قصيدة - نترجه الشمس -

محمد المنصور

الحوار المتمدن-العدد: 2606 - 2009 / 4 / 4 - 06:33
المحور: الادب والفن
    

نِتْرَجه الشمسْ

خمسة وسبعون حمامة ً بيضاء َ تسافر ُ نحو الشمس

محمد المنصور


چنه نِتْرَجه الشَمِسْ
لاچن غيوم الوكت .. زادتْ سواد
وساحتْ الكِحله بجِفن أترف عروس
والخدود توَسدتْ ظل الگصايب.


جزرتْ المَدْ بنهرنه
ونشفتْ شطوط الصدگ
الچلمة ماتت عالشفايف
وآنه خايف ..!
ويا هو اللي يردّه ضميره
يصيح خايف.


تروح توصل للمگابر .. تشوف نار
ترد تگل لهلك .. على طيوف المگابر
تشوف نار
ناشدتْ كِلْ نجمْ يلمعْ
الگمر چا وين صاير..؟!

جاوبتْ حفنة ضماير
بصوت مبحوح إيتراجف
نار ...
عينك ما تشوف النار
شبتْ بالصرايف نار.


وإختنگ .. حتى الجنين إبطن أمه
من سمع صيحاتْ نار
واللي ما عرف خيط الشمس
حَسِباه سنان نار.

***

شعتْ شموس الربيع
وبدِدَتْ ذاك الظلام
خضّرتْ حنطة هلي
تشابگتْ ويّ المعامل
وسطر التاريخ .. بأقلام المجد
صفحات بيضه.


أورَدْ .. رَدْ لفانه الشته الأگشر
غيّمتْ دنيانه أكثر
وإنذِبح برعم أملنه ...
برحم أمه ..! لرَبْه يشهگ
نعّستْ ذيچ الضماير
وإشتغل شبچ الخناجر.


الظلام إيلفنه كلنه
وإحنه ماشين بعزمنه
چنتْ أركضْ وأنه أدري
بعد تتناني خناجر
شفت كل الطيبين
إمشَچچه كِلهه خناجر.


ذاك .. ماتْ بصدره خنجر
وتجدح إعيونه شرار
وهذا .. شايل رحم أمه فوگ چفه ..!
وذاك .. مِتلفلِفْ بعار.

***

ودارتْ ألدنيه .. مثل دوّر الرحه ..
ودار دولاب الوكتْ
والصدور .. الواجهتْ ذيچ الخناجر
تشابگتْ.


راحتْ تحيي زِلمنه
عزم زاد إعله عزمنه
مشتْ إنجوم السلف ..
لأجمل عروس ...
سمره .. وحديثه .. وجميله
مهره .. وكحيله .. وأصيله.

***

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل