ارحل بقى

أحمد فؤاد نجم

الحوار المتمدن-العدد: 2392 - 2008 / 9 / 2 - 09:07
المحور: الادب والفن
    

أظن أفصح من كدة نصيحة يبقى عيب
بحبك يا ريس
وحبك يا ريس
معكنن عليـــــة
مقطعلى قلبى
مطلع عنيــــة
سيبونى فى حالى
وبيا اللى بيـــــــة
دا كل اللى لية
محرم عليـــــة
عشان حاجة واحدة
عشــــــانك يا ريس
بحبــــــــــك يا ريس
دى كلمة قالوها زمان
من ســـــــــنين
وكل اللى قالها
مطـيـن بطـيـن
يا سارق فلوسنا
يا كاتم نفوسنا
يا واكل عرقنا
برجلك دايسنا
ولســـــه بحبك
واحب اللى حبك
وباحلف هاحبك
واحب اللى جابك
فى يوم اغبر علينا ريس
مبارك يا ريس
عليــــك البــــلد
لابنـــك وابنــــه
وولد الولد
سوزانك سوزانا
جمالك جمالنا
علائك علائنا
وبكرة وبعده
وطول الامد
غبــــاءك يا ريس
ملوش حل خالص
وسايق ف الهبل
وكلامك هجايص
ولولاك يا ريس
مكنشى دا حالى
وحال كل مصري
مدروخ ولايـص
قالوا العيشة حرة
وهي العيشة مرة
ومش مـــر عادي
دا صبرك يا ريس
ممرر بلادى
واسعار بترفع
مأتنزلش مرة
وباين علينا
هنطلع لبرة
رغيفك يا ريس
بيصغر ما يكبر
وسعره يا ريس
بيرفع ماينزل
سألنا دا ماله
قالولنا الحديد
وايه العلاقة
بسعره الجديد
تكونش يا ريس
لغيت الدقيق
وبتطحن بداله
برادة حديد؟

مهو انت اللى عارف
وسامع وشايف
جمالك قشــطنا
وعز اللى خاننا
وولـــع بلدنا
برفع الحديد

ماتصحى ياريس
وصحى البلد
هنبقى يا ريس
كمالة عدد
ف وسط العوالم
وشعبى اللى هايم
وكبته اللى دايم
وقرشه اللى عايم
هنبقى يا ريس
كمالة عدد
واقولك واعيدلك
لانى بحبك
نصيحة فصيحة
نصيحة مريحة
لبلدى وبلدك
ماترحل يا ريس
ليه دايما متيس
ودايما مهيس
مترحل بقى
وخد لي ف وشك
جمالك .. مش باغشك
علائك .. سوزانك
شريفك .. سرورك
نظيفك .. كمالك
وعزك .. دا خانك
خدهم وانصرفوا
أشـــتاتآ أشتوت
خدهم وانصرفوا
لحسن حانموت
ارحل بقى
ارحل بقى
مترحل بقى
29/8/2008

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل