بواسير النائب

حذام الحداد

الحوار المتمدن-العدد: 4246 - 2013 / 10 / 15 - 22:58
المحور: الادب والفن
    

لاتـلومونه أبدْ نايـبنه أبــو الغيرهْ
مايگدَرْ ينام الليل وجعنَّه بواسيره

أريد أحچي وخل كلهم يسمعون
جراحة كلفت ستين مليون!!
ليش أوجاع شعبي كلهه أتْهون
وبس النايـب وَجعاتـه چبيرة
لاتلومونه أبدْ نايبنه أبو الغيرهْ
مايگدَرْ ينام الليل وجعنَّه بواسيره

أشـصارْ شـو هوَّ خلگْ باسور
أشْـحالْ لـو طگ عدَّه ناسور
يمكن يفكر يبيع الكرادة والمنصور
لأن تزيد عليه كلفة ْ التسعيرةْ
لاتـلومونه أبدْ نايـبنه أبــو الغيرهْ
مايگدَرْ ينام الليل وجعنَّه بواسيره

تكشخ نايبنه برقم أغلهْ بواسير
مو هيّن طلعْ لَهلوبة بالتزوير
أظنَّه راد يـلحگ بالـمشـاهير
وينذاعْ صيتَه بأخبار الجزيرة
لاتلومونه أبد نايبنه أبو الغيرهْ
مايگدَرْ ينام الليل وجعنَّه بواسيرهْ

تخبَّل من وَرهْ ماشافْ هاذ العزْ
چان ياكل بصل وهسه ياكل وزْ
شاف المال سايــب گام يـنگـزْ
عگب ماچان يملك بسْ حصيرة
لاتلومونه أبد نايبنه أبو الغيرهْ
مايگدَرْ ينام الليل وجعنَّه بواسيره

شعليهْ بالشعـب لو نام جـوعانْ
وشعليهْ بالمواطن حافي لو عريان
المهم يظل مرتاح والجيب مليانْ
ويظل هو السبع حارس الديرة
لاتلومونه أبد نايبنه أبو الغيرهْ
مايگدَرْ ينام الليل وجعنَّه بواسيره

متگـلي أشعـليه بالأنـفجاراتْ
وشعليه بالمواطن عاشْ لو ماتْ
نايبنَه اليهمَّه يشــفطْ النـفطاتْ
مرتاحٍ ينــام ونســمعْ شخيرَه
لاتلومونه أبدْ نايبنه أبو الغيرهْ
مايگدَرْ ينام الليل وجعنَّه بواسيره

يـمكن تـأذه مـن وَرَه الكـرسـي
لازگ بيـه من يصبحْ ويمْسـي
شلون تريده ياشعبي يظل منسي
أيجوز صارت أوضاعه خطيرة
لاتلومونه أبد نايبنه أبو الغيرهْ
مايگدَرْ ينام الليل وجعنَّه بواسيرهْ

گضه عمره العراقي وماله منهوب
ذل وجوع هـذي فـوگ الحروب
گاعـد عالنـفط وخاوي الجيـوب
بصيرَة عيونه بس أيده گصيرة
شَعبي كلَّه يروحْ فدوة لبو الغيرة
ونفطـاتْ الشَعَبْ فدوَة لبـواسيره

ستوكهولم
15.10.2013

#حذام_الحداد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل