الغريبة

محمد محمود الكاشف
(Mohamed Mahmoud El Kashef)

الحوار المتمدن-العدد: 3699 - 2012 / 4 / 15 - 10:09
المحور: الادب والفن
    

كل حاجة بقت غريبة
حتى كونك مش غريبة
حتى صوتك
حتى صورتك
واللي باقي من البواقي
اللي ساكنة جوه قلبي
حاجة برضه "رغم ذلك "
مش قريبة
ومش غريبة
■ ■ ■

والغريبة يا حبيبتي أن حُبك اتهام!!
اللي خلا الأرض خضرا
واللي خلا الدار أمان
واللي سارح وسط زرعي
واللي طارح ف الغيطان
واللي سطر
واللي عطر
واللي كحل
واللي خضر
كل حرف وكل كلمة
كل طرف وكل جملة
كل نظرة وكل بسمة
وكل طاقة محندقه وسط الحيطا
بقى يا ستي ويا حبيبتي
رجس أسود م الشيطان !!
■ ■ ■

حجة فارغة
وأمر واهي
لأجل ما تزيد التلاهي
ولأجل ما يضيع الكلام
ولأجل ما تكون الحكاية
سكة فاضية أو نهاية
أو رواية من البداية
بيحتضر فيها الكلام
■ ■ ■

ده اللي داير
واللي حاصل
واللي صاير م الكلام
ده اللي خلا حبك إنت
أيوه إنت يا حبيبتي
بقى قضية واتهام
ماله لازمه من سنين

وأنا اللي عارف أنت مين
وأنا اللي عاشق من سنين
والعشق غيه
وكل عاشق وله بهية
وكل طير وله حنين
يا حكاوي الفلاحين
يا غناوي الصيادين
يا أدان كبر ف قلبي
واتولد منه الحنين
■ ■ ■

مش غريبة إني أحبك
حبي ليكي مش حرام
حبي ليكي من البداية
شيء جميل مالهوش نهاية
شيء تمللي يحب بكره
وكل بكره وله حكاية
وكل معنى وله رواية
وكل عاشق وله مرام


وأنت المرام
وأنت الغرام
وأنت الصبية
وأنت البهية
وأنت الهموم
وأنت السلام


وأنت الحقيقة لو يعرفوا
راح يفهموا معنى الكلام
ده أنت البداية في كل شيء
وأنت النهاية ومسك الختام



■ ■ ■

11/4/2012

#محمد_محمود_الكاشف (هاشتاغ)       Mohamed_Mahmoud_El_Kashef#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات