( يابو شاكر )......... شعر شعبي ..كوميديا سوداء

احسان العيد

الحوار المتمدن-العدد: 2161 - 2008 / 1 / 15 - 09:18
المحور: الادب والفن
    

فشخصية( ابو شاكر) من وحي خيالي .. لكني اراه حقيقي يجالسني ويسمعني هو نخلتي التي اتسلقها وارتفع بها عن همومي ... اليكم هذه الدراما

( يابو شاكر )

الدنيه مسرح يابو شاكر
فرجه ماحاجه تذاكر

الدنيه مسرح بي فنون
عقل تمثيل وجنون
خلطه تخرجهه السنون
ومشكلتهه البث مباشر

الدنيه مسرح وابتسامه
طير بيهه كالحمامه
ولاتفكر بالدرامه
لان حتّه البطل حاير!!!

الدنيه مسرح بس تجاري
والصراع البي حضاري
منهو بيّه وبيك داري
نحترگ مثل الجكاير

الدنيه مسرح وبّلاش
ذاك مات وهذا عاش
الوكت مو للفراش
الوكت حيوان كاسر

الدنيه مسرح بَلَه باب
والدخول ابلا ثياب
ناصي لو عالي الجَناب
سوه تجمعنه المقابر

الدنيه مسرح يامواطن
زحمه مبيوعه الاماكن
الشرق بالغرب ساكن
والشرق للغرب سافر !!!

الدنيه مسرح يروي قصّه
حِكْمه.. عَلْوَه يَمْهَه نَصَّه
ننطي للتنور گرصه ؟؟؟
هاي مو حِكْمه يشاعر

الدنيه مسرح عَرض دائم
ولافصل من عدهه فاهم
بيهه بس ركضه الاوادم
والخبال البيه كافر

الدنيه مسرح خويه أگعد
والمشاهد بيهه تسعد
مو مهم منهو اللّي يصعد
المهم شايل ضماير ؟؟؟؟

الدنيه مسرح شِِكله يفتر
وين عبله وزمن عنتر
هل وكت ياساتر استر
من بشر بس سيف شاهر

الدنيه مسرح واسطوانه
ماكو شي نفس القوانه
اتگول چن راكب امانه
بالوحل طگ بيهه تاير

الدنيه مسرح خوش حفله
سهره يرّادلهه بدله
والورد بالياخه شكله
وللصبح رگص الخناجر!!

الدنيه مسرح بيه فرفش
مثل ببسي ابصيف ينعش
صح مشاهد حلوه بالدش
بس طبيعي احله المناظر!!

الدنيه مسرح بي اغاني
طرب بس مو لوّلاني
ماكو حل تلفت اذاني
المشتكه الكاظم الساهر

الديه مسرح هاذه يكفي
اتريد امامي اتريد خلفي
وكت مجبل وكت مجفي
ياحلو هاي الاوامر!!

الدنيه مسرح ياحبيبي
علّتي هيَّه وطبيبي
وهيّه شاتي وهيّه ذيبي
ولو رِدِت أملي الدفاتر

الدنيه مسرح كلّه روعه
ويومك ابلا أمر نوعه
ساعه ضحكه وساعه دمعه
واترك الكاسيت داير

الدنيه مسرح انظر انظر
هوه بس واحد المنظر
جيب شرطي واخذ مَحظر
والشغل شاشه ومحابر

الدنيه مسرح واجمل اجمل
لوگلت موسوعه اكمل
واعمل اعمل اعمل اعمل
والعقل تاليهه طافر

الدنيه مسرح يابه يابه
ظلمه واسهل درب غابه
سين.. من يعرف جوابه
واليحلّه اعتبره شاطر

الدنيه مسرح خوش مسرح
والقطيع الوحده يسرح!!
ياكليله ودمنه ششرح
بعد شتفيد الأشاير

الدنيه مسرح ياجميل
وردس اردس خويه حيل
انته لوبالك طويل
ماگضيت العمر خاسر

الدنيه مسرح هيه هيچ
انتِظر بيضة الديچ
كونك اطويّب رچيج
البخت وياك باير

الدنيه مسرح وشحلاتك
عدل بس شالَوْ رفاتك!!
والقطار اسنين فاتك
هسّه تتوسل الناظر؟؟؟

الدنيه مسرح اعرفلهه
ولاتنوخ ارفع حِمِلهه
ولو جفت وياك خَلْهه
وشوف لوما أجت باچر

الدنيه مسرح شوف كبره
اسمع انظر شيل عِبره
والنهر لو ضاگ طفره
مثل گالوه الاكابر

الدنيه مسرح ياسلام
ولاتخدعك بالكلام
تچذب اضغاث الأحلام
هم شفتلك فيل طاير؟؟

الدنيه مسرح لايفوتك
رقمك ابهل كون صوتك
لاتْگل واحد امروتك
انته ابن ديوان عامر

الدنيه مسرح ياصديقي
صير مثلي يارفيقي
بالألم حافر طريقي
وكل جزء من عندي صابر

الدنيه مسرح يلّه امشي
ونته عيني وطرف رمشي
صاحبي ويفداك كلشي
وظهري الك وصعد مناير

الدنيه مسرح وانتهينه
ولاتصيح ابصوت وينه
ماكو نوح ايجر سفينه
والوكت طوفان ثاير

ايبين هنا ابو شاكر( داخ ) فقال لي بلهجة
الساخر المتمرد وبذلك انهى استرسالي:-

الدنيه مسرح من زمان
دَخْنَه ياسَيّد احسان
چاي صبلي ابأستكان
وراس قوري وموش فاير


والدنيه مسرح يابو شاكر
فرجه ماحاجه التذاكر

احسان .......

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل