المرأة الصيني والرجل الفامبير

ديما أحمد صالح

الحوار المتمدن-العدد: 3665 - 2012 / 3 / 12 - 02:24
المحور: كتابات ساخرة
    

الف الف مبروك للمرأة .. جد فرحتلكم من كل قلبي، اكيد كل وحدة فيكم بيوم هالعطلة رح تستجم اخر استجمام بين تنضيف البيت والطبخ والغسيل والولاد .واكيد مساكين الرجال رح يتعبو وهمي يدلعو فيكم، بعد ما يصحو الساعة 1 وياكلو ويقلبولكم البيت ويحضرو تلفزيون ويطلعو يقعدو بشي محل وفي منهم رح يحزنو على الصبايا اللي قاعدين هناك فيحاولو كنوع من الدعم لنفسية المرأة انو يتعرفو عليهم او يحاولو انو ياخدو رقم الموبايل ... حتى لو هالزلمي اد ابوكي فانتي لازم تقدري هالمبادرة الطيبة خخخخخ .

وزي ما تعودنا انو حماس وفتح مش قابلين يتصالحو فاكيد ابو مازن مش حيعطيكم ولا هدية السنة متل السنة الماضية ..لانو ما بقدر يقر اي قانون ... ومش لازم تزعلو لانو مش مهم حقوق المرأة المهم المصالحة زي ما كان قبلها المهم هو العودة والتحرر واعلان الدولة.. وبعدين المرأة في عندها وقت يعني اذا هي ما اخدت حقوقها بالوقت الحالي، مش مهم، بكرة بنتها او حفيدتها او ما تبقى من السلالة رح تحصل على حقوقها.. مش مهم المرأة جوزها يطلقها وقت ما بدو .. وهي اذا طلبت الطلاق لازم تتشحشط بالمحاكم..
مش مهم انو الوحدة جوزها يتجوز عليها لو طلعت ما بتخلف بينما هي عيب عليها وبتكون بلا اصل اذا طلبت الطلاق عشان نفسها تكون ام..
مش مهم اذا الوحدة بدها تتجوز وابوها ميت ، فممكن اخوها اللي عمرو 18 سنة انو هو يكون الولي اللي يجوزها..
مش مهم .. كل هاي تفاصيل تافهة ممكن الواحد يأجلها طول العمر

ايش ؟؟ شو بتحكو يا نساء؟ حقوق المرأة من حقوق الانسان؟؟ وحقوق الانسان لا تؤجل حتى في حالات الطواريء؟؟؟
اول مرة اعرف !!

بالنسبة لهدية المجتمع الك بيوم المرأة فهو اصرارو على التدخل بحياتك بكل تفصيل، فعمو الحارس بقدر يسالك وين رايحة ووين جاي.. مارق الطريق اذا شافك بالشارع لازم يعرف بنت مين انتي.. وشو بتعملي
الجيران لازم يديرو بالهم عليكي بانو يراقبوكي لانو انتي متل ما بحكو بتمثلي شرف العيلة وشرف البنت متل الزجاج سهل الكسر .. وشرف البنت متل عود الكبريت
خالتو وعمو لازم يسالوكي ليش لابسة هيك؟
وانتي مش لازم تزعلي.. لانو كل الناس بتخاف عليكي
ببساطة اي شي بتعلق بشرفك من مسؤولية كل المجتمع ..

وبعدين لازم تفهمي شي .. انتي ضعيفة ورقيقة وهشة .. انتي عمرك الافتراضي بخلص بسرعة لانو انتي صناعة صينية .. فلازم تلحقي حالك قبل ما توصلي ال 25 والا راحت عليكي..

ها !! مش سامعة شو بتحكي؟ الرجل؟؟
الرجل يا حبيبتي هو متل الفامبير
ال vampire ..

مش فاهمة علي !!!
يعني هو ابدي وما بموت يا حياتي
عشان هيك هو عمرو الافتراضي طويل وما حدا بحكيلو انو صار كبير ولازم يلحق حالو...

نعم !! مش فاهم عليكي !! علي صوتك؟ علي صوتك بالغنا .. لسة الأغاني ممكنة ممكنة ..

اها ... اذا في وحدة كانت حاملة شي تقيل وماشية بالشارع ببطل حدا يعرفها لانو فش فرق بين المرأة والرجل
واذا احتاجت مساعدة من اي نوع فلازم تدبر حالها لانو فش فرق بين المرأة والرجل
واذا طلعت بالباص وما لاقت محل، فلازم توقف متلها متل الرجل!!

اوففففف منكم يا نسوان شو بتنقوا !!

مش انتي بدك مساواة ؟؟ هاي انتي حصلتي على المساواة ولازم تفرحي وتحكي:

yopiiiiiiiiiiiiiiiiiiiiiiiiiiiiiiiiiiiiiiii

وبالنسبة لموضوع العمر الافتراضي .. ممكن ننهي تعاقدنا مع الشركة الصينية ونشوف شركة تانية تعطيكي عمر اطول... شو رايك بالمانيا؟ شو رايك بامريكا؟ او ممكن نطلب من الصين انو تحط مواد خام افضل وهيك بنزيد عمرك الافتراضي وبأسعار أقل

#ديما_أحمد_صالح (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل