البصره تستغيث

ميسون نعيم الرومي

الحوار المتمدن-العدد: 5982 - 2018 / 9 / 2 - 19:35
المحور: الادب والفن
    

البصـره تــستغيث
ميسون نعيم الرومي
البصره تِنادي .. ياشعب – اعلنهه ياثورة .. غضب
ساند شباب المعتصم
حاسب حرامي والظلم
والحـَگهم ابذاك الصنم
تاريخچ البصره عـِـلم
اهلچ اسباع .. الكل زلم
مسموم نهرچ .. ماسلم
اطفالچ ازبـالـَه تـِـلـِم
امراض واشكال الورم
تتصدق اعلينه الأمم
يابصره شعبچ هالتعب – جوع اومهانه وي رعب
انهض يشعبي وانتفض – البصره يحميهه شــعب
زلم اونـِـسـَه اوحتى الرطب
البصره تِنادي .. ياشعب
***
بصره اوتطوف اعله النفط – عطشانه واتعاني قحط
حـِـرگوْ نخلهـَه والزرع
صبخه صفت گاعچ ملح
ايران كوشـَـت عَ النبع
ايران تبزل بالأرض
واوصاخهه اتدزهه جمع
اربع اشهور ابلا حكم
ايران وزعت بالرتب
رادو تظل جايع تظل
يعراقي اطرد هالغـرب
بصره اوتنادي ياشعب - اعلنهه ياثورة .. غضب
***
البصره مفجوعه اصبحت – البصره ثوره اومـَـنطفت
العنف مردوده عنف
يا(عنف ثوري) الماهفت
قوَّه الشعب من يتحد
صوته يزلزل من يهد
اعروشهم كرس فقط
اقضي عليه اولا ترد
وزعوْ ملايين اشكثِـر
عــشرين مليار العـدد
نواب إكـْـلـَـوْ خـبـزتـك
عَـمـَّـوْ على هـذا البـلـَـد
لا تِـرضه أبـْداً يا شهم - وانقذ الشعب المعـــتصم
احـذر تضيـِّـع فـُـرصِتـَـك – تاريخك اوبـيه انكتب
اليرضه بالذل ينسحگ – تِـقـبـَـل ابـْعرضَك يِـنّهـِب؟
البصره تِنادي .. ياشعب – اعلنهه ياثورة .. غضبْ
يا شعب انهض يا شعب
--------------------------------------------------------------
1 / أيلول / 2018
ســــــــــــــــتوكهولم

#ميسون_نعيم_الرومي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات