته
لأنه ما فيش فايدة فى اللى انكسر
---------------
واحنا بفضل سياساتكو انكسرنا
مرايتك ما بتشوفش باهت صورنا
سواقى همومنا بتنعى مسارنا
معاكوا فتقرنا وروحنا انقهر
--------------
فى قبضة شاويشكو المواطن قفا
سواء ان قعد والا غار واختفى
إذا شاف فى صبحه دقيقه صفا
على المغربية يلمع اكر
----------
ورم عليه ضاق عليه المقاس
وفاضل شوية يبيع اللباس
لولاه ماتش كوره يهده حماس
لكان فخه زى البالونه انفجر
-----------
ولو مرة بقيت فى جيبه فلوس
يبوس إده شكرا للحسة غموس
وإذا مراته رحمته تهده الدروس
ونام صاحى حلمه نسيره ظفر
----------
دى مش صورة بارسمها لجل انت تضحك
ما ليش فى موالد دعاية فضايحك
ولا عايز اكشف مصايب تضايحك
صحيح كنت ناوى وربك ستر
-----------
ومش رايح اقولك أمريكا وأوروبا
ولاليه عدانا بقوا ليك احبه
ولافين منابى فى سهلة وصعبة
ولا مين شفطها بهاريز هبر
-----------
انا أصلى تبت وشفيت م القراية
رضاء ربنا وستره غاية مناي
اونفسى توضح لى أغرب حكاية
هريتونا بيها أغانى وصور
-----------
فلقتونا قلتوا الحروب انتهت
وح نعيش على اللحم خالى الشغت
وكافة فلوس الحروب العبط
ح تشتى على دماغنا زى المطر
------------
وصدقتكم قلت افرح واهلس
وسامحت اللى قرقشنا لب وملبس
لقيتك راكبنى وقاعد تميس
بتقنعنى ان الهوان للعتر
-----------
وصدقت تانى مؤجل كرامتى
كفاية المعاهدة اللى رافعة لى هامتى
لقيت العدو بيك مجهز جنازتى
وشفتك بتقرا فصار السور
-----------
وفارسنى بعد السنين الطويلة
بتهرسنى تانى وتعدمنى حيلة
وتشبع تحلى بأحزاب قتيله
غاظتنى ابتسامتك ابويا شخر
-----------
ومن قبرة قال لىالكبير ياد كبير
اكيد مخه موزون واحنا الحمير
دافية تحت إيده ولا ميت وزير
أساتذه فى قراية الرمال والأتر
----------
ولازم لابد ان عاملين حسابهم
على طرد إبليس ولو كان راكبهم
دى عينهم ملانة وواخدين نصيبهم
ودارسين وعارفين حدود الخطر
----------
.معاهم إرادتنا حره متينة
وأبواب بلدنا مؤكد حصينة
دليل ان بقضوا الإجازة ف مارينا
وفى سينا زارعين فراولة وجزر
----------
فعفوا يا أكبر دماغ فى الوزارة
سؤالىعن الفهلوة والشطارة
وهل بكره يلقوا عيلاى البصارة؟
وإيها لدليل إنى لسه بشر؟
-----------
باحس إنى عجلة فى دكان جزارة
وواحد دابحنى لحساب التجارة
وقاعد بيحسبنى ربح وخسارة
وانا ضفر طفلة فى إيدها حجر!

#سمير_عبد_الباقى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل