عابر ديالى

نيران العبيدي

الحوار المتمدن-العدد: 3048 - 2010 / 6 / 29 - 00:06
المحور: الادب والفن
    

اويلي ايد الارهاب اشكد قويه ليش يمه ليش جبناء انذال اشنون تمد ايدكم على ابني ليش هو مو عراقي دكولو شنو لو جنتو رياجيل ما جان تلثمتوا جان كشفتوا اوجوهكم .....اوي اوي لاجن ربيت ولا لواليت وكبرت بالمدارس وتخرج تالي هاي تاليها اي من الله لاينطيكم انشاء الله اشو االعين وسيعه ها كبراتها الجتف هذا عرضه اسمر وطويل وحليو كولو ليش ما شارك مبعارك الشوش وجسر حالوب لو ما اتسر عشر سنوات بلاسر كولو عراقي ابني لو لا كولو لي لك يمه غضبان تعال دا اسولفلك السالفه من اولها لتاليها

اي يمه اي سولفي
كعدت وما كعدت اليوم الصبح جنت امكسره اتكسر ما اكدر امد رجليه تعرف الرماتيز ما بقى بيه شىء من يوم تاسرت الى هسه صارت الدنيا ظهر تقريب الثنعش الله لا يكذبني ياربي اجعله هذا اليوم خير علينا وعلى امه محمد اشو شفت رؤيا موزينه كلت بلكي اخابر ام مظفرالونداوي بلكي تفسرها اليه تذكره لو لاع هذا الجان سفير بالصين اي جنت اسمع ابوك الحجي دا يحجي ويه احمد ابن حجي باسم ابن عمك تعرف سمعي هم صار ثكيل ما اسمع زين كل الي سمعته يكولون بالطب العدلي ماعرف شنو كمت اتسحب اسحب دا اعرف شنو السالفه وما اسمع الا اختك الجبيره تركعه للصوت
عزه العزاني وطين واراني
لكم شكوا هاي ياعزه ياطين ده كولولي اشصار ...؟
شكوا شنو ابوج الحجي مات
هذا ياحجي اي مو هساع سمعته ديحجي اني هم اخرفيت
ولكم احسان.. نمام هاي شكو يا همه هسه بالدوام
ولج دكولي اشصار
يمه اخوي الجبير انكتل
يا يمه مي ونزل على راسي ما حسيت بروحي ترف ماخليت شي براسي ما نزلته ولكم ابني ويا محبس يميني
مامه الله يخليج جوزي من النواح
كولو اشصار... واسمع ابن الحجي يكول قتلوا من جان دي يسوق بالسياره يم جامع العساف بالنزله ما الهاي وي ماعرف شنوا ثلاثه ملثمين جانوا بسياره كيا سوده عليه وضربوا ثلث طلقات وحده براسه وركبته ووحده بجتفه وهسه هو بالطب العدلي
لكم ليش تعرفون لو لاع اشنون ادلل بثلاث جفافي من ذهب نزل ابن بغداد وحوش جبير الهم مصله على محمد كالولي من اجا للدنيا تعرفون اشنون ربيته على بنات اثنين اجا يمه يمه وجنت احطه بحضني واالوليه يمه
جاني عابر ديالى.... ومشله اشياله.. وسكران ومجتفينه
اي يمه اي لعد لوما سكران اشلون يهفوك يمه ليش ما اعرف انت سبع وكدها الله واكب ر
اشنون تكابلتوا على واحد والرشاشات بيدكم ا ي من الله لا ينطيكم اثلاثه على واحد اوي يمه
ريت الي قتلك قتيل ودمه على ركبته يسيل استغفر الله هم حرام هذا الحجي
تدري فديوم اختك نوره كالت لي شافت حلم استغفر الله الكاظم ديحترك وانت جنت بالجبهه اني من خوفي انطيته عشر دنانير كتلها هسه ترحين ازورين سيدنا موسه ابن جعفر وتطلبين نذر منه لاخوج بلكي الله يحفظه من هاي المعارك وجان هذاك الوقت رشدي عبد الصاحب يذيع بهل البيانات ويرد ليوره مثبور بثبره الله بمعركه الشوش والطاهري واني مكسره ماكدر اروح خابرت بيت العلوي اي ام حسين كاللت لازم ترحون للكاظم اي هي شيعيه وتعرف هذه السوالف واحنه معاظمه احناف منعرف بس ماكو فرق يمنه كلنا ولد ادم وحوا وتعرف ابوك بذاك الوقت ما جان يعترف بالله اي مسوي نفسه مسقوفي ومثقف ومن جوه الجوه دزيت نوره تندعيلك يمه والله وانطيتها عشر دنانير لروحا ماتها ببهذاك الوكت جانت شكبراتهه كالت اختك اني كاعده دا ادعي ومشفت نفسي الا يم باب المراد هذه فد وحده زايره كالت الها تعرف هم نوره طالعه مثل ابوها ماتعرف شي من هاي السوالف وتكول يمه اني كاعده وجان تجي مره توه اجه رجلها من الجبهه وتطش الواهليه مال رجعت زوجها اي جان النسوان يكولون النوره رجعي زيارتج راشده قولي لامك انشاء الله ماكو شي عليه الغايب يرد
اني هم كلت شر اهون من شر من اسروك ليش انت عبالك ابوك صدك بالبدايه من كالوا اانفقد ابنكم واسمه لم يظهر بالصليب الاحمر
سوده عليه ابوك ما خله مستشفى ما دور بيها
ولكم ها الشايب بهذه الجزيره يدور على ابنه بياهي ديره
تالي دا تجي الى بغداد عمت عيني دا تنقتل اويل يابه
تعال تعال يمه تعال اكملك الولوه
اي يمه اني اجيت دا اشوفك
اكول هاي شنو الفتحه الي براسك وهاي الي بجتفك
وهاي انت ليش حافي ومترب والدم على ركبتك
اي ليش انت يمه ما تعرفين حتى تسالين
لا يمه لا بحظي وبختي
يا يا خويه ابن امي انه امك ياغضبان هذه مكان الطلقات مو
اي يمه اي
يله دا الوليلك واكملك اللولوه تعل تعال
اجاني عابر دياله ومشله اشياله
وسكران ومجتفينه ومن كذيلته امجتفينه
لكم وينكم يابنات تعالوا هذا اخوجن الجبير الشفيه لفه
يمه هذا ياغضبان هو مات شنو اتخبلتي
لا لايمه لا اني مااقبل بعد واحد يقول عليه خيريه خان اتخبلت
هذه اني اي اني ام الشهيد
يله صفكن يا بنوات جاني عابر ديالى ومشله اشياله وسكران امجتفينه وبراس الاعظميه قاتلينه
ها ردي نوره هاي شوكت جيتي من الخارج يمه
هسه جيت داشوف اخويه الجبير اي يمه اي
وكللللش ششش وبراس الاعظميه قاتلينه ولكم ويه الشهداء حاسبينه

كندا اذار 1996

#نيران_العبيدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل