إصحوا

نادية المفتى

الحوار المتمدن-العدد: 2054 - 2007 / 9 / 30 - 06:12
المحور: الادب والفن
    

إلى كل شعوب العالم
إصحوا

الحق ضايع و الناس نيام
و ايام تفوت وراها ايام
يتبت الشر فى الأرض الإيدين
يطرد الصدق من قلوبنا
و يسيبنا عايشين
رايحين جايين
بس مجوفين
نحب
بس حب الكره منه أشرف
مع أول لسعة كرباج بنجرى
و نسيب دم إخواتنا ينزف
و أول ما نلاقى شق يدارينا
نعد نطنطن
دم إخواتنا مش حيروح هدر
و الله لنورى المعتدين العبر
خمسة
و بعدها نتمتم
حب الغير
ده الصلح خير
و خمسة كمان و نغنى
يا و طن
بنحبك يا وطنطن
يا رئيسنا يا همام
يا حبيبنا
يا ناهب جيوبنا
كل شىء آخر تمام
نركع, نسجد, ننضرب حتى الممات
بس المهم
ناكل لقمتنا بسكات
و سكاتنا
خللى لقمتنا
متغمسة بدم إخواتنا آه
ما يقدر ع القدرة إلا الإله
دول عالم وحوش
دول عام كروش
دول يبلعوا عالم بزيه
فى ثانية
ما يبانله أتر
دول يدفنوا الواحد فى قمقم و يسدوا على حنكه بحجر
خللينا ساكتين
خللينا نربى العيال
يقوم منهم شوية شباب جدعان
فتيات مع فتيان
يصرخوا
أعطنى حريتى أطلق يديا
هوه إللى انتوا بتعملوه فى البلد دى شوية
طلقتين رصاص و كام واحد يعتقل
ترجع ريما هى هى و العلل نفس العلل
و برضه ساكتين
و برضه بنربى العيال
طب و لإيه المآل؟
و هما فين دول العيال؟
ما خدوهم
صادروهم زى حتة حشيش
بكره فى ساعة حظ يحرقوها و تختفى
تبقى نفسين فى صدر واحد
إن كان وزير و للا حتى شاويش
بكره حتى الضنا يبقى م الممنوعات
ماهوه ده يا عالم آخر السكات
هى كلمة
يا ساكت عن دم أخوك بكره الدم يبقى دمك
و دم أبوك و أمك
و مراتك
و بنتك
عرضهم بتبيعه بسكاتك
إشترى عرض بناتك
إشتريه و لو حتى بمماتك
إنطق، إصرخ، إنتصر لحقك
إكسر الإيد إللى فى يوم إتجرأت
و فردت كرباج القهر فوق ضهرك
إكسر الطوق
بص لفوق
للسما
هوه إله واحد
ع المفترى و الساكت
ما تعبدش غيره
و لغيره ما تعمل أهمية
يا عالم
هوه فى إيه فى الدنيا أجمل من الحرية.

نادية المفتى
2002

#نادية_المفتى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل