تقبرني... تقبشني

أماني محمد ناصر

الحوار المتمدن-العدد: 1463 - 2006 / 2 / 16 - 12:22
المحور: كتابات ساخرة
    

إليكم هذا الحوار بين (امرأة أيام زمان وزوجها):

الزوج:
- مرحبا يا مرة... شو عاملتينا عشا اليوم؟
الزوجة:
- يه يه يه... تقبر عضامي... إجيت حبيبي؟!! تقبرني شو حركتك خفيفة وما بتزعج حدا... لك حلّت البركة على أرض الديار يا روحي... طابختلك حرّه بأصابيعو ويالنجي وكبة لبنية تقبشني...
الزوج:
- يا الله يالله بلا كتر غلبة، قومي حطي الأكل قومي..
الزوجة:
- لك إي مو تكرم ابن عمي... مو تكرم... لك من هالعين هَي قبل هَي...
الزوج:
- ناموا الولاد؟

الزوجة من المطبخ:
- ناموا حبيبي ناموا على عشية، وحميتلّك الحمام يا عمري...

الزوج بعد أن يرى أصناف المائدة أمامه:
- إيييييييييييييييييييييييه... باين السهرة رح تحلى اليوم...
يمضغ اللقمة الأولى ويقول:

- ممممممممممممم طيبة هالكبة طيبة!!!
الزوجة رافعة يدييها للسماء:
- لك روح... ربي مولايي يبيضلك أيامك... ويبعد عنك ولادين الحرام يا حق..
ينهي الزوج طعامه قائلاً:
- الحمد لله...
الزوجة:
- عجبك الأكل يا عمري...
الزوج:
- إي والله... تسلم إيديكي...
الزوجة مرتبكة من الفرح:
- عجبك الأكل؟؟!... لك تطلع على قبري شو إنّك هني وبتعرف تحكي... لك تكفنّي بإيديك على هالكلام الحلو يا حق.. بكرة بدي اعملّك حمام محشي وبطاطا بالفرن إي بدك تاكل أصابيعك وراهن...
الزوج وهو ينشّف يديه بعد غسلها:
- جاهز الحمام يا مرة ؟؟
الزوجة بخجل... وبابتسامتها الحلوة:
- ولَو تقبشني... ولَو!!! وحطيطيلك صابونة غار من يللي جابتهم أمك تقبرني...



وإليكم هذا الحوار بين (امرأة اليوم وزوجها):
الزوج:
- مرحبا يا حلوة... شو عاملتينا عشا اليوم؟
الزوجة ملتفتة إليه وبيدها جريدة:
- شو إيمتى جيت؟؟ مبكّر مو على عادتك يعني... على كلٍ عملتلك مجدرة برغل وعدس... شو بدي اطبخلك يعني ومبارح أكلت لحمة بالصينية؟؟...
الزوج:
- يا الله تقبشيني، قومي حطيلنا الأكل لناكل..
الزوجة:
- ليكو الأكل عندك بالمطبخ... وين بدو يروح يعني؟؟!! كمان بدي جبلك الأكل لحد عندك؟!
الزوج باتجاهه إلى المطبخ:
- ناموا الولاد على حد علمك؟

الزوجة:
- إي شو نيّمهم هلق وبكرة عندهم عطلة؟؟؟ ...

الزوج يحدث نفسه من المطبخ:
- العمى شو هالمجدرة؟؟!!!!!...

يمضغ اللقمة الأولى ويقول:
- إي والله كأني عم آكل بحص مو برغل!!!

الزوجة :
- شو عم تبَروِت يا رجال؟؟

ينهي الزوج طعامه قائلاً:
- آ... ؟؟ مو شي حبيبتي... موشي...
الزوجة:
- عجبك الأكل؟...
الزوج بإحباط:
- إي طبعاً طبعاً... تسلم إيديكي...
الزوجة بتأفف:
- معناها كل يوم بعملك منها إذا حبيت...
الزوج وهو ينشّف يديه:
- جاهز الحمام يا ترى؟؟

الزوجة ترمي الجريدة أرضاً صارخة في وجهه:
- العمى على هالقصة... طبختِ يامرة؟... ناموا الولاد يامرة؟...جاهز الحمام يا مرة؟... إي شو أنا ما عندي شغل غيرك يا رجال ؟؟!!! خليك عند الولاد... أنا رايحة أتسوق...

#أماني_محمد_ناصر (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل