رساله من العالم الاخر

نبيل غبريال المحامى

الحوار المتمدن-العدد: 2891 - 2010 / 1 / 17 - 03:35
المحور: كتابات ساخرة
    

رسالة من العالم الأخر من شهداء نجع حمادى وعسكرى مش شهيد و محمد علاء مبارك إلى جدو حسنى مبارك .

أثناء نومى حلمت بأننى فى السماء فى حفل أستقبال شهداء نجع حمادى يوم عيد الميلاد 7/1/2010 وهم من الأقباط وعسكرى حراسة الكنيسة يرتدون ثياب بيضاء وأستقبلهم الطفل المرحوم / محمد علاء مبارك ودار بينهم هذا الحديث : ـ
حفيد مبارك: حمد الله على السلامة وإيه اللى جابكم هنا أنتوا أتحكم عليكم بالأعدام عشان أرتكبتوا جريمة فى الكنيسة يوم العيد .
الشهداء: : الله يسلمك ، لا أحنا كنا بنصلى وأتقتلنا بمدفع رشاش .
حفيد مبارك : ليه كنتوا بتصلوا فى كنيسة بدون ترخيص .
الشهداء : لا أبداً الكنيسة مرخصة - بس اللى قتلنا . الكنيسة فى اليوم ده كانت فاضية من الأمن غير كل عيد - ومحدش من القيادات الأمنية جه عشان يهنى سيدنا الأنبا كيرليس الأسقف بتاعنا بالعيد وفى مجرمين الحكومة ( بتقول 3 مسجلين خطر موتونا زى الفراخ بمدفع رشاش وقالوا عشان ندفع جريمة شخص تانى هتك عرض فتاة) بس أحنا مالنا وكمان بيقولوا دى لعبة سياسة بين واحد مشتاق لكرسى مجلس الشعب وعاوز يخلص من الأسقف كيرلس عشان هو كان السبب فى نجاح العضو الحالى . وكلام كتير بس أحنا ذنبنا ايه ندفع ثمن الضعف الأمنى والأهمال والتعصب الدينى والجهل وعدم قبول الأخر واللى بيزيد فى مصر والخطاب الدينى والتعليم والأعلام وعدم تنفيذ القانون والصلح العرفى الخطأ فى جرائم الدم وده كلة غلط ومحدش بيعالجوا إلا لما تحصل مصيبة وكام يوم وترجع ريمة لعادتها القديمة .
حفيد مبارك : وأنت ياعسكرى مالك زعلان ليه ؟
العسكرى : أصلى أنا أتقتلت وأنا واحد من حراسة الكنيسة وزميلى الشهيد أتقتل وهو على الحدود بين مصر وفلسطين بس معرفش ليه مصر اطلقت عليه شهيد وتعملوا وقفات أحتجاجية وتكريم من الدولة والفنانين وأنا لا ؟ مع أننا أحنا الأثنين مسلمين وأنا أعرف أن الموت أثناء الخدمة العسكرية شهادة .
الشهداء : ياريت تكلم جدك حسنى مبارك يلحق مصر بدل ما تبقى زى لبنان أحنا مبسوطين أن أحنا طلعنا السماء وأحنا شهداء فى المسيحية بس ياريت تقوله يلحق باقى شعب مصر .ياريت توصله صوتنا وتقوله دمنا غالى بس فداءً لمصر كلها مسيحى ومسلم وقوله صلح التعليم ويمنع التمييز بين المواطنين يعلم الأطفال قبول الأخر والتسامح وميخليش حد يكفر الثانى ويبيح حرية العقيدة فى مصر .
حفيد مبارك : أنا حالاً هبعتلة رسالة وأكيد هتوصله أصل أنا وهو بنحب بعض أوى وأنتوا أخواتى لما كنا فى الأرض ودلوقتى فى السماء وهقوله ياجدو أسمع الناس ومتزعلهومش علشان الناس بتزعل لما تتكلم ومحدش يرد عليها وياريت دى تكون أخر عملية أرهابية فى مصر .
حفيد مبارك : هو ليه ياجدو عمو حبيب العدلى لسة وزير الداخلية بعد اللى حصل هو عشان قريبنا ؟أعزله ياجدو .
الكاتب : وأخيراً صحيت من نومى على صدى صوت يتردد من حفيد مبارك للشهداء ثلاث مرات – الرسالة وصلت - الرسالة وصلت - الرسالة وصلت .الحلم خلص ، ،

#نبيل_غبريال_المحامى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات