سماح مشعل
الحوار المتمدن-العدد: 6211 - 2019 / 4 / 25 - 14:26
المحور:
الادب والفن
يا صابره وراضيه بقليلك
ياسمرا من سمار نيلك
يا شقيانه. ..يا ست الكل بامانه
ايديكي الورد... دبلانه
عنيكي الشمس... خجلانه
وكان نفسي
ابوس الكف واملس علي جبينك
واطبطب ع اللي فاضل من رمق روحك
ونتساير وتحكيلي واشيل من حلقك الحسره
عليكي ف البكا نبره ...بتوجعني
وبعمل نفسي مش حاسه
واقولك طب وايه يعني تبيعي المش ف مشنه
مفيش م المش ف الجنه ف تبتسمي
علي ادين البنات مره تروحي تزوقي الحنه
واخر الليله تتعشي وتمشي بضهرك المحني
لحد كعوبك الفضه ماتشبع شرب من طينك
انا مكسوفة من نفسي ومش لاقيه بدل لدموعي اديلك
ياريتني من ذوي القدره معايا السلطه او قادره
لكنت اديكي من عيني مايمحي عنك الكسره
وكل المر وهمومك
لكن دي اليد مبتوره وحتي لحافي مش كافي
لكن بدعي....
لكل الشقيانين زيك وبدعيلك
يفك الكرب.... ويعينك
يا راضيه وصابره وعفيه
ورب العرش يبعتلك فرح شافي
#سماح_مشعل (هاشتاغ)
كيف تدعم-ين الحوار المتمدن واليسار والعلمانية
على الانترنت؟