قصيدة خاصة بذكرى ثورة 14تموز 1958

محمود العكيلي

الحوار المتمدن-العدد: 3423 - 2011 / 7 / 11 - 16:59
المحور: الادب والفن
    

ام الخير
محمود العكيلي
مخاطبة مؤلمة لثورة 14 تموز(الكحيلة) في ذكراها الثالثة والخمسين، حيث عشت ايامها وكنت شاهدا على احداثها.. لذا كان الجرح عميقا!

يل الكحيلة تعدى العمر خمسين ومن شافوج طحتي خرطواأجلالج *
كسرولج رجل يكحيلة يم الخير وظل بس الوفي(بالعذره) يبرالج
حرامية الفجرغدروج ماتدرين الشعب مندوم ظل يبجي أعلى حالج
لميمه اجمعت خانتج بشباط ماهمهه الوطن باكت عشه أعيالج
أعلى أديهم شفتي بس الضيم والموت وشعب ينباد ماجان أعلى بالج
نكرولج فضل للوطن سويتيه وتهموج أبعماله وباكوا أموالج
ياثورة شعب بالكلب ضميناج وندري باليحبج جان جتالج
سلك درب العفو وي اللي خانوا بيه وابعد عنه ربعه ألجانوا أكبالج
ماخانواقضيتج ربعه يم الخير وابكل بيت ظل مرفوع تمثالج
كالوله العفو ميفيد وي الخان العفو عن التآمر كطع اوصالج
وتعرفين العصابة الذبحتج بشباط لوميته كبل موت الله أشوالج
وبيان اثلثطعش اعدام كل الناس (وبن عادل)سلام أبروحه ضحالج
ديوانج عمرسنتين للناس وألمعزب وراهن جفه ادلالج
ياثورة شعب حكج فلا تدرين عزلونه أبركن من اول أهلالج
لكن ماجفينه دوم ماعفناج والتاريخ يشهد أحنه أبطالج
ومن شفنه التآمر صرنه ألج حماي انتي الام يثورة واحنه أطفالج
وتدرين الطفل مايرضه امه أتموت يفديهه أبحياته ...الف هنيالج
ياثورة شعب ..تموز مر اليوم أبهذا اليوم كل الفرح يحلالج
لكنا بجينا والالم بالروح من شفناج تبجين أعلى جتالج..!
بينه الصوج خلينه ألرسن مهدود وظل يمشي غلط ياوسفه خيالج
وغلطتنه الجبيرة نسند الغلطان وحصدناها النتائج ..خيبة آمالج
ياثورة شعب محروم صار أسنين ركص فرحان بيج وبالحضن شالج
لكن ياحسافه الغدر عاش أوياج ينخر مثل أرضه أبوسط دلالج
وصحنه يازعيم أوياك غدارين امنع من خطرهم لايظل سالج
لكنه تغاضى والبعض جاراه وشفناها النتيجة انتهت باذلالج
غلطة من العمر ياحيف ضيعناج وصار المانريده بيج يجرالج
ولاجيفارا عدنه من كبل خمسين حتى أبثورته أيحافظ على احوالج
أعذرينه يثورة الصار ماننساه وماقصرشعبنه أبدمه وفالج
بس ظل العتب واللوم عالطيبين ضاعت فرصة منهم ماتجي أبالج
العادوج كسبوا لعنة التاريخ وأيروحون فدوة ألفردة أنعالج
وأيروحون فدوة ألفردة أنعالج
*من عادة العرب اذا كبرت الفرس او انكسرت رجلها اصبحت لاتصلح للركوب،فياخذون منها الجلال ويتركونها في الارض البور(العذره)المتوفر فيها الماء والعشب.
تموز/2011

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل