وقفة مع النفس

اوليفيا سيد

الحوار المتمدن-العدد: 5519 - 2017 / 5 / 13 - 03:15
المحور: مواضيع وابحاث سياسية
    

وقفة مع النفس ونحاول نفكر بشكل موضوعى بخصوص تصريح الشيخ سالم عبد الجليل الى كان حديث الساعة فى وسائل الإعلام اليومين اللى فاتوا.. الشيخ سالم عبد الجليل قال أنا مش عارف هاعتذر عن إيه! أعتذر عن آية قرآنية بتقول "ومن يبتغى غير الإسلام دينا فلن يقبل منه وهو فى الآخرة من الخاسرين"! .. أنا ممكن أعتذر إنى جرحت مشاعر الناس وإحنا إخوات وحبايب وكل حاجة بس العقيدة مافيهاش إعتذار.

بصراحة وبمنتهى الهدوء الراجل عنده حق، ما هو مش جايب الكلام ده من دماغه ولا هو اللى مألفه، ده دينه والعقيدة فعلا مافيهاش إعتذار، الرجل مؤمن بعقيدته وكل ما فى الأمر إنه جاهر بإيمانه. فلما اللوم!..

بنلومه علشان المواطنة، وعدم إثارة الفتن، وتكدير السلم العام ، والمحبة والتعايش والإخاء؟ ؟!

لا دى قصة تانية مالهاش علاقة بصحيح الدين، وخليك صريح مع نفسك وإعترف بأن هجومنا على تصريحه مش لأنه إفترى على الدين بالكذب أو أتى بفرية من عنده، لكن علشان إنسانيتنا غلبت تعاليم عقيدتنا ولأن مدنيتنا وحياتنا المدنية غلبت الفكر الدينى الإسلامى، بلاش نبقى منافقين ونقول لا يمثل الإسلام، والإسلام قال إن مافيش فرق بين الإسلام والمسيحية وإن كلها أديان سماوية تدخل صاحبها الجنة وإلا مكانش بقى فيه مشكلة لما مسلم يتحول للمسيحية أو اليهودية طالما كلها أديان صحيحة تدخل معتنقيها الجنة ولما كانت الردة ولما وجد رجال الدين.
الكلام ده ممكن يقوله واحد علمانى لكن مسلم مؤمن متدين مش ممكن.. علشان كده الراجل مستغرب فعلا وبيقول "أنا مش فاهم أعتذر عن إيه"!

المناهج دى بتدرس فى المناهج والكتب الدراسية بالأزهر واللى قاله وغيره موجود فى القرآن وكتب التراث فعلا، و آيات الكراهية والنبذ والتكفير لها مناسباتها وآيات المحبة والتقدير والإجلال زى "لتجدن أشد الناس عداوة للذين آمنوا اليهود والذين أشركوا ولتجدن أقربهم مودة للذين آمنوا الذين قالوا إنا نصارى ذلك بأن منهم قسيسين ورهبانا وأنهم لا يستكبرون"، لها مناسبتها برضه، زى ما فى المسيحية آية الإستسلام والتسامح فى المسيحية "لا تقاوموا الشر بل من لطمك على خدك الايمن فحول له الاخر" لها مناسبة ، كذلك الآية التى جائت على لسان يسوع «إن كنت قد تكلمت رديا فاشهد على الردي، وإن حسنا فلماذا تضربني؟» كان لها مناسبة أخرى.

يعنى وجود آيات تدعو للمحبة والتسامح "إدر له خدك الاخر" لا يلغى وجود آيات تدعو للنقاش والإعتراض أو الإستنكار زى"لماذا تضربنى".. كذلك وجود آيات تدعو للمودة والمحبة مع المسيحيين زى "ولتجدن أقربهم مودة للذين آمنوا الذين قالوا إنا نصارى ذلك بأن منهم قسيسين ورهبانا وأنهم لا يستكبرون" لا يلغى وجود آيات أخرى زى:
"لّقد كفر الذين قالوا أن الله المسيح إبن مريم"
"لقد كفر الذين قالوا إن الله ثالث ثلاثة وما من إله إلا إله واحد وإن لم ينتهوا عما يقولون ليمسن الذين كفروا منهم عذاب أليم"
"ومن يبتغى غير الإسلام دينا فلن يقبل منه وَهو فى الأخرة من الخاسرين"

الشيخ سالم قال إنهم من أهل النار من دماغه؟ بمزاجه؟ لا طبعا..عنْ أبى هريرة رضي الله عنه عن رسول الله صلى الله عليه وسلم أنه قال :"والذى نفس محمد بيديه لا سمع بى أحد من هذه الأمة يهودى أو نصرانى ثم يموت ولا يؤمن بالذى أرسلت به إلا كان من أصحاب النار".
.
الشيخ سالم بيلوم المسلمين اللى بيتقربوا للمسيحيين وبيقوله إنهم مؤمنين وهيتحاسبوا على ده كرأى شخصى من عنده؟ لا طبعا.."ولن ترضى عنك اليهود والنصارى حتى تتبع ملتهم قل إن هدى الله هوالهدى ولئن إتبعت أهواءهم بعد الذى جاءك من العلم ما لك من ولى ولا نصير".

إنت بتطالب بإقالة الشيخ سالم ومحاكمته لأنه صرح باللى موجود فى كتابك وإنت مش قادر تنفذه ومش حابب تسلط الضوء عليه علشان ماتخلقش نفور وعدم تعايش مش علشان هو قال حاجة مش حقيقية.
..................................................
من كام سنة كنت بدرس دبلومة خاصة وكان ليا زميلة صادف إن طريقنا واحد فكنا بنخلص المحاضرات ونمشى سوا وبما إن إسمى غربى مش متداول بين أسماء المسلمين ولأنى غير محجبة فمكانش عند زميلتى أدنى شك إنى أكون مش مسيحية، وفى يوم لقيتها بتقولى عن مجموعة زميلات "أنا مش بحب أمشى معاهم"سألتها عن السبب قالتلى "هما مش بيحبونا، مش بيحبوا المسيحيين"، قولتلها ليه بتقولى كده حد منهم ضايقك؟ قالتلى لا بس أنا عارفة كده، قولتلها مش كل المسلمين بيفكروا بالشكل ده طبعا، إنتى واضح إنك قافلة دايرة معارفك وعلاقاتك على مجتمع الكنيسة وبس لكن لو تعرفى شرائح من المسلمين التنويريين هتغيرى رأيك لأن التعميم خطأ منهجى من وجهة نظرى، قالتلى "إنتى عارفة مين اللى ممكن يكونوا بيحبونا فعلا؟ المسلمين اللى مش متدينين لكن المتدين منهم وبينفذ تعاليم القرأن عمره ما هيحبنا طبعا لأننا بالنسبة لهم كفرة".
.............................................
الجملة دى بتلخص كل الموقف.. بس كده.

#اوليفيا_سيد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات