انتخبوا اديداس

عمر ابراهيم الجنابي

الحوار المتمدن-العدد: 2432 - 2008 / 10 / 12 - 05:11
المحور: كتابات ساخرة
    

اليوم راح احجيلكم قصة, ولو مو مثل قصة ليلى و الذئب بس هم حلوه مثلهه
بعد اليوم المشؤوم 9 -4 – 2003 الي ما اريد اسميه احتلال لا يزعلون جماعه و ما اريد اسميه تحرير يزعلون غير جماعه راح اسميه احداث , تدرون هوه حدث يعني جوه ال 18
اجانه وره الحدث مستر كارنر و كعد يم منو ؟؟ احزروا ؟؟؟؟ يلا ما اريدكم تدوخون اني اجاوب .
كعد ببيت سعد عاصم الجنابي ابو التجمع الجمهوري العراقي باليرموك و لمن الكونكرس و الدفاع كالوله روح اكعد بالقصر
كال الرجال و من باب التواضع لا عمي القصر الجمهوري علامه من علامات سياده البلد و بهاي الحاله راح نهينهم و حيضوجون و تبدي الجلاليق من حيث تدري و لا تدري .
قبل عمو كارنر جتنه خاله برباره و الي غنولهه الخوان بمدينه الصدر الهوسه المشهوره ومن الداخل للكياره كلنا نريدج يا برباره !!!!!!!!!!!!!!!!!!
بس برباره اول سؤال سألته كالت شكد صفه العراق ؟؟ يعني التعداد ؟؟ كالولهه بعده 25 مليون
كالت المره الله يستر عليهه 25 مليون يبو عله راسي اني عبالي ما بقه غير 5 ملايين !!! اشو وره يومين طلعت راسهه من الشباك مال السمتيه جان تشوف العالم لابسه الهدوم الخامطيهه من مخازن الاولمبيه و الدريسات و و شايلين اعلام و يبجون و يلطمون .
سالتهم كالت شكو هاي ؟؟ كالوله يابه الجماعه عدهم ميت و حزنانين . عادي ماكو مشكله بس منو الميت و شنو مات بالحرب ويه امريكا ؟؟؟ كالوله يابه ترا ديلطمون عله الحسين سلام الله عليه و اليوم الاربعين و مات قبل الف و اربعميه سنه !!! برباره صفنت و ما دوخت روحهه كالت شعندي هيه مال بطولات هاي استقالتي بعد 3 ايام من تنصيبي حاكم عله العراق , ما اريد بطلت . و اختفت برباره من الساحه العراقيه و خيبت امال شباب الداخل و الكياره الديمقراطيين الي جان كل املهم انه امرأة توصل لكرسي الحكم بالعراق من باب انه يحبون المساواة.
نرجع لعمو كارنر , عمو كارنر كال احسن شي نسويه نكون وزاره و عود بعدين نفكر منو رئيس وزراء و منو رئيس الجمهوريه حته نمشي شغل العالم
كال نسوي انتخابات تبدي باصغر موظف و ينتخبون مدرائهم و لمن نوصل يصير عدنه 4 وكلاء وزراء و بيناتهم ينتخبون الوزير الي راح يكون من داخل الوزاره و راح يكون تكنو قراط مو تكنو ض..... مثل هسه
وراها راح تتشكل وزاره من ناس يفتهمون و عود نفكر نجيب رئيس وزراء و طبعا رئيس الوزراء مركز سياسي مو اداري
الشباب الي قشمروهم و كالوا لكل واحد منهم انت الريس و خلوهم عله الحروف الابجديه بجاه مولانه بريمر من حرف الالف و يبدي باحمد الجلبي و لاخر شريف لاصق بيهم , ضاجو و زعلو و عنفصوا لمن امريكا جابت بريمر
و بدت المشاكل
هذا الحجي كله الي حجيته ما طول 4 شهور
زين شباب الابجديه ليش مرادوا كارنر ؟؟؟؟؟ تتصورون امريكا الي خلت كارنر بالبدايه ما عده اجنده مسبقه ويه كارنر ؟؟؟
بس امريكا هم عدها حق !!!! شلون ؟؟؟ اجاوبك يا الي سألت
كالت خلي امشي براحه هل جم مضرب لمن يعرف العراق منو الادمي , بس المشكله العراقيين ما اتعضوا
الي راح انتخب و كل عقله اذا ما انتخب القائمه XXXL راح تحرم مرته عليه !!! واللاخ كالوله اذا ما تنتخب قائمه Adidas الله يذبك بالزبل
متفرق اديداس لو نايك لو حته جلود كله قنادر حشه السامع و القاري بس الفرق انه هاي القندره شوكت تنشك و تنذب بالزبل
الشارع العراقي هسه اكثر وعي من قبل اسبوع , صح ابو اسراء الله ينطيه العافيه و مو يوميه يتمرض و يروح يقيس الضغط بلندن ويرجع عله ابو حسيت بدوخه !! مولاي اخاف حامل ؟؟ اي نرجع ابو اسراء حقق انجازات قويه و الوضع مستقر اكثر و لو مستقر بهشاشه يعني بلحظه يتفلش كلشي بس احسن من الماكو.
الناس تكول لا والله المالكي خوش ! اي خوش بس شوفو اللعب بايد منو
بس نرجع و نكول من راح تنتخبون المره الجايه المن تنتخبون ؟؟؟ و مجالس المحافظات المن تنتخبون ؟؟ هم قائمه جلود و لو التابع لباتا لو منو ؟؟؟
ميخالف انتخبو نايك و اديداس و اسيكس خوش ماركات المهم مينشك بسرعه و يصير دسبوزبل
نصيحه من اخوكم ؟؟ انتخبوا ecco صدكوني ما تندمون لان ويه العمر و ميكول اخ حته لو تجفص بيه بنص بطن مقتدى و الضاري.

#عمر_ابراهيم_الجنابي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات