محمد جلاب البديري
الحوار المتمدن-العدد: 4092 - 2013 / 5 / 14 - 10:20
المحور:
الادب والفن
بينك وبيني درب
مكتوب بعيون المسافات
أنه ميزاني عدل
يحضن عشگ
ونت مكسوره جسورك
أبد ماتعرف موَدّه
وتاهَة بزحمة محطّات
آنه حزني وياي يمشي
ومن أناغيله بهداوه
مرّه يضحك مرّه يبچي
نظر بعيوني عشرته
وهِنّه داره البِيه يبات
من جنين بروحي عايش
نهر ومْصاحِب جرف
بريسم وشد خيطه وي دربي حياة
كوخ وي روحي يلمني
وي سوالف إمهات
اليحب عنوانه گمره
والوفي دگات گلبه
ترسم الناس بعشگهه
مرّه دجله
ومرّه من ماي الفرات
اليحب ماعَرَف ذاته
عشگ ذات النهر من ترْوِي العطاشه
بلهفه فات
بعد ياسنبل عمرنه
مشابگ بريحة العنبر
والنِفَس ضحكاته غنْوَه
بروح أهلنه
يحلم بزفّة عرس وشموع وي النجم تضْوِي
ومن تذوب إعله الجفوف
شلون من ذابة الحِنّه
الماعنده وطن
مايحلم بجنّه
حتى الطير من يبنيله عش
ترفرف بروحه المحنّه
#محمد_جلاب_البديري (هاشتاغ)
كيف تدعم-ين الحوار المتمدن واليسار والعلمانية
على الانترنت؟