الإخوان و دولة مبارك

محمد عبد الكريم موافي

الحوار المتمدن-العدد: 4390 - 2014 / 3 / 11 - 08:06
المحور: المجتمع المدني
    

تلاقي شاب إخواني جاي يقولك إن الغير مأسوف عليه مرسي متعاملش مع مؤسسات الدولة بحزم فعشان كدة إنقلبت عليه و خلعته ... وقتها بقى أتخيل محمد مرسي و أعضاء مكتب الإرشاد رايحين مبنى وزارة الداخلية_العزبة المتماسكة في الدولة مهترئة_ يقول لمحمد إبراهيم ( اللوا فلان ده مش عاجبني شيلوه ... مساعدك متهم بالتربح من خزانة نادي الشرطة الفلاني شيلوا) .. او طالع نفس الطلعة للدفاع و الإنتاج الحربي يقول لصدقي صبحي ( ميزانية الدفاع تبقى عند أحمد فهمي و مجلس الشورى بكرة ) .... عشان يضربوه بالنار ... عمر الثورات متنجح بالشرعية الإجرائية أبداً ......

كان الناس_مع قلتهم و ضعفهم _ بينزلوا يقولوا لا إنتخابات تحت حكم العسكر ؛ عايزين إنتخابات نظيفة وعازلة لكل القاذورات و في أجواء أكثر نزاهة و نضافة.... يطلعلهم الأخ من دول يقولهم ( لا ... لازم نحافظ على الدولة والمؤسسات _ اللي هيا أصلاً دولة و مؤسسات مبارك _ و نمشي في طريق الشرعية الإنتخابية و بتاع ) ... طب إلبس بقى يا حبيبي ( الشرعية الإنتخابية بأساساتها الوحشة )...
الفكرة مش مناهضة إنتخابات 2012 الرئاسية على ما هيا فكرة نقد الطمع و حب الإستئثار و عمى البصيرة و فرض الرأي اللي أصرت عليهم الجماعة بشكل غريب في فترة مجلس طنطاوي ... فيه ناس كتير غلطوا في نفس الفترة و صدر منهم تصرفات و تصريحات غير مسئولة لكن ظهر من خطابهم السياسي إنهم معاديين لفكرة العسكرة ( أيمن نور و البرادعي و خالد علي ) ... على الأقل دول إتكلموا و قالوا لا .. و وضح من كلامهم نية هيكلة المؤسسة الأمنية ما إذا وصل منهم حد لرئاسة الجمهورية ....... مطلعوش بيانات تأييد طول الطريق و مطبخوش قوانين برلمانية لأركان الدولة القديمة ...

صفقة الإخوان المسلمين مع دولة مبارك ظهرت بشكل فج في تعديلات و إضافات قوانين الشرطة و مواد الجيش في الدستور و تعيينات مجلس الشورى ... خلافاتهم مع القضاء كانت خلافات شبه شخصية مع مؤسسة بعينها لمواقف مسبقة ( زي تعقيبات الدستورية العليا على مدى توافق البرلمان بشقيه مع قانون الإنتخابات و الإعلان الدستوري ) ... و دي أدلة كافية لإخراس اي إخواني يحاول يتكلم في موضوع الإصلاح على المدى الطويل أو البرهنة على معاداة الدولة القديمة ....

يعني بمناسبة فيديو أهداف سويف ... دي واحدة كتبت مقال في الشروق عن اللي عمله الجيش في الأهالي في كفر الأمشوطي و القرصاية و بولاق ... فييجي واحد ولا واحدة من نفس ذات الأهالي دول يشرشحلها و يشتمها .. بيشتمها عشان هيا خاينة و عميلة لأمريكا .. خاينة و عميلة لأمريكا عشان كتبت عن اللي عمله الجيش في كفر الأمشوطي و إنتا رايح عند شاوا كدة ... و هكذا يبهرنا شعب مصر بإستمرار ...

المشكلة لما يطلع صحفي ولا إعلامي يدافع عن قضية فساد واضحة و معلنة و تبريراتها سخيفة ( زي ما حصل مع موضوع الشركة الإماراتية ) ... أو حتى يطلع مسئول عسكري أو أمني يبرأ الداخلية أو الشرطة العسكرية من قتل الطالب فلان اللي إتقتل في إحتجاج طلابي في جامعة القاهرة مثلاً ... طب يعني و ألاف المخالفات المالية و قضايا الفساد الإداري اللي مفشوخين فيها بقالنا عشرين سنة .. دي كلها مش عجباك فطالع تدافع عن قضية واحدة من ألاف القضايا .... و بالنسبة للأجهزة الأمنية ... العشرتلاف متظاهر موثق قتلهم اللي إتقتلوا خلال 3 سنين دول كلهم مش شايفيهم و خلاص بتنكر مقتل طالب واحد ... ده انتا تافه يا جدع ... و بعدين كان حد حاسب حد فيكوا من برا ولا من جوا ... ملوش لازمة الكلام و الدفاع يعني ...

نفسي الناس تفهم إن تصريحات محلب و السيسي عن التنمية على المدى القريب و مشاريع الإسكان و تنظيم الدعم و رفع أسعار الكهرباء على شرايح معينة ده كلام للإستهلاك الإعلامي مش أكتر ... مشاكل الدولة أعقد من إنها تتحل على المدى القريب .. الموارد مش كافية و الوضع متأزم و الدولة حتى مش قادرة تمهد البنية التحتية للإستثمار و الجيش واخد كل مشروعات المقاولات له ... البيروقراطية الحكومية مش هتطبق الحد الأقصى على نفسها .. و اللي هوا حاجة من الحاجات اللي المفروض نوفر من عوايدها السيولة اللازمة لتمويل خطط التنمية المزعومة ... الواقع إن البديل السياسي لسلطة مكتب الإرشاد هما فلول الوطني و عصابات الفساد السياسي و المالي ( اللي هما مجموعة من المحتكرين و حرامية دعم الطاقة و كبار الموظفين الحكوميين حرامية مخصصات الأجور ) ... قيادات العسكر و رجال الأعمال المستوردين فوق الدولة و فوق الرقابة و المسائلة القضائية و القانونية و برضه ليهم ناسهم في المؤسسات الرقابية ...

#محمد_عبد_الكريم_موافي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل