بغني وسط العاصفة ب

خالد الصاوي

الحوار المتمدن-العدد: 1275 - 2005 / 8 / 3 - 09:50
المحور: كتابات ساخرة
    

أحمد يس

أحمد يس اللي عاجز؟ ولا حكومات العواجز؟؟
قتلوا القعيد المبارز ولبسنا طرحة هوان

مش طالبة حسبة ولماضة اركع لشمس الارادة
اهتف تعيش الانتفاضة غصبن عن الأمريكان



الفخ
ندهت عليه
وكان ضلي مسابقني..
سرقت ايديه
كتبت الشعر تاه مني عبير الخوف
جلال الوحدة والقدرة على التحريف
وصاحبني..
تسعتاشر سنة بكتب بيان الريح
واحاول أمسكه ويسيح
وأرشق راسي في الحيطة قوالب ثلج تتفتت
وآجي اكتب جواب للنار احس اني انطفت ناري
ولازم أحضن الشعلة عشان اكبر واحن اليه!



اطلع بقى
كل الطرق مبدورة طوب وموحلة
مبدورة طوب وموحلة
ومكحلة بلون الغضب ومعصّبة
متكحلة ومعصّبة
وحداد طويل
موسم عويل
وفصول بكا مترتبة
الحزن آخره فين بقى؟
سرداب شقا
وأوضة ضلما و ألف باب
حيطان وهوة وقطة سودا وألف سلم مكسورين
اطلع بقى برة البكا.. برة الأنين
اطلع بقى من كل شيء
اطلع بقى
اطلع بقى
كل الحاجات مش محتاجات الا الحريق
اطلع بقى
اطلع بقى من كل شيء
نفسك زفير الموت وريقك جف واتلف البدن جوة الكفن بدري وقالوا ما تيسر م الجناز والتعويذات
اطلع بقى
اطلع بقى من كل شيء
شفتك رموك جوة التابوت وكأنهم في المنور الموبوء بيرموا كيس ورق
اطلع بقى من كل شيء
حكيت بجسمك-جثتك كل الطوابق وانت نازل من جحيم لجحيم حياة
مالك بتبرق زي لحظة موت فريدة؟
وبتنتفض تحت الجريدة ليه بقى؟؟
اطلع بقى من كل شيء
اطلع بقى!
اطلع بقى!!

لحظة غضب يولدها جسمك م الحروق.. تطلع بنا
الكون عليك حق وحقيق
وماعادش الا رعشة الموت الأخيرة





"25/5"
لما يعني ببياداتكم تضربونا
وفي الشوارع تمزعوا هدوم البنات
ولا لما تنهقوا ف وش الحقيقة
وف لاظوغلي ولا غيره تعذبونا
ولا لما تصقفوله على خدودنا
فكركم يعني حنركع ع الركب؟!
ولا يبقى الدم واصل للركب؟؟
لا حيبقى الدم واصل للركب..
يالله خللي الدم يوصل للركب.




"31/7"
الخوف ده كلب ابن كلب زي الكلاب دكهه
ديتها تمسك حجر يجري لخربتها!
اديله كف اعدله ده اللي خرب بيتها..
انك آويته البعيد وقلت عندي عيال!

لما بيستأسدوا ويسفّخوك بالشوم
ويطلقوا ع البنات خنازير يا عيب الشوم
اعرف ساعتها انهم خايفين ليوم ما تقوم..
تكنس عاليها واطيها وتعدل الميال

الخوف ده دود الترب زي اللي ما اتسموا
شلّوا قليب الجبان وكلوه وما اتسموا
والمصل جوة الفؤاد يا خلق ما تسموا
خلق البغال يرفصوا وادالك الأحبال!

ماتخافش يوم من بشر وخصوصا البهوات
البدلة قمطة عليهم.. نصهم أغوات
ضايعين ما بين الأوامر يا عيني والباشوات
ديتها نطلعلهم طلبة على عمال 




عايز أعيش
عايز أعيش
مايحدنيش
شيء أو بشر
عايز أكون
أحيا بجنون
وأسيب أثر
عايز أنا
مليون سنة
سعي وسفر
عايز فضا
عايز بحور
عايز شجر
عايز طيور
عايز أحب بدون ما اخاف
عايز أحس بكل شيء
ألمس جميع الكائنات
وأصاحب الناس كلها
مايحدنيش
شيء أو بشر

عايز أعيش
مايحدنيش
عايز أكون
أحيا بجنون
مايحدنيش
شيء أو بشر
عايز أعيش
أسيب أثر
مايحدنيش
مليون سنة
سعي وسفر
عايز أعيش
عايز أكون
مايحدنيش
مليون سنة..

#خالد_الصاوي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل