عمل على ضهر جمل

محمد وجدي
كاتب، وشاعر، وباحث تاريخ
(Mohamed Wagdy)

الحوار المتمدن-العدد: 4669 - 2014 / 12 / 22 - 23:52
المحور: كتابات ساخرة
    

من ذكريات الطفولة المتشردة
كان عم وجدي الله يرحمه " بابا " بيصدق اوي بحكاية العفاريت والسحر والأعمال
ولو جيت تكلمه ف الموضوع دا وتناقشه تلاقيه بقدرة قادر اتحول من جزار بسيط لسلفي أصولي متعمق ويفحمك طبعاً بالحجة " تقدر تنكر ان السحر مذكور ف القران "
أو " تقدر تنكر ان النبي اتسحر ؟ "
وبما إن كتب السحر الهبلة كانت مالية الارصفة كنت بتفرج عليها
وعشان كدة قررت اعمل فصل ف بابا
كان عندي قلم حبر احمر
وجبت ورقة بيضا
وقعدت اعمل فيها مثلثات ودواير
وجواها اشكال عين وسهم وحاجات كدة
وبقيت اكتب كلام بالمقلوب كإنك بتشوفه في مراية
بس يا معلم
لفيت الورقة بعد ما الحبر نشف
وحطيتها في السلوفانة البلاستيك دي بتاعة السجاير
ولزقتها بالكبريت
ورميتها على باب محل بابا قبل ما يصحى
بسسسسسسسسسسسسسسس
جيت م المدرسة لقيت مجلس الامن منعقد
وبابا يصول ويجول
وقاعد يحلل تحليلاته السياسية تقولش هو محمد حسنين هيكل ف زمانه ، وكانت تحليلاته من نوعية :
1- أم علاء دي وجوزها عم سعيد اصلهم اقباط والسحر والأعمال مش بعيد عنهم . عاملين لنا عمل بوقف الحال .
2- فلان بيكرهنا وامبارح كان معدي وبيبص على عتبه المحل اوي وعدا كذا مرة . اه كان مستنينا نقفل عشان يرميها
وهكذا ....
تبرعت ماما كمان باقتراحاتها وافكارها
وناس جت عشان تتطوع وتشور على عم وجدي بمين يفك له العمل .
وانا بسأل بكل براءة :
هو فيه ايه يا بابا اللي حصل ؟؟؟؟؟؟؟
..........
ملحوظة :
بابا مات وماما ماتت ومحدش عرف لحد دلوقت ان انا اللي عملت العملة دي

#محمد_وجدي (هاشتاغ)       Mohamed_Wagdy#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات