سبع صنايع و البخت ..........كاعد !!

عمر ابراهيم الجنابي

الحوار المتمدن-العدد: 2457 - 2008 / 11 / 6 - 08:44
المحور: كتابات ساخرة
    

سبع صنايع و البخت ...... كاعد


هوه مهندس و ضابط و محامي و محاسب و يمكن طبيب وياها , لا عبالكم دا احجي عله ابو حقي لا لا و الف لا , عدنا نموذج حي لكل هاي الصفات و الشهادات موجود بالحكومه , غير اسمه ( لان اسمه فاول ) و لعب جوله و البيت اظلم و تايهه و دليلها اعمى.
انه المبجل المقدام المناضل الطبيب المهندس المحامي الطيار المحاسب و فد الف و خميسمية شهاده من الجاره الشقيقه
انه ابو الحروف .... العفو بيان جبر صولاغ
اول ما طبو الشباب من الجاره الشقيقه العريقه ايران , جابوه و كالوا مهندس من الطراز الاول و خريج بغداد مدري يا سنه , اني هم من كل عقلي رحت للنقابه ادور عله اسمه , بهاي الاثناء خلوه وزير للاسكان و التعمير , و بعدني اني ادور و الناتج ؟؟؟؟؟ اسمه ما موجود بسجلات النقابه مع كل الاحتمالات باقر , بيان , صولاغ , الزبيدي كتلت روحي و الناتج صفر باليد حصان.
لمن صار صولاغ وزير للاسكان طلعوه بالتلفزيون كاشخ و لا بس قاط بس و هنا مشكله ما لابس رباط !!!! حزروا هاي منين . ابو سبع صنايع كال بهذا اللقاء نحن في طور بناء 250 الف وحده سكنيه !!! الصراحه اني صفنت و كلت يا الله انحلت مشكله السكن , بس عبر علاقتي سالت و استفسرت و طلعت 250 !! بدون ال الف يعني صاحبنه مطير 3 صفاره ؟؟ هذا شلون مهندس الي ميعرف انه الصفر عله اليمنه اله مفعول جبير ؟؟؟ ميخالف غلس الوحدات السكنيه ال250 الي انبنت فوك سبع ابكار توزعت للساده المناضلين من المجلس الاعلى و بدر . هاي انجازاته في مجال الاسكان و التعمير.
كاموا كالو يابه تره ابو الحروف ضابط عتيك و دفعته صاروا الويه و قادة فرق بس هوه جان نايم بقم المقدسه يقره القراءة الخلدونيه و دار و دور. جابوه خلوه بوزاره الداخليه و طبعا هوه بخبرته العاليه كدر يرفد الوزاره باحدث انواع التعذيب و الات نزع الاعترافات و كراسي دواره و كراسي ابو الزنجيل و ابو الحبل و كل الانواع من باب يفيد الوطن و الشعب لضبط الامن و الامان عن طريق سياسه دريل و درنفيس ( مو كتلكم مهندس اكيد يعرف شيسوي بالدرنفيس ). و ابتكر ايضا طرق جديدة لابعاد تاثيرات الموت عن الشعب , و كال احسن شي نشمرهم بالشط و محد يلكاهم حته لا يفزون العالم من يشوفون جثث مقطوعه الراس لو مزرفه بدريلات او مرات حته مشرحه لاسباب طبيه ( مو هوه طبيب هاي نسيناها ), و طبعا خبرته الطبيه ما قصر بيهه هم ترس الطب العدلي بانواع الجثث ( يابه تره ابو الحروف متعدد المواهب يعني 3 في 1 شامبو و مكيف شعر). و ما اضم عليكم كدر و بخبراته القانونيه كمحامي انه يخرط كل الميليشيات ضمن قوات الامن العراقيه و عله كوله السفير الامريكي خليل زاده ( 90 بالميه من قوات الامن العراقيه ما يزالون يرتدون ملابس بدر تحت ملابسهم العسكريه ) ها معروفه يعني ولو عليهه تكتم اعلامي .
وصلنه يم حكومه المالكي و ما اعرف شنو فلمهم ويه ابو الحروف ؟ هيجي ماعدهم غيره ؟؟ شنو طماطه بكل جدر يرهم ؟ شالوا و خلوا حطوه وزير الماليه . يعني من وزارة قطع الاعناق الى وزارة قطع الارزاق, ة كذلك لعب جوله و البيت اظلم, اول مقابله وياه كال احنه بصدد نشيل 3 اصفار من الدينار العراقي !! مثل ال3 اصفار الي شالهه من عدد الوحدات السكنيه , زين انت يا ابو الحروف بامكانياتك العلميه (ولو برأيي انت مجلتي و مزمار ما قاري ) ما فكرت انه نفس الشي ؟ يعني يبقه كلشي نفس سعره ؟؟ شنو بس تغير الطبعه ؟؟ و بيهه خمط فلوس للصبح هاي اكيده.
كال الميزانيه مدري جم مليار و الرواتب حنصعدهه , صعدهه شهر و علك السوك و المكرود الموظف ما لحك يتهنه و ابو الحروف رد نزل الرواتب , و كل ما واحد يحجي وياه يكله والله صندوق النقد الدولي و الدول المانحه متقبل نصعد الرواتب ! ليش انت تشتغل يم صندوق النقد الدولي ؟؟ لو خالاتك يشتغلن عند الدول المانحه ؟ مو بلدك و شعبك ؟
شنو فايده الحجي و انت من جماعه القوي الامين الي ما اعرف عله منو قوي و عله شنو امين
بالمناسبه ابو الحروف لليوم يحتفظ بجنسيته الايرانيه الي نص الدستور عله انه كل مسؤول عراقي لا يسمح له بحمل اكثر من جنسيه و هاي موضوع ثاني نسولف بيه غير وكت لان طكت مرارتي و محد يسمع
تحياتي

#عمر_ابراهيم_الجنابي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات