زمن الحب الجميل

امال رياض

الحوار المتمدن-العدد: 3399 - 2011 / 6 / 17 - 22:47
المحور: الادب والفن
    

زمن العجايب

حن قلبى لأيام وكانت … من زمن الحب الجميل

زمان وعدى وراحت حلاوته .. كان كل معنى فيه أصيل

والله احنا فى زمن العجايب

الصديق كان خل وافى … كلمته تطيب وتشفى

ملاك وقلبه صافى ودافى … لمسة محبه من ايده تكفى

فينك يا خلى فى زمن العجايب .. لا عاد صحاب ولا عاد حبايب

والله احنا فى زمن العجايب

وفينك يا خويا يا ابن ابويا وامى .. ياللى شلت عنى همى

كنت جنبى حته منى .. مرسى بحرى همسى وسرى

فرقتنا كتير المصالح .. ايدين بتسلم وعيون بتتلاقى

وقلبك بعيد يا خويا عن حضنى

والله احنا فى زمن العجايب

وفينك يا جارى … ياللى كنت أقرب من أهلى وناسى

ببتسامة تفوت تمسى … وصباحك نادى وسكر

والكلمة منك ورد معطر … سيرة محبة وعشرة أصيلة

راحت معانى الجيرة الجميلة

والله احنا فى زمن العجايب

نفوسنا كانت صفا وسماحة … وديارنا كانت بالحب واحة

الأنس كان صفو الأحبة .. وكنا للغريب فرشة وراحة

ليه النهارده جوانا خوف .. والأمان هجر قلوبنا

والغدر أصبح عالمكشوف … والوهم ليه سكن عقولنا

ليه كل يوم علينا يفوت .. أجمل ما فينا يموت

والله احنا فى زمن العجايب

كنا فى طرقنا بنرمى السلام … والكل كان لينا حبيب

فى الشوارع .. فى الحارات … الكل كان من قلوبنا قريب

عيون طيبة تسعد صباحك … تدعيلك ولو كنت عنها غريب

والله احنا فى زمن العجايب

مش بس المحبة هى اللى عنا غابت .. دى الشهامة والكرامة

وعزة الإنسان ياخساة راحت

أب قاسي وأبن جاحد … والأنسانية جوانا ماتت

أبسط حقوق الإنسان .. فى زحمة الطغيان

يا خسارة ضاعت وتاهت

وفين نلقى الرحمة والشفقة … وفين نلقى الصدق والإخلاص

بعد ما نور الدين انعدم … من قلوب بعض الناس

صحيح بنشوفهم بنى أدميين .. لكن جواهم معدومين الشعور والأحساس

والله احنا فى زمن العجايب

وليه نلوم على الأيام … ونعتب عليك يا زمان

لا فى يوم غابت شمسنا … ولا فى يوم بطلت الأرض دوارن

ولا الشجر يوم غير خضاره … ولا الصبرفى يوم أصبح ريحان

والنجمه لسه مزينة الليالى … والقمر..القمر طول عمره سهران

كل اللى اتغير انت … ياللى كان أسمك إنسان

وفين انت يا إنسان … دورت عليك فى كل مكان

لقيتك سراب إنسان … ضاعت ملامحك

ذادت جوارحك … لقيتك خالى من الروح والوجدان

والإنسان .. يعنى الأمان .. يعنى الحب .. يعنى الحنان

يعنى الشفقة والرحمة … والعدل والتقوى والإيمان

لابس بفخر ليه توب الخطية.. فارد ليه جناح الظلم على اخواتك فى الأنسانية

وفى الحقيقة انك ضعيف ..مارد سخيف.. أصغر من أن يكون لك كيان

والله أحنا فى زمن العجايب

#امال_رياض (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات