حلم عشاك

ناجح الجبوري

الحوار المتمدن-العدد: 4123 - 2013 / 6 / 14 - 13:48
المحور: الادب والفن
    

صرخة ريل .. ومتاناة

وأحلام النثايه تبور . . .

يم أول نهر عطشان يطفي شموع المتانين

يم أول كحل مبيوك من العين

يم آخر رساله نكتبت بدمنه

حلم عشاك متصافين !

وأجتنه الغبشه بطرانه !! ترش بثيابنه الفركه

وأهي تدري مثلنه أحباب ماتلكه

حدر فيّ الزلوف أسرار وحجايات مملوحه

وطرف كحل العيون السود كومه أسرار مفضوحه

وشردنه بروحنه ...

شردنه بروحنه وفزينه يم الباب

وسمعنه من النوده أعتاب !!

ليش وليش ؟

عرف ديرتنه مايقبل مثل كل التحب نعيش ؟

ليش زلوفنه بلا روح ؟

وأدينه الدافة الحنه

ولليمته نعيش بنار ؟

وأحنه رويحة الجنه !

جم صيف وعطش جم صيف .

صرت لهلي راية ماي

وجم راي العليهم ظاع ؟

وآنه السلفتهم راي .!

ونترايه ... وعمرنه يضيع

وتبقه أحلامنه بلا راي

بعرف ديرتنه جي ظلمه ... ألعشك منبوذ

لكن نبقة خوش أولاد

بجم ليلة كمر معيوب .. نضوي شموع للميلاد

وجم زفه بسلفنه تفوت ..

بيهه أحلام مذبوحه ونثايه تموت

ماجن زفه للغرفة ... تكول الزفه للتابوت!!

وجه العريس ينكط ماي .. لكن ماكو حنيه

يعني تموت ...

وتدري عله الترافه تعيش غير رويحة بنيه

وحشه دروب اهلنه وبينه طكة ياس !

ونتغاوه بعشكنه ... بس نهم للناس

ولد شيوخ مانتقبل العيبه

ومنو المثلي يشيل رويحة بجيه !!

وأصرفهه وأطشهه احساس فوك الكاع

( وودعهه السماوه بلليل )

وأتعنه بحلم فارس قطار الليل

وماهاون يرن بذني .. ولا تخبصني ريحة هيل
وودع حلمي

وأتعنه لحلم ثاني

بلكه ألكه بحلم عشاك متصافين .

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل