نذر قمصان

كرار ناهي

الحوار المتمدن-العدد: 4966 - 2015 / 10 / 25 - 20:18
المحور: الادب والفن
    

نذر قمصان
أركض بدرب الليالي أنجوم حمره
أرسم الكوخ الفقير أعله وأحترگ بالناي سفره
وين أروح
الدنيه نار بوكت نار
ترس جلدي الحنين أسرار وأسرار
الثريه أتموت لو شح الضوه
الحزن ميت شرف!
الفرح مثل الطيور الماتحط أگبال بيبان الغرف
الماي أزرگ بالجرف
الخبز أسمر مثل وجهي
والغياب بدمي ينبض
الوحشه طفله مسودنه وبالروح تركض!
اللون يركض بالشوارع
الطير ينبض بالمسامه
النهر من يعرگ يلم روحه حمامه
الشجر بالظلمه ينام
الگمر بالظلمه ينام
من تهب العاصفه أيطيح الحمام!
تعرس بسكته الفخاتي أعله النهر
ياخذ أعيوني الحلم نجمه بعيده
يوج بأصبعي الخوف والحب والسفر
يسد مساماتي التراب وأنتظر جية مطر
وأبقه دايخ بالغياب شلون عايش؟
أبقه دايخ بالطيور
والمحطات البعيده
والجزيره المايطگ بيها النبع
أبقه دايخ بالمشاعر من تصف الروح للملگه شمع وبصف شمع
تموت روحي ويشتعل ثوبك ضوه
كل كلمه من هذا العمر خنجر جرح!
كل خطوه من هذا الدرب ذلة سبي!
الجرايد نار مشتعله الصبح
الغصن من يعطش خضار يوج ملح
أخذني بريحة أثيابك
أخذني بزحمة الدخان
تره اليخنگ ضوه الفانوس ينشگ الصبح قرءان
تره الينطر خلگ يعقوب يتيمم نذر قمصان
وحدي أنبت ع التراب
وحدي أموت
وحدي أغني
وحدي أنام
أصحه بالناس التطفيني فجر
أمشي بالشارع گبر
أزرع بخلگي شمس
أبرد بروحي مدينة واحترگ بدلة عرس!
وجهي يضحك ع الحياطين البعيده
دمي صافن ع الثلج
وكل أصابيعي رمل
كلشي بي دم من فراغ - وحشه متروسه ملامه
فوگ كل لوحة نبوه - روحي مصلوبه حمامه.

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل