فؤاد سالم

سعدي جبار مكلف

الحوار المتمدن-العدد: 4337 - 2014 / 1 / 18 - 04:38
المحور: الادب والفن
    

فؤاد سالم
لمناسبة اذار عيد تأسيس الحزب الشيوعي العراقي

سعدي جبار مكلف
سيدني 5/1/2014

موبدينه...موبدينه ياخذ الموت الحبايب موبدينه ..
البصره بعدك تنحب وظلت حزينه..
ونته ذاك انته يبوالنفس الحنونه
..النخيل لا تموت يافالح ..
صديق الطفوله وزميل الدراسه ورفيق النضال انك لم تمت
ياابا نغم انك تعانق تراب العراق كعادة الابطال ...تالي فؤاد ابگبر...
الموت موت العدل...موش الينام ابگبر
ريض فالح ابن ابريچ
مو وكت الوداع اوياك
يا شمعه ابمهب الريح
البصره تبچي لطرواك
جبل ما وطه للسيسان
ولا همنا نبيح اچلاب
يفالح والنعم عيناك
ولك يا خويه اترجاك
ريض خل اسولفلك
سوالف هم
خلنا نبتدي من دار
لا من دور
من الصف السمع مغناك
نتلاگه بالتميميه شحلو ملگاك
يم شط الرباط الصاح ها يبني
الماذل روحه لحظه وعاش غربه اهناك
من محمود من زهرون علمنا
من ابراهيم صاحبنا
العطيريه تذكرنا
اشما رحنا ...اشما جينا
ولاچتنا السنين ابساع كبرتنا
لاچن ما نسينا يوم عشرتنا
صرت انته فؤاد انته
وصرت انا ...اخ انا
وچثيره اهموم دنيانا
يسوار الذهب كل يوم تلگانا
لعد طلع النخل وبريم مسرانا
يعشاري البلم للهور مسرانا
وللهيوه تحن الروح الحانا
چا وينه الوكت چا وين عمدانا
چا وينه المضيف ولمة الاحباب
چا وينه اليشد احزام لخوانا
ويظل امفرع ويزهي
اشلون ايعوف خلانا
ما ظلت زلم خشنه
وغلس والله اخو افلانا
رد اشباط يبن ابريچ
اعلام الموت عنوانا
الموت الموت يتنانا
تشردنا غريب انته
بدروب الشام تلگه الروح هيمانا
حسافه انعاتب الايام
ونغني ابقهر بستات حزنانا
حسافه الروح يمدلل
تعيش ابهضم رجفانا
وهضيمه الشفه باست يوم بيبانا
هضيمه الايد دگت حيل
عمدان العشگ بسگوف اركانا
وحسافه يا حسافه الشرجي يلفانا
وتظل ام البروم بشوگ حيرانا
يظل سيابنا ايصيح حمدانا
جينا اليوم يبن ابريچ نسمع صوت
غنوه من اغاني الشوگ نيسانا
جينه نحضر الزفه
يا عرس الحنين الطيب شكبانا
يا كشتات عرس اذار
حتى اذار صفگ حيل هنانا
ياهو المات ...منهو المات
الموته للعدل تنگال
موش الباس تربانا
موش الغافي بوطانا
موش الحنه راسه ابگاع اوطانا
موش الحنه راسه ابگاع اوطانا
ملاحظة
فالح بريچ الاسم الحقيقي لفؤاد سالم
العطيريه محلة طفولة فؤاد سالم
التميميه مدرسة التميميه الابتدائيه في البصره
سوار الذهب اول اغنيه لفؤاد سالم
ام البروم...شارع انس مناطق في البصره
كشتات...سفرات ترفيهيه
اذار عيد تأسيس الحزب الشيوعي العراقي


سعدي جبار مكلف
سيدني 5/1/2014

#سعدي_جبار_مكلف (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل