السور

محمد لرجب عبد الستار

الحوار المتمدن-العدد: 4595 - 2014 / 10 / 6 - 20:39
المحور: الادب والفن
    

السور

مشهد اول

الفرق اللي ما بينك
انت وهو
الفرق القاسم
الحاسم
بين بره الدايرة وجوه
انه هيتعلم احسن منك
فهيتكلم احسن منك
ياكل .. يشرب .. يلبس .. يسكن
احسن منك
في المجمل انك
مستبعد بطبيعة الحال
أما عبورك اسوار مدينتهم
فالأمر محال
سور مدينتهم المتلون
مش بيهون
قبح وجوده جوه العين
حد وفاصل بين عالمين
بين أتنين
أنت .... وهو

مشهد ثاني
خارجي

يذكر أن
المذكور
خطي برجله وعدي السور
صبراً صبراً
مش هيثور
كان مبهور
أصل العالم
غير العالم
عالم كل شوارعه نضيفة بتبرق
والنسوان ...
حلوة بتبرق
- مش لازم حلوة
بس بتبرق –
واللي بيفرق
فرق الخام
جوه طبيعي
لكن بره
كان بوليستر
مخلوط مع ريحة عرق الفقر
فمهيش فارقة
يكفي انه يعيش مستور
لو مستور
خلص شغله
وعاد لوجوده
اللي ما عاد يفرق من عدمه
بره السور

مشهد ثالث
خارجي

واقف هو
وف الخلفية يبان السور
تلمع فوقه شمس نيون
ع الأعلان اللي يجسد
بنت جميلة ..
وجملة وحيدة ..
ألحق حلمك
يتلفت هو
ويجري علي أخر جهده
علشان يلحق
يتشعبط علي أخر درجة من الأتوبيس
تخرج من قلب الكادر
عربية مقفولة أزازها
راكبها البنت
اللي بتكشف عن مفاتنها بشكل مثير
وبتجري بسرعة
فتطرطش علي هدمة فقره
مش عارف
يلعنها
أم يلعن فقره
ولآ يشبث بصورتها
اللي أتسرب منها
أحساس الرعشة لنني عنيه

مشهد رابع
مشهـــــــــــــــــــد داخلي

كانت هي
في بير السلم
واقفة علشان يلمحها
فتقرب منه
لكن البرد
اللي اتسرب م الهدمة المبلولة
كان أقرب منها
غصب عنها .. وغصب عنه
بيسبها وحيدة
وعلي أخر الدرجات الضيقة للسلم
واقف ينهج
ويحايل سرسوب النور
علشان يلحق يداري في حيط الشقة
المتشبع برطوبة قديمة
واضحة رغم الضوء الخافت
ف الركن المظلم
كانت الأم
بتمد ايديها لكيس البرشام
اللي يزود- تجاعيد ملامحها
بمرارة الجرعة اليومية
مد ايده بكوباية ميه
شدت بإيديها علي ايده في صمت
وف الخلفية
بيبان من برواز مكسور
نص شهادته

القطع الأول

كانت البنت
اللي كل ما مر العمر
كل ما خافت
بتكشف عن طرف النهد
اللي يحن لأيد غير أيدها
صوت تنهيدها
ورعشة عودها
تداري في الضوء الخافت
وهي بتتهاوي
علي أقرب كرسي جنب التسريحة
ويبلل توبها
الأحساس بالذنب

القطع التاني

سرسوب المية
يدوبك بيبلل جسمه
بيفكر في بروز مفاتنها
وبليعصر فكره
في المشهد علشان يفتكره
...
تتداري مع
رعشة جسمه لهطول الميه
بشكل مفاجئ
رعشة ايده
وهي بتنفض عادة كبته
....
- أظلام تدريجي -

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل