الحب ودواير الهوي

روماني سمير
كاتب, باحث, شاعر, مبرمج
(Romany Samir)

الحوار المتمدن-العدد: 5075 - 2016 / 2 / 15 - 15:36
المحور: الفلسفة ,علم النفس , وعلم الاجتماع
    

الحياة حقيقي صعبة جدا من غير ذلك المعين النظير .. اللي بيصغي واللي بيسند واللي بيشاركنا في كل تفاصيلنا .. ومدرك جدا الاحتياج العميق واحساس النقص بغياب هذا المعين .. واللخبطة والتوهة في طريق البحث عنه .. ومدرك كمان جوع الحب اللي جوانا .. لكن حقيقي مرار الوحدة ارحم بكتير من شريك متعب ومن اختيار مش مناسب.. والحياة قصيرة والايام اشر من اننا نقضيها في انزعاج من معين حمله تقيل ..

- قصصنا كتير .. وفيها بندور علي الحب .. بنجرب ونلف وندور .. علاقات سريعة وبنهايتها بنشبط في غيرها .. وتجارب تعلم وتدوم .. وعلاقات تانية تطول وبنهايتها مبتنتهيش .. وعلاقات في الخيال مبتحصلش .. وحب من طرف واحد .. ووفاء في خفاء .. واحلام يقظة .. واحاديث في درب الاوهام .. واعذار واعتذرات وتبرير وهروب وتغيب وتسكين ..

- الاول كان بيزعجني فكرة انه حد يخرج من علاقة لعلاقة وهكذا .. ومازال الحقيقة .. لانه مش بياخد الوقت الكافي انه يستعيد جزء من نفسه اللي فقدها في الاخر .. لكن بيوزع من نفسه في حتت كتير لحد ما بيتوه .. مدرك او مش مدرك .. لكنه في كل علاقة بتنتهي بيبقي زي المبتور بيفقد حته منه .. ويا اما ياخد الوقت يتألم ويستعيد المبتور او علي الاقل اتزانه .. او من فرط الالم والخوف يهرب لعلاقة تانية .. في بحث عن اكتمال ما وهو بينقص .. بيدور علي الاستقرار وهو اصلا مش مستقر جواه ..

- وفي اختيارتنا طبيعي اننا نكون متأثرين بالشكل والجسم .. بالملامح وكل التفاصيل اللي ظاهرة للعيان .. طبيعي لانه دا تاثير هرمونات جوانا .. وغريزة بالفطرة ..غريزة اختيار الافضل للتناسل وانتاج جيل معافي للاستمرارية البقاء .. زي الحيوانات بالظبط في اختيارها وقت مواسم التزاوج .. دا طبيعي ودي الطبيعة .. لكن مش طبيعتنا .. يمكن الحيوانات ردود افعالها متوقعة ومعروف نتائجها .. لانها معندهاش الارادة والاختيار ..

- احنا طبيعتا مختلفة .. اختيارتنا الغريزية مش بتدوم ومش بتكفينا .. وقت وبنمل .. وبيظهر جوع اعمق جوانا .. واحتياجنا لشئ اعظم يلامس اروحنا ويعانقها .. حب من نوع مختلف .. وعطش مش بيرويه جنس او شكل وجسم حلو او مال .. عشان كدة بنشوف الخيانات الزوجية منتشرة جدا في الاوساط اللي بتختار علي اساس الغريزة اللي مبنية علي الشكل والهيئة او المال.. دا غير الانفصالات والخيانات اللي في اوساط المشاهير .. واللي عندهم الاتنين المال والجمال .. وحتي المستقبل والانجاز في حياتهم ..

- ويمكن دا السبب اللي بيخلينا نخرج من علاقة ويدوب نقوم شابطين في علاقة تاني .. متساقين باحتياجتنا .. لكن ديما في فرصة .. وان قلت مع العمر والتجارب .. فرصة في اننا نستوعب دا ونستخدم اعظم ما فينا .. الارادة ..

- مش بقول اننا نقضي علي الغريزة والفطرة .. دي جزء مننا .. حلو اننا نختار الجمال لكن ميكنش اساس اختيارنا .. حلو انه يكون فيه مال .. لكن مش هو الحب .. ودي معادلة الحياة الصعبة .. لذة ومال يدوم لحظات .. او حب يدوم لعمر ..

- دورت علي معني للحب ..
ملقتش اعظم او اعمق من اللي كتبه بولس الرسول

" الحب بيتأني وبيرفق وبيعطف ويحن ..
الحب مش بيحسد ولا بيغير ولا بيتفاخر او يتعالي ..
الحب مش بيقبح ولا بيشوه ولا بيلعن ..
الحب مش بيمتلك الاخر ومش بيسيطر عليه ..
الحب مش بيطلب اللي ليه او يحتد او يظن السوء ..
الحب مش بيشمت لكنه بيفرح بالخير ..
الحب مش بيدين لكنه بيرحم ..
الحب بيحتمل كل شئ .. بيصدق ويرجو ويصبر ..
الحب لا يسقط ابدا .. " #كورنثوس_12

- اذا كنت في علاقة وبقالك فترة مش مرتاح ومنهك .. ومش قادر تخرج منها .. دا لانك جعان حب .. واللي انت فيه دا مش حب .. دا مرض .. اهرب واقبل تتألم شوية او شويات لكن مش هتموت .. وقت .. طويل او قصير هيمر .. وهتستعيد نفسك

- اذا كنت بتحب من طرف واحد .. وحاولت ومنفعش .. اعرف ان اللي عندك حلو .. وان ألم المحبة هيغنيك حب .. وانه الحب الحقيقي مش اللي انت فيه .. لكن الحب الحقيقي لما انت كمان تتحب

- اوقات كتير بنحتاج نتكسر عشان نتعلم وتتفتح عقولنا وقلوبنا .. بس فيه كسرات مفيش بعدها اختيار .. وطوبي للي لسة عنده اختيار وقرار ..

- العلاقات الحقيقة والحب الحقيقي .. عمره ما بيتبني ويكبر من مجهود طرف واحد .. الحب الحقيقي هو اللي فيه حب متبادل واتنين مقررين يتعبوا ويبذلوا مجهود عشان بعض .. مافيش اعظم من حب اتنين مبذولين لاجل بعض في دايرة مكتملة من العطاء ..

- عشان كدة قبل الاختيار فهمنا لانفسنا وطبيعتها مهم جدا .. والوعي الكافي لمشاعرنا وادراكها وعلي الاقل خالص ادارة ولو جزء منها .. هيفرق جدا في حياتنا .. هيساعدنا نثق بانفسنا .. ونبطل نلف في دواير ..

- الهوي يشبع الاجساد .. لوقت .. لكنه بيأسر .. اما الحب .. فحرية ..

#روماني_سمير (هاشتاغ)       Romany_Samir#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل