شعر

ممدوح السباعي

الحوار المتمدن-العدد: 4574 - 2014 / 9 / 14 - 19:31
المحور: الادب والفن
    

جوابات الاسطي عيد السوهاجي ، ولد المرحوم حراجي
للشاعر / ممدوح السباعي

******************************************
جواب رقم (1)
ياه عليكي يا دنيا ياه
ابويه اللي بني السد زمان
وانا انهردة رايح احفر قناة
ياه عليكي يا دنيا ياه
أنا الاسطي عيد السوهاجي
ولد المرحوم حراجي
صح انا ما كملتش علام
لكن حب الوطن عندنا وراثة
وحكايتي عاملة ولا الاحلام
ماهيش في كتاب ولا كراسة
أول رجل تحط فـ ارض القناة رجلي
مصر لما نادت سبت العيال طلعت اجري

***********
وبعد 30 يوم م الغيبة يا أحباب
بأبعت لزوجتي أول جواب
ــــــــــــــــــــــــــــــــــــــــــــ
الجوهرة المصونة
والدرة المكنونة
زوجتنا الغالية : " بدرية " عبستار
وحشتيني يا بت الذين
الغاتحة من غيرك ما لي سكن ولادار
سامعك بتقولي " المشندل " باعت ليه جواب ؟
يكون البوسطجي كداب ؟
امال " محموله " فين ؟
الحكاية يا بدارة فـ كلمتين
ورثي من ابوي يا بت الناس
هتلاقيه فوق الدولاب
ورقات قديمة مقطوعة من كراس
كل ورقة فيها جواب
من ابويه حراجي القط لما كان فـ السد
صاررهم ف منديل والله ما شافهم حد
لامي فاطمة احمد عبد الغفار
فـ بيتنا القديم اللي كان فـ جبلاية الفار
وانا انهردة شايفك فاطمة وانا حراجي
علشان كده كاتبلك جواب
عامل ايه الواد دياب ؟
خليه هو اللي يقرالك الجواب
طمنيني عليكي يا وكلاهم
30 يوم والنوم ما زار عيني
ما اعرف ان كان زعلان ولا هيلف يلف ويجيني
شغال ليل ونهار
واليد اللي ما تشقي ما . تلقي
وفـ مكان واسع معرفلوش غربة من . شرقة
الا بالحق
افرحي يا حزينة وفرحي عيالك
انا فـ القناة باسوق حفار
اه يا بدرية لو شفتي الانفار
وتشوفي الضحكة علي وشوش الجتت التعبانة
وتشوفي الناس برغم التعب والشقا
بردوا الناس فرحانة
انهردة جات دفعة عمال جديدة
شفت ف عنيهم دمعة بعيدة
زي دمعتي يوم ما سبتك يا بدارة
و النبي عاملة ايه الناس اللي ف الحارة ؟
سلمي لي عليهم واحد واحد
وادينا بنكدب ع الايام وبتواعد
سلمي لي علي كل اللي يسأل علينا
بدرية . يا بدارة عايز اقولك حاجة بس انا
" كشمان "
غمضي عيونك الجواب خلص كلمتين وهاكتبلك العنوان
انتي حبيبتي ودنيتي وانتي الفرحة اللي بتنور ليالينا
يا غالية علينا
معانا بشمهندس زي العسل بيحكيلنا حكاوي
ويسمعنا احلي حوار
وزي ما انتي شايفة
خلاني فيكي اقول اشعار

ــــــــــــــــــــــــــــــــــــــــــــــــــــــــــــــــــــــ
يصل وسلم ليد زوجتنا الغالية : بدرية عبستار
اللي ساكنة فـ سوهاج ـــــــ قرب المطار
من طرف زوجك : الاسطي عيد السوهاجي
ولد المرحوم حراجي
استني يا بدرية . استني يا بت
انا هاستني جوابك علي نار
- - - - - - - - - - - - - - - - - - - - - - - - - - - -
ممدوح السباعي
عضو اتحاد كتاب مصر

#ممدوح_السباعي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات