حمامات همايونية

جورج سامى

الحوار المتمدن-العدد: 1549 - 2006 / 5 / 13 - 10:52
المحور: القومية , المسالة القومية , حقوق الاقليات و حق تقرير المصير
    

من قيمة كام يوم نفسى هفتنى أنى أروح الكنيسة بتاعتنا أصل بينى وبينكم بقالى فترة كبيرة مقاطع الكنيسة زى الأنتخابات بالضبط أصلى زهقت من كل حاجة. المهم رحت الكنيسة لقيتها زى ماهى مفيش حاجة اتغيرت فيها قلت ياواد روح اقف مع معارفك وفجأة وأنا واقف معاهم حسيت أنى عايز أدخل الحمام ( لامؤاخذه) المهم رحت الحمام بسرعة وأنا داخل اتفجئت بالوضع الصعب قوى للحمامات - الحمامات متكسرة وكأنها أنقاض- بينى وبينكم اتنكد قوى وقلت لغاية امتى المسئولين فى الكنيسة ولجانها هيفضلوا مهملين كده . المهم اتشجعت واخذت قرار أكلم أى مسئول.
رحت أكلم أول مسئول قابلنى قالى نعمل ايه يا ابنى السبب هو الخط الهمايونى!!! ومشى وسابنى، قابلت مسئول تانى قالى كله من الخط الهمايونى وبرضه مشى وسابنى!!! جيت أكلم كاهن( قسيس ) الكنيسة قالى يا حبيبى العيب مش فينا العيب فى الخط الهمايونى وحاولت أعرف منه حكاية الخط ده قالى أنا ورايا أجتماع!!!
أتغظت قوى وقلت ياواد أعتمد على نفسك روحت النت وكتبت كلمة الخط الهمايونى وعملت سيرش وياريتنى ماعملت.
أتفجئت أن الخط الهمايونى ده هو ( مرسوم عثمانى صادر من السلطان عبد المجيد خان فى 18 فبراير 1856) "خدوا بالكم من التاريخ" أهم حاجة فى القرار ده أنه بيقول أن لا تعطى رخصة بأى كنيسة أو دير أوحتى مدفن أو إصلاح أو ترميم أى شئ داخل الكنائس إلا بموافقة السلطان شخصياً وبترخيص منه!!!
من هنا عرفت وأبتديت أفهم أحوال دورات المياة فى كنايسنا عاملة كده ليه مش بس دورات المياة لكن كل المبانى داخل الكنيسة فى حالة يرثى لها، لكن اللى غظنى وفقع مرارتى- دا طبعا غير الأمراض اللى عندى من الأكل المسرطن والمية الملوثة- وطبعاً لو أكل مسرطن ومية ملوثة "يبقى أنت أكيد أكيد فى مصر"(على رأى الأغنية)
أن القانون ده أصدره الأتراك مش المصريين وكمان بقاله حوالى 150سنه بس!!!
النقطة التانية ودى اللى جابتلى نقطة بجد أنى عرفت أن الكنيسة كل ما تحاول تبنى أى شئ أو ترمم مبنى أو تصلح أى طوبة تيجى تقول لرئيس الحى يقوم يرفع الأمر لرئيس مجلس المدينة ثم للمحافظ اللى يتكرم علينا ويقول بناءًعلى توجيهات السيد رئيس الجمهورية لازم قرار جمهورى.
يستضيفوا الريس فى التليفزيون ويكلموه عن النقطه دى يقول يا جماعة أحنا ممنعناش حد أنه يبنى- اللى عايز يبنى يبنى- بس لازم يأخذ موافقة الحى ورئيس مجلس المدينة التابع له.
والحقيقة أحنا محتارين ما بين توجيهات وتعليمات رئيس الجمهورية وبين رؤساء المدن والأحياء اللى برضه بيقولوا دى توجيهات سيادة الرئيس!!!
أنا عايز أعرف بالضبط أحنا دلوقت ماشيين بأى قانون؟ قانون عقيم ومكسح من 150 سنه أصدره الأتراك ولا ماشيين بقانون جديد هو المماطلة من رؤساء المدن والمحافظين بيسموه بناءً على توجيهات رئيس الجمهورية ولا ايه بالضبط.
يا مسئولين يا كبار عيب قوى كده عايزين نصلح الكنايس والحمامات والمبانى بتاعتنا، كمان عايزين نبنى كنائس جديدة من غير قرارات جمهورية هو أحنا رايحين نحارب ولا ايه علشان قرار جمهورى!!! وكمان لازم مرسوم الخط الهمايونى يتلغى ويكون فيه قانون يحكم ويحدد عمليات البناء الموحد لكل أماكن ودور العبادة فى مصر.
وبناءً على توجيهات السادة المسئولين كفاية كتابة فى الموضوع لحد كده ورسالتنا دى بنوصلها للريس وللمسئولين.

#جورج_سامى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل