بانوراما المظاهرات العراقية ضد الفساد... رؤية شاملة

أمجد القيسي

الحوار المتمدن-العدد: 4902 - 2015 / 8 / 20 - 00:48
المحور: مواضيع وابحاث سياسية
    

بانوراما المظاهرات العراقية ضد الفساد... رؤية شاملة
أمجد القيسي
من المعروف اننا في حالة من الثوران الشعبي تظاهرات تكاد تكون في معظم محافظات العراق اذا لم تكن في كلها ويتبين من خلال ردود الفعل ان الحكومة متمثلة بالبرلمان الذي هو بالاساس صوت نفس الشعب الثائر على الفساد، ومن خلال المتابعة والمشاركة كمواطن عراقي تبين لي ما يلي :
صورة مظاهراتنا ورأي عدة جهات بها
• المواطن العراقي المعدم .. هذه التظاهرات من حق المواطن ان يقوم بها للحصول على حقه في البلد المنهوب
• المواطن الموظف ذو الدرجة البسيطة .. اني اتظاهر من اجل راتبي المستقطع بسبب التقشف
• المواطن الموظف ذو درجة الادارة الاعتيادية .. ياريت يصير انقلاب ويبدلون هاي الوجوه والله دمرونا المدراء مالتنا الخير كله الهم واحنا لا حوافز لا مكافآت بس الرواتب وفوكاها يستقطعون من عدها
• المدير ذو السلطة الاعلى القريبة من مدير عام .. اني ويا التظاهرات بس لازم شوية الشعب ينطي صبر "يقصد هنا صبر الى يكمل بناء بيته" او "يحصل مكان بالايفاد الجاي"
• المدراء العامين .. هذولة شوية مزعطة لاعدهم شغل ولا عمل وكله صوج الحكومة اللي ما ملفيتهم بوظايف حتى يلتهون شوية من هالمشاكل
• مدراء عامين بدرجة خاصة .. شنو هاي يومية مظاهرات هسة البلد بيا حال وهذولة الشباب الطايش يومية سادين الشوارع شلون يعني فوكاها يكولك نريد خدمات اي خدمات وانتو ما مخلينا نشوف شغلنا هسة وكتها .. طبعا هو اشترى اراضي وبيوت وسيارات وهسة يريد يشوف شلون يثبت بالمنصب وخايف لا تطلع بلاويه هو وحزبه.
• وكلاء وزارات .. اهوووو هسة هذولة بعد شيريدون بدل ما يحمدون الله وشاكريه احنا نسعى لخدمتهم يومية مسوين مشكلة كله صوج الحزب الفلاني لو وزرائهم دايرين بالهم على شغلهم زين المواطن هم يتذمر؟ وهو على اساس مشرمها معدل الملوية هو وحزبه
• الوزير .. يمعودين هو كله صوج فلان وزير مو شكول وزارة لو يحولوني عليها جان هسة اسوي البلد جنة واسكت حلوك هذول الصعاليك .. على اساس وزارة نازل بيها اية من الجنة
• البرلمانيين كلمن حسب حزبه .. هذولة علمانيين واكيد اكيد وراهم دول دافعتهم( واحنا تحيطنا من فوك تركيا اسلامية من الشرق ايران اسلامية ومن الجنوب وجنوب الغرب الكويت والسعودية اسلامية ومن الغرب الاردن اسلامية ومن الشمال غرب سوريا وحاليا مينعرف دينها شنو المهم محسوبة عالاسلام)، هذولة مظاهرات اذا لم تحركهم داعش فهم اشبه بداعش (ليش يابة شكالولك حاركين ابهاتكم لو مغركين خواتكم لو ذابحين ولدكم) ، لو واحد يكول هاي المظاهرات على المركز واحنا كاقليم متخصنا (يابة مو انتوا وزرائكم محسوبين على نواب المركز وبعدين شعبكم ديعاني من التفرد بالسلطة والدكتاتورية على كيفك عيني سندس )
هسة نجي على صورة ماهراتنا عند المتظاهرين نفسهم
• المتظاهر الفقير اللي ما يفهم بالسياسة .. من حقنا كهرباء من حقنا خدمات من حقنا كذا وكذا وكذا ... الخ هذا يحتاج الى تثقيف بنوعية التظاهرات وكيفية سيرها.
• المتظاهر المثقف .. نريدها مدنية لا سنية ولا شيعية ولا دينية علمانية علمانية هذا يعرف ان العلمانية هي مو انتقاص للدين ولا حذفه وانما فصل الدين عن السياسة لان جربنا الدين .. اللي يستغلوه كوسيلة شلون باكو حق الشعب
• المتظاهر المتدين .. المرجعية ويانا وتشد على ايدينا حتى ناخذ حقوقنا هنا (سني او شيعي يحترم رأي المرجعية واوامر السيد السيستاني ).
• الحبربشية والاتباع والطفيلين وراكبي الامواج .. جهات مدفوع لها ومدرسين جيدا حول تغيير رياح المظاهرات لخدمة اسيادهم منهم من يطبع صبغة دينية على التظاهرات ومنهم من يحاول يخربها ومنهم من يهوس ويصيح ويزبل منطقة المظاهرات ويخرب المال العام ومنهم من يعتدي على المتظاهرين اذا حددوا
ما الذي تحتاجه المظاهرات لكي تنجح ؟
• نبدي بالمتدينين .. انتوا تشوفون المرجعية داعمتكم كمظاهرات .. اني اكولك ( لا ) المرجعية داعمة الشعب كله بس المفروض منها من تصرح تصريح توضح الصورة مثلا من تكول اقيلوا المفسدين وهي تعرف المفسدين المفروض تكول اقيلوا وزير المالية لان نهب فلوس المركز وداها للاقليم وكاعد يستقطع من الرواتب وتكول اقيلوا وزير النفط لان نهب النفط بالاتفاق مع الاقليم وخلا الشعب بازمة وقود لتشغيل الكهرباء والمفروض تكول اقيلوا وزير النقل اللي يطلق التهم على الناس اللي تداعي برواتبها والمفروض اقالة وزير الكهرباء لان قصر وتستلمهم بالاسماء واحد واحد وتطالب بتغيير القضاة من ايام 2003 لحد الان بسبب ان هواي وزراء باكت وناس تاخذ راتب بدون وجه حق وهم مو احسن من المواطن اللي جابهم.
• المواطن الفقير .. راح يكول احنا فوضنا العبادي ولازم يسوي كلشي .. عزيزي العبادي عضو بحزب والحزب كله مستفاد ولو فرضنا انه العبادي يريد يشتغل الحزب كله ميخليه وراح يلوح بفصله من الحزب ومن ينفصل تتخلى عنه الكتلة مالته بالبرلمان والبرلمانيين يريدوها من الله راح يسحبون الثقة منه وراح يتبدل بواحد معروف كلنه نعرفه حرامي وقاتل وطائفي ومجرم حرب الى اخر القائمة.
• رايي اني مختلف .. اذا اريد اسدد فوهة اللوم اسددها النا احنا كمتظاهرين لعدة اسباب منها ( احنا اتخذنا من المظاهرات نزهة – شكد حلو نجيها عالموعد ساعة 6 يوم الجمعة وكلمن يجيب اعلامه ولافتاته ونبقى نرقص ونهوس ونصيح ونشرب ماي ونفتح نت الى ان تصير ساعة الانسحاب ويلا كلمن يروح لبيته موعدنا اسبوع الجاي .. البرلمانيين راح يكولك يمعود قشمره الشغلة الجماعة يجولهم ساعتين ثلاثة ويروحون نتحملهم بس كان المفروض نبقى مواصلين التظاهر بين قوسين اعتصام لحين تنفيذ اخر مطلب يلا نفكر بالانسحاب مو ننسحب ) ولو انبهتوا كانت اول جمعة مخيفة الهم لان لاول مرة البرلمان يسجل اعلى نسبة حضور وصوتوا على ورقة الاصلاح بالاجماع كان صوتنا يخوف بوقتها اما بقية الايام فهي كانت تحصيل حاصل يدرون موعد الحضور وموعد الانسحاب . كما المفروض من القوات الامنية تفهم شغلة ان احنا طالعين مو بس النا وانما الهم ولعوائلهم ولرواتبهم وحقوقهم وحقوق اطفالهم واولادهم واذا متظاهروا ويانا فلازم يساندونا
هسة لازم احدد اهم نقاط نجاح المظاهرات
1- لازم نوحد المطاليب يعني مو كل مجموعة تطلع بقائمة شكل وهذا يتم بالتنسيق بين الناشطين الرئيسيين بالتظاهرة مع الاتفاق بين ناشطين المحافظات
2- الهدوء وعدم الصراخ والقفز وانما رفع اللافتات والترتيب على شكل هندسي منتظم وليس الانتشار بشكل عشوائي لان هذا المظهر راح يترك انطباع جميل عند القوات الامنية وكذلك حتى اذا اكو ناس جاية تضرب المتظاهرين يبينون من عدم التزامهم بالنسق
3- اذا تحدث اي حادثة عدم الهلع والصراخ حتى لا ترتبك القوات الامنية وتضطر لتشتيت المتظاهرين بالقوة وانما الثبات
4- توحيد الصف ككتلة واحدة ومن ثم تقسيمها كمجموعات مجموعة ترتاح ومجموعة تقف مكانها حتى اذا اضطر الامر الى تحويلها اعتصام (وهذا الافضل) يكون الجميع متعودين على هذي الواجبات.
5- اختيار قادة تظاهرات نزيهين لابعد الحدود وشرفاء وتفويضهم حتى اذا رادوا يستجيبون يكون اللقاء صريح وواضح وامام الساحة ولا يكون في غرف مغلقة وبعيدا عن اعين واسماع المتظاهرين
6- تحضير خطة بديلة في حال اهمال الموضوع من قبل البرلمان بالاتفاق القوات الامنية لتحويلها الى ثورة لاقتحام المنطقة الخضراء واسقاط البرلمان وتحضير خطة لمرحلة ما بعد البرلمان وبذلك وبمجرد ان يعرف اعضاء الحكومة والبرلمان ان الامر جدي سيرضخون لمطالب الشعب الذي اوصلهم الى السلطة
7- قد يعتقد البعض ان هذا نوع من التحريض وانا اقول له طبعا تحريض لان ان لم احرضك ونفسي للحصول على حقوقنا من سيعطيها لنا وها نحن تصرفنا بسلمية وسلمنا الامر الى رئيس الوزراء ولم يحصل خير.

#أمجد_القيسي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات