العصفورة ام ودن كبيرة جتني وقالت

جورج المصري

الحوار المتمدن-العدد: 2039 - 2007 / 9 / 15 - 05:25
المحور: اليسار , الديمقراطية والعلمانية في مصر والسودان
    

العصفورة الشاطرة بتطير وتقف علي كتف كل غفير و في الزنقة تلزق حتى تندق علي قوره الوزير. وتسمع اللي بيقوله الديكتاتور الكبير وولي عهدة الصغير.
همست العصفورة بصوت مبحوح وقالت الحق يا جورج مش انا عرفت مين اللي مدوخ مصر من أولها لأخرها ومخلي عيشتنا هبابي في هباب ؟

قلت يا فتاح يا عليم يا رزاق يا كريم قولي يا ست عصفورة هانم. أصلك ما تقدري تسكتي إحنا بنفكر انك بتصاصي و في الحقيقة بتحكي عن اللي بياخد مننا ألقصاصي.
قال إيه يا جورج الباشا مهتم بشؤون العالم الخارجي وقاعد في قصر شرم الشيخ يتابع إحداث العالم ويخطط ويرسم أزاي الكرة الأرضية تلف بالعكس علشان القيامة تقوم، و الشمس تغرب في الشرق وتشرق من الغرب. فقلت لها لا قولي كلام غير ده هو أنتي فكراني لسع صعيدي عاد ولا حتى فلاح. قالت لا يا جورج لا كده ولا أكده.

قلت هاتي من الأخر وقولي يا ست عصفورة حكايتك الجديدة النهاردة أيه؟

قالت علي بلاطة جيمي هو الدكتاتور الجديد اللي لا وقف في طابور عيش ولا ركب مترو ولا أتوبيس ولا من جمعية اخذ التموين ولا شال كيس يجيب فيه سكر ولا كيس يجيب فيه رز ولا زجاجة فارغة يملاها زيت. و شرب شاي التموين أنما علي الايرل جراي من لندن اتربي و التوست و اتربي علي ألزبده و المربي و اللبن في الزجاجات اللي بغطي أزرق واحمر وابيض أتغذي.

اهه يا عيني عاش عيشة الملوك في بيت تيته وجدو وأنكل الإنجليز و..اهه يا سيدي هو الحاكم بأمر الله ويمشي بتمخطر يأمر وينهي ويشيل ويحط في البلد و اللي مش عاجبه يبعت له كام ولد ومن سريرة يجيبوه وفي مباحث أمن الدولة حاشيته يعشوه و في الصبح يفطروا بيه وفي الغذاء يمرمطوه ويضربوه علي قفاه بعد 10 ، 15 ، 20، 30 أو 50 يوم يمشوه ولو قال لهم بم علي العنبوكه يودوه وكام تهمة كده ولا كده يشيلوه ومع الصيع يرموه في ليمان طره أو علي المزرعة يفسحوه.
بركاتك يا دكتاتور يا صغير طلع الغلابة المقبوض عليهم وسيبك من لعبة التوازنات أحنا بتوعك يا ريسنا و بنقول أه من دلوقت وفرحانين بدكتاتورنا الجديد. عيب يا جيمي متردنيش و أنا من زمان واخذ بالي منك ومهنيك ومابقولش فيك ألا كل خير. يا ريسنا يا دكتاتورنا يا عريس الله يفرجها عليك بعتريس ولي عرشك بعد عمرا طويل و عاشت دولتنا ويحميها من العصافير المؤذية اللي بتطير و بتتكلم كلام كثير و كبير. ويصونك من العين يا أبن الدكتاتور ويخليك علينا دكتاتور لا تحوق فيك دعوة مظلوم ولا عمل ولا حجاب و ما يحوجك و العياز بالله لدكتور للخلف يا ديكتاتور.

#جورج_المصري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل