عمي يابو داود خذني خذني وياك

سعيد بطران

الحوار المتمدن-العدد: 1708 - 2006 / 10 / 19 - 06:58
المحور: كتابات ساخرة
    

عمي حميد بعد جبدي جبدك هاي سالفة التصويت على قانون الاقاليم سالفه ما ينلبس عليها لباس والحر الرياحي خزيتنا وحنا جماعتك ولو من بعيد لبعيد ، كبل سنين طلع علينه المغفور له ( ابو سعود ) بسالفة الجبهة الوطنية التقدمية مع البعثيين الوالغين بدمنا ، الشهيد هندال اللي كان واحد من ضحايا هتحالف المشؤوم جان يكول النا " احنا ما جنا نعرف غير البرجوازية والطبقة العاملة انتو المثقفين جبتولنه سالفة الديمقراطيين الثوريين "، وراح بيها ابو عيدان مثل ما راحوا الجثيرين ، وجنا بعدنا شباب كلنا ميخالف لجن القيادة مجربه ، لكن هالجبهة طلعت علينا زقوم ، والقيادة المعصومه اول ما شلعت وتركت اولاد المكبعة يواجهون مصيرهم النضالي والمكتب السياسي يصدر من الخارج توجيهات للمعتقلين بالصمود وصون لقب الشيوعي حتى الاستشهاد ، وانت عمي واحد من الذين شلعو بروحهم العزيزه وما ألومك، صحيح انت ما جنت عضو مكتب سياسي لكن واحد من قيادة الحزب ومسؤول منطقية بغداد ، وبعد هالسنين الطويلة اللي ضاع بيها الجمل بما حمل اجتنا امريكا يقودها بوش قلب الاسد والصاروخ بيده اليمنة والديمقراطية والخير والخماجير بلجيب الوراني ، ورجعت انت ومن تبقى من الحزب هبوطا من جبل شقلاوه ، وكلنا يلله الفات مات هسه حزب فهد راح يجمع حوله كل الديمقراطيين والوطنيين ويناضل بكل وضوح وصراحه لاخراج المحتلين ويشعلها نار كبره على الامبرياليه واولاد جيفرسون ، لكن يا حسافه ويا فرحه الماتمت ، دخلت انت والجماعه بمجلس الحكم لصاحبه عبود بريمر ، وخليتنا ندك جف بجف ونتذكر سالفة المزبن وايام اللف ، ورحنا انبحوش بتراث الخال ماركس والعم لينين ندور على مقوله او قانون موضوعي او ديالكتيك مادي او حتى مثالي يكول يمكن لحزب شيوعي كضه عمره يرفع شعار وطن حر وشعب سعيد يقبل الدخول بسلطة الاحتلال ، لكن ماركس ولينين طردونا وكالو ما تلكون عدنا هيج خرط ، رحنا لعمنا فهد سألناه شتكوول بسالفة ابو داوود كال عمي ولو عن وجهي جا انتو ما تعرفون انا وطني قبل ما اكون شيوعي ، لعد ليش شنقني أبو صباح ، كلنا يا جماعه خلي انروح نسأل واحد معاصر للعولمه ، رحنا نسأل الغبي غورباشوف ، ضحك علينا وكال يا تفارشي صحيح آنه غبي وضحكت عليه امريكا بس انه متحسف لليوم على تفكك الاتحاد السوفيتي كد شعر صلعتي وانا ارفض الاستعمار العولمي الجديد . احترنا بهلابداع اللي اجانا بيه ابو داوودنه ، وكلنا يمكن الهام رباني والله يهب ما يشاء لمن يشاء ، سكتنا وكلنا خلي نشوف تاليها ، ما سكت ابو داودنه اشو راح مره يتشرف ان يكون من المذهب الفلاني ، ومره يرجع لسالفة الجبهات اللي شكت بطونا شك ، وي كلمن عنده جبهه معروضه للبيع ، القائمه العراقيه ، مرام ، ومع هذا صبرنا وكلنا هم مقبوله ما دام جماعة علاوي علمانيين مو طائفيين ، واخيرا طلع علينا ابو داودنه بمشروع برنامج ونظام داخلي لاله راس ماركسي ولا ذيل لينيني بحجة الديمقراطيه والتجديد وهاي حجاية غورباتشوف يوم راد يكلب لوي وينزع عن حزبه وحزب الخلفوه لباسه الداخلي ، وباسم الديمقراطيه والتجديد ينزع ابو داودنه الحزب من كل ملابسه قطعه قطعة حتى يتعرى الحزب ويلائم الموضه العالميه والحياة الامريكية ، بس المصيبه مو بالتعري من ملابس ماركس وانجلس ولينين وفهد وسلام عادل ، بس ياجماعه المصيبه الملابس الجديده اللي يريد ابو داوودنه هو ومفيدنه ولبانه تلبيسها للحزب بسم التوافق والمشاعر الجياشه على سيد الشهداء ابا عبد الله الحسين، حتى تضبط الجبهة الجديده مع سيدنا حكيمي عزيزي ، فمن بين كل الناس الخايفه على وطنها من العثه واللي تريد تسويلها اماره ، صوت ابو داوودنه ومفيدنه على قانون الاقاليم التقدمي والسير يدا بيد صوب الاشتراكية اللي دستورها مقتل ابي مخنف ورايتها العصابه السوده وشعارها القامه ، وهنا طلع علينه ابو داودنه يشرح النا احنا المساكين الاغبياء اللي ما نعرف من الديالكتيك غير الكشور ليش صوت على هل قانون حتى يتحقق شعارنا يا عمال العالم اتحدوا في اقاليم قومية وطائفيه لتحقيق وطن حر وشعب سعيد . وانتفض على قناة الشرجيه وزمان ابو القماش وطالب بسدها بجيير اسود تعبيرا عن الديمقراطيه والتجديد لابو داودنه . لكن بوش دبليو سي ما جذب خبر فبعد ما تورط ابو داوودنه ولطخه لطخه سوده بوجه حزب الابطال ، طلع امس من واشنطن دي سي ، يكول لابو داوود منو اكثر وطنيه وحب للميسوبوتوميا وللجد نارام سين انت لو آني ، فانا ارفض تقسيم العراق الى ثلاثة اقاليم حتى لا تتخربط علينه حسابات النفط ،جاوبه صدام من قفص الدجاج ، عفيه بوش سلم لي على اهلك ، بس ما ادري يستفيد ابو داوودنه من هل الكبوه ويجر كير ويروح لليسار مو لليمين ويطلع من برطمان العفو برلمان القندرجي محمود ويقود الناس عيني عينك لاخراج الاحتلال وكنس الحثاله والزباله والعثه من وطن المآثر والوثبات والتضحيات ، شيلوها من بالكم مع الاسف ، وترحموا على روح ابو كاطع اللي لو جان موجود اليوم جان بلع ابو داودنه ومفيدنه وشرب عليهم جاي حامض .

#سعيد_بطران (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات