سيدنا الشخشوخ

صلاح عبد الله

الحوار المتمدن-العدد: 3576 - 2011 / 12 / 14 - 18:54
المحور: الادب والفن
    

سيدنا الشخشوخ

سيدنا الشخشوخ

قاعد منفوخ

بيجعر فينا بصوت مشروخ

يا نطاطى البصلة ونختاره

يا هاندخل بعد الموت ناره

أصلها ملكه بانيها فى داره!!

بيدخل هذا فى كل نفوخ

سيدنا الشخشوخ

سيدنا الشخشوخ نازل بعبعة

فى الزهد لكن نسوانه أربعة

نازل طفح ونازل قربعة

وبيستلطخنا أصل احنا لطوخ!!!

بيقول سيبوا الدنيا الفانية

سيبوا نجاستها لناس تانية

ودا أكبر مسروع عالدنيا

نفسه يحصلها ولو بصاروخ

سيدنا الشخشوخ

سيدنا الشخشوخ بطنه شنيعة

فى الأكل ملوش أى شريعة

ياكل ويرن التكريعة

يرقعها فى مصر تسمّع طوخ

سيدنا الشخشوخ

سيدنا الشخشوخ بيروق ويطيب

من بعد الشاى مع جوزة الطيب

بالليل لعيب والصبح خطيب

من لعبه على الونجين ملبوخ

سيدنا الشخشوخ

مالنوم والراحة ومالقعدة

والحشر فى ديك أم المعدة

والتحسيس على هند وسعدة

مبيض اسم الله عليه وتختوخ

سيدنا الشخشوخ

سيدنا الشخشوخ مالى القنوات

بكلام يوجعنا عن الأموات

وإن جبنا له سيرة الستات

بيريل، وبيعرق، ويدوخ

سيدنا الشخشوخ

سيدنا الشخشوخ عالشاشة يزن

بكلامه عن الأحلام والجن

لكن يتلخبط جداً إن

سألوه فى الناسخ والمنسوخ

سيدنا الشخشوخ

والشخشوخ فى بداية الثورة

ماخرجش عشان عنده الدورة

نجحت راح قايم بمناورة

أستاذ طول عمره فى مسح الجوخ

سيدنا الشخشوخ

من دين ربنا بينفّرنا

ومكفرنا ومكفرنا

نفسه من الدنيا يسفّرنا

ويسف النىّ مع المطبوخ

سيدنا الشخشوخ

سايب مشاكلنا فى مية ناحية

وبيرغى عن التوب واللحية

بيجرجر عالم مش صاحية

ناس خايبة مفيش فى دماغها مخوخ

سيدنا الشخشوخ

سبنها فى الدقن وفى الحمام

خش على الكرسى وعالحكام

شافنا سكتنا كبرها أوام

والقصر أساساً ابن الكوخ

سيدنا الشخشوخ

والشخشوخ ابن الهباشة

خدام لبتوع الدشداشة

معذور لو تنح عالشاشة

من أكل الكبسة يا ناس مفشوخ

سيدنا الشخشوخ

بالإيد والفكر وبالنية

راح نبنى الدولة المدنية

ونشم نسيم الحرية

ونقول هأو شى الله يا شيوخ

ولا هانعبر سيدنا الشخشوخ

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل