بالايام و السنين

مروان عطية

الحوار المتمدن-العدد: 4102 - 2013 / 5 / 24 - 17:41
المحور: الادب والفن
    

لو كنت بتحسبها بالايام والسنين
تلاقيني شاب عدا السنة بعشرين
بس لو تعرفني من زمان .. بص في ملامحي
أمانة عليك تقولي أنا مين ؟!
لسه فاكر أول لعبياه فرحت بيها
و أول بنوته حلوة بحلقت في عينيها
فاكر يوم ما ضاعت مني اللعبة
يوم ما شُفت الحلوه و دبله في ايديها
حبيت حاجات كنت زمان مابحبهاش
و اخترت حاجات كتير ماخترتهاش
و عشت لحد ما عديت العشرين
بس بيني و بينك... ماعشتهاش!
بحسبة الايام والسنين
أمانه عليك تقولي أنا مين ؟!
ورايا بيتنا.. مدرسه.. جامع.. و جامعة
مشاوير.. دروس .. سكة سفر..و صلاة جمعة
معقول عدا ده كله و كأنه ما كان
معقول مافيش ولا حاجه منهم نافعه
و تفيد بايه يا ندم... قلت أبص قدامي
لقيت ورقة وختم علي صورتي (لم يستدل علي عنواني)
شُفت تراب ..ضلام
جنازة ماشية .. و حتة رخام
مكتوب عليها المرحوم فلان الفلاني
ياللي حسبتها بالايام و السنين
خلاص .. عرفت أنا مين ؟
أنا بحسبة كل ولاد جيلي .. فاشل يائس صايع
لا ماضي لا حاضر و المستقبل ضايع
ضاعت اللعبه
ضاعت البنوته
كان ياما كان ..
خلصت الحدوته
باع قلبه باع حلمه عايش كأنه..لا شاري ولا بايع
و يا عيني عليه عيني عليه يا ولداه
علي سواد لياليه وقولته الآه
علي عمر يفوت
وضحكة تموت
عايش في تابوت
طب ليه سموها حياة !
أمانه عليك تقولي أنا مين ؟!
و بحسبة كل ولاد جيلي ..
ايه تاني باقِ لي ؟
غير نواح قلب عالماضي يحكي لي
يقول الحب .. أقول منباع
يقول الزمن .. أقول خداع
يقول الحلم .. كان في ايدي و ضاع
بالورقة والقلم ... ماكدبش عليا ولاد جيلي
ايه تاني باقِ لي ؟
طريق يقطع شراييني
بسواد أسفلته يغطيني
في بدايته مطحون
و في وسطه ملعون
ونهايته ....
ضلام قبره مستنيني
ياللي حسبتها بالايام و السنين
خلاص .. عرفت أنا مين !!
أنا كنت عيل
ف(مهموم)
ف(مطحون)
ثم (مرحوم)
أنا عشت ميت لحد العشرين
بقيت الحزن بعد ما كنت حزين.

#مروان_عطية (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل