بحلم-قصيده

محمد حسين عبدالعزيز محمد

الحوار المتمدن-العدد: 3980 - 2013 / 1 / 22 - 13:55
المحور: الادب والفن
    

بحلم
بحلم بييجي اليوم
بحلم أكون شاعر
يسكن كلامي النجوم
والكل بيشاور
يحفظ بديعي الكون
وبلفظي يتحاور
بحلم يا حلم بعيد
بحلم ومش قادر

تبقي قصايدي
ألف غنوه بتتعزف
واما تترد ع اللسان
دُغري إسمي يتعرف
بحلم أنا وعارف
بحلم وبعترف
بحلم وكل يوم
قلمي بيتكسر
كره الحروف
مل السطور
فوق الرفوف
كل كلامه بيتإسر

نفسه يشوف النور
والنفس اماره
بتوعد قلبي كل يوم
والوعد بخساره
لا نافعه هوايه
ولا شافعه قرايه
ولا دٌعا في السر
ولا حتي إستخاره
أصل شاعر ده
مش مجرد لقب
مش وظيفه زي غيرها
فوق أي كارت بتنكًتب
الشاعر مش مجرد لقب
وعشان تشيله
لازم تعاني
تبقي زي بحار وطايف
سفينته ما بتعرف
مواني
شراعه حسه, والدفه حبره
راهب ف بيت الفكر
ملهوش سكن تاني
بس خلاص
ايوه خلاص
قلمي قدر
وصوتي أنا
صوتي حضر
ومن جوا سجنه ف السطور
صوت وصل
ولو ع الصبر-صبري
خلاص- صبري صبر
بس قبل ما يقدر علمني الكلام
قبل ما يوصل
مضالي ف كراسة العلام
علمني إن الشاعر
مش زي باقي الخلق
رغم إنه من الانام
أحسن مين يوصف الألم
والكل حوله ف إبتسام
علمني معني الويل في
كتابة القصيده
لازم تبقي اقوي منك
تبقي عنيده
مش مهم لمين هتخرج
مش مهم تكون وحيده
أنا كل قصايدي وحيده
بس المهم تبقي فكره
تبقي بكره
تبقي احلامي السعيده
اللي اشوفها كل ليليه
في المنام
مات الكلام
والحبر مقضاش
وورقي متكوم تلال
والعمر ماش
العمر ماش,والحلم يقظه
حلم بس اكيد مُعاش
أصل اللي حالم
لساه بيحي
يقدر يهدي
يعرف يعدي
عدي هو
وحلمه لسه
حلمه معدااش

#محمد_حسين_عبدالعزيز_محمد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل