الازهر هاج وماج لما قالوا هيعرضوا نوح... ومحدش سمع صوته لما عرضوا حلاوة روح

محمد فتحى

الحوار المتمدن-العدد: 4425 - 2014 / 4 / 15 - 00:24
المحور: كتابات ساخرة
    

مجرد رأى
الازهر هاج وماج لما قالوا هيعرضوا نوح... ومحدش سمع صوته لما عرضوا حلاوة روح
( عنوان طويل شوية... ماأنا عارف)
حد سمع عن ماليناMalena لأ... طيب.. ده اسم فيلم ايطالى او بالاحرى النسخة الايطالية من الفيلم المصرى الرائع حلاوة روح ... ماتخدش من الكلام ده ... الحقيقة ان الفيلم المصرى ده هوالفيلم المسروق 100% نفس القصة والمشاهد مع اختلاف طبيعة الحياة هنا وهناك طبعا ... لأ فى حاجة كمان الممثلة القديرة هيفاء وهبى مقدرتش تلعب الدور زى مونيكا بيلوشى لان فى حاجات الرقابة هتمنعها هنا ... اه نسيت اقولكم ان دى بطلة الفيلم الايطالى .. نرجع بأه للاختلافات الحقيقية انا مشوفتش الفيلم المسروق بس شفت التانى بصراحة وشوفت البروموبتاع المسروق من الواضح ان هو زى الايطالى بالظبط بس مش هى دى المشكلة المشكلة هى قصة الفيلم اللى بتحكى عن واحدة راحت تسكن فى منطقة جديدة وبعدين جوزها مكنش موجود معاها فهى قاعدة طبعا لوحدها وبعدين بتنزل تشترى حاجاتها وتروح مشاويرها وكدة يعنى ... البنت دى كانت حلوة اوى فلما كانت بتعدى من اى حتة كانت بتوقفها على رجل ... مين بقى كان بيشوفها ... ايوة الولد الصغير اللى كان فى الفيلم ... بس بأة وهنا تبتدى القصة الفعلية فالولد فى الاول كان بيحلم بيها وبعدين تتطور الامر وبأة بيتجسس عليها كفاية كدة .... بس ده مش موضوعنا الاساسى ... الموضوع الاساسسى بأة هو فيلم نوح... ماتتصدمش هتقول وايه العلاقة هقولك خد عندك عندنا مؤسسة كبيرة بتدافع عن القيم والمثل العليا وعن الاسلام اسمها الأزهر ... ايه اللى حصل.. اللى حصل ان الازهر قام وقف على رجل وهاج وماج وطلع شيوخ وعلماء فى كل القنوات التلفزيونية وحرب شعواء على فيلم نوح ... ليه يا عم أصل بيجسد شخصية نبى ... مين قالك انت شفت الفيلم ..لأ ... بس ده اسمه نوح ... وبيحكى قصة الطوفان وكدة يعنى يبقى بيتكلم عن النبى نوح عليه السلام ... طيب خلينا معاك ... هو بيتكلم عن سيدنا نوح من وجهة النظر الاسلامية ... لأ ... طيب .... الفيلم فيه اى حلاوة روح والعياذ بالله مع انك عامل نفسك مش واخد بالك مع الفيلم المسروق مش عشان هو مسروق لأ عشان القيم الرفيعة اللى هينشرها ويبععترها علينا كأننا ناقصين ... او واخد ومش فارقة معاك المهم ... طيب يا سيدى الفيلم بيتكلم عن قصة سيدنا نوح الموجودة فى التوارة يعنى بعيد عنك أهو ومن وجهة النظر المسيحية يعنى فى جمهوركبير عريض من حقه يشوف الفيلم زى ماهو ...احنا مش عايشين لوحدينا ... وبعدين ما انت عرضت قبل كده الام المسيح ايه اللى حصل ... بعدين شكل الفيلم جامد راس كرو لوحده كفاية ولا ايه وبعدين شكله برده بيدينا عبرة وعظة بجد ... مش زى صاحبنا التانى ... لو انت عايز تمنع بجد امنع عرض حلاوة روح بغرض الحرص على الدين ... فدفع الضرر خير من جلب منفعة ... ودفع الضرر هنا هو ما يحمله هذا الفيلم من انعدام واستهتار بكل القيم واغتيال براْة الطفولة وتحويل المجتمع الى مجتمع شهوانى وسرقة اسوء مافى الغرب من قصص شاذة وغريبة تحمل فى طياتها الكثير والكثير من بذور هدم اخلاق اى مجتمع ... ياريت بجد بجد تسيبوا نوح يعرض وتمنعوا حلاوة روح.
( واحد نفسه يتفرج على الفيلم )

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل