الخفافيش فى الكواليس المصرية

تمارا سعد فهيم

الحوار المتمدن-العدد: 1368 - 2005 / 11 / 4 - 12:14
المحور: اليسار , الديمقراطية والعلمانية في مصر والسودان
    

هى الدنيا عمله كده ليه! هموم وأوجاع طيب ليه!! ونقول مالك يا بنى آدم نظراتك تايهة ليه؟ أدمنت الحزن ولا أيه؟!!، بتقول الأكتئاب والإحباط مغطينك ومن بر الشتاء حمينك! أنت بتقول أيه، كلامك غريب أوى كده ليه !!. وكمان بتقول فتنة ؟!هى وصلت لكده ولا أيه!! الموضوع مش كده خالص، أتحسبت غلط يا سعادة البيه!!. المصرى مايعرفش الفتنة، كل الحكاية أن المصرى إنسان عنده أوجاع وفى قلبه فوران و بيعانى من الفقر و الحرمان، والبطالة وقتل الأحلام.وعايزين بعد كده منه أيه؟.... يبتسم!!! طيب أدينى أمارة يا سعادة البيه؟! وطبيعى ولما تيجى شماعة فتنة نعلق بسرعة عليها أوجعنا يعنى أحنا متوقعين إيه؟!. انا مصرية بحب أخواتى المصريين و هما كمان بيحبونى وبيقفوا جمبى ويرفعونى، وما سألتش الأستاذ و الأستاذة ديانتهم ايه؟ دينك هو عملك ولا ايه؟!.
دي مش تعاليم الإسلام ولا تعاليم المسيحية، ده أسمه فوران فى النفس البشرية، نتج عنها إشاعة أسمها فتنة طائفية، والمصريين ما يعرفوش كلمة فتنه يعنى أيه؟! وأبعادها ممكن توصلنا لحد فين؟. كل الحكاية أن بذرة الحرمان ورحيل الأحلام نبتت ثمار وحصاده أوجاعهم فى الاسكندرية وقبلها فى الكاتدرائية!!
المصريين وصلوا لمرحلة انهم بيحلموا بأحلامهم ، و أمنو ان الطريق اتقفل قدامهم ومش هايشوفوا السعادة فى عيون أولادهم وبناتهم!. لازم ناخد بيدهم، ونساعدهم يتصالحوا على نفسهم، بعد أعتقالهم جوه سجن أفكارهم، ساعدوهم يرفعوا عن طموحاتهم حصارهم ، وبالإفراج عن المسجون آعلاه هاتعود له تانى الحياة، وطبعا ها ينسى آلامه وأكيد ها يحافظ على سلامة أحلامه ويطرد الفتنة من قاموس أيامه.
مصر لو ذاقوا طعمها ها يقبلوها بحلوها ومرها، المصرين فى شهر صوم وعلى مشارف العيد ومصاريف العيد، وشتاء ومصاريف كسوة الشتا ،و رأس سنة وعيد ميلاد، يعنى بشاير أيام فى السنة، بتقول للناس أفرحوا على الأقل بأمر من السما. ومع ذلك مش لاقين فرحتهم!! وكتمين فى قلوبهم حسرتهم. وفى الوقت المناسب ظهروا اللى خلف الستائر مترقبين ومنتظرين وقالوا "نحن هنا ما تغفلوش عننا". ومن الكواليس لعبوا بنقطة ضعف المصريين - ظروف وأزمات أقتصادية وسامحونى ديه نتيجة طبيعية حادثة تلقائية رد فعل مشاكلنا الإقتصادية!!. وبسرعة المساكين لقطوا الطعم ومسكوا فيه وقالوا ديه فتنة وياريت فاهمين أبعادها!. واتفرجنا على مسرحية مثيرة جدا للسخرية والأبطال هما المصريين خلوهم ممثلين لعبوهم زى العرائس و فى أيديهم الخيوط ماسكين.
وكلا يغنى على ليلاه، ودموع تفرش الضباب جواه، يبكى بيها على احتضار فرحته ومش عارف هو بيبكى على أيه؟ وبحجة الفتنة ينفجر الكبت جواه، ويصرخ ومش فاهم حتى بيصرخ ليه!!. محتاجين نعالج من الجذور نرسم أحلام تبصر النور، مش أوهام تولد الكبت فى الإنسان، وبعد الكبت والغليان لازم انفجار مش عايزة كلام و اتفرج على اللى حصل فى الإسكندرية واللى كان الكاتدرائية!!!. حزن مالوش حدود، لكن أكيد فيه طاقة نور كشفت لنا عن الخفافيش اللى عايشين فى الكواليس.
عارفين حل المشكلة ديه ايه، نتجاوزها وبلاش نعيد ونزيد كثير فيها و نبكى على اللبن المسكوب، محتاجين نعدى مرحلة اللى حصل واللى كان. محتاجين نتفوق عليهم و على أنفسنا وننادى عليهم ونقولهم "يا خفافيش الفتنة أصلها معاناة عندكم، وعقده جوه فكركم ، ياريت تعالجوا نفسكم، وأرحمونا مش فاضين لكم!.
ونركز فينا ونعرف الطريق ده نهايته لينا و علينا، نلملم أشلائنا بأيدينا عشان الوقت بيتسرق من حولينا، وناخد حظرنا ونعالج أفكارنا، ونواجه مشاكلنا ونعرف أخطارها وأبعادها ونستوعبها ويا نحلها يا نحللها. محتاجين نعرف نفسنا ونمسك مفاتيح فكرنا، ويا سلام لو عرفنا النهاية قبل البداية ساعتها مش هانكون تايهين، بالعكس هانكون عارفين رايحين على فين، مستقبلنا فجر بكره جديد، شروق لازم يكون له نور ويكون أبن أصول مش لاقيت مجهول الوالدين وآه من المجهولين

#تمارا_سعد_فهيم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل