نصوص غنائي (( اوبريتات ))

ضرغام العراقي

الحوار المتمدن-العدد: 2866 - 2009 / 12 / 23 - 15:01
المحور: الادب والفن
    

1

مهد الحضارات

تعالوا انحب بعضنه وننسه مافات
تعب حال الوطن من الخلافات

وحته اطفالنه تعيش وماتسأل بعد لــيش
شرط گول وفعل مو بس شعـــارات

وتعالوا انحب بعضنه انعيش خوان
عامل ويه كاسب ويه فنان
ونعمرالارض ونبني الانســان
وللعالم نظل مهد الحضارات

وتعالوا انحب بعضنه الأيد بالأيـــــد
نحطهه ياشعب ونگول شنريــــد

ونعوف الامس خل نبدي يوم جديد
من اجل الوطن ما عدنه غايات
فقط حب الوطن ما عدنه غايات


2


بغداد العشگ

بغداد العشگ صرتي ملكتي
ووحدچ للگلب صدگي ملكتي
شعري لو قبل غيرچ ملكتي
مثل شاعر فقد للشاعريه

عاشگ بس عشگ مثل المجانين ومدمن حيل حبهه صارالي اسنين
اصيله معدله اربات الدواوين وتحير الوصفهه كلما يوصفوهه

تاريخ وحضاره موكلمتين وربطتهه الشرف والعزه والدين
ووجه واحد وجهه يعني وجهين ماصارت ولا گدروا يغيـروهه

تذكر بالفرح حتى المبعدين وطيبتهه نهر ويفيض صوبين
وطبع بيهه الكرم مثل الفناجين تنطي بلا ثمن تزعل يخضّوهه

بغداد العشگ ياقرة العين ياأم اليتامه والمساكين
يادار السلام انگول أمين بستان الحبايب همه سمّوهه


3


شمس وگمر

ابعين اشوفك شمس وابعين اشوفك گمر

وباقي وتظل مبتداء رادوك تصبح خبر

مجروح واعرف نعم لكنه نقطه ابحر

ياقمه غير السفح معروفه عند النظر

ومعروف طبع الجبل متهزه قطعاً ريح

ومذلول يبقه السفح يتحمل التجريح

موعيب من تنجرح لا عيب من طيح

بس بيهه يوجد فرق يحتاج بس توضيح؟

يعراگ لمن طحت .. يعراگ لمن طحت ..

گاع احنه وانته المطر

ابعين اشوفك شمس وابعين اشوفك گمر


4


غصبن عالحزن!

يطلعلك فجر ما اريدك تحير وليلك ينجلي والله بصبحنه

وترجع ياوطن وشلون ما كان وغصبن عالحزن يرجع فرحنه

موعدنه المهم لو متـنه ونعيش بس انت المهم كلحنه صحنه

بس انت المهم كلحنه صحنه

ما ننغش بعد علمنه الدروس صح قاسي الزمن لكن نصحنه

علمنه نعرف الزين والشين ياهو الطيب وياهو الجرحنه

وما همنه الجرح علمنه الظهور تغفه عالملح علمنه بحنه

موعدنه المهم لو متـنه ونعيش
بس انت المهم كلحنه صحنه

يامحنه التجي تلگانه الچفوف وذبحنه الميم صارت النه حنّه!!

وذبحنه المستحيل وكلمة شلون بس حبّك فقط هو الذبحنه

وورسمك ياوطن عايش بالگلوب يعني اگبالنه وين احنه رحنه

موعدنه المهم لو متـنه ونعيش
بس انت المهم كلحنه صحنه


5


بغداد العشگ

بغداد العشگ صرتي ملكتي ووحدچ للگلب صدگي ملكتي

شعري لو قبل غيرچ ملكتي مثل شاعر فقد للشاعريه

عاشگ بس عشگ مثل المجانين وماگلكم عليهه بس تعرفوهه

ومدمن حيل حبهه صارلي اسنين واذا دّورّون عنهه بيه تلگوهه

تاريخ وحضاره وقرة العين
واصيله معدله اربات الدواوين
وتحير الوصفهه كلما يوصفوهه

ربطتهه الشرف والعزه والدين واشگد حاولوا بس ما يفلوهه

ووجه واحد وجهه يعني وجهين ماصارت ولا گدروا يغيـروهه

تذكر بالفرح حتى المبعدين
وطبع بيهه الكرم مثل الفناجين
تنطي بلا ثمن تزعل يخضّوهه

عدد دمع اليتامه والمساكين اخاف اعليهه من عين اليحسدوهه

وطيبتهه نهر وايفيض صوبين محتاجين اكمل لو عرفتوهه؟

بغداد العشگ تسوه الملايين
وبااوراق الكتب تعني كلمتين
بستان الحبايب همّه يسمّوهه


6


منتظرين

مرّت سنه من العمر مرّت گبلهه اسنين
نتمنه چنه الكبر بس هسه متندمين

جبنه العمر ننتظر .. قانعنه چان الصبر
باچر يگول الفرح والباچر امتانين ..

منتظرين ..
تعبنه السهر والخوف والدمعات
ومابعنه القوافي والارض والدين .. منتظرين

تطلع يا فجر تفتر عله الولايات
وكل اهل السلف ابحضنك امعيدين .. منتظرين

لأن ليل المسافه والعمر شمعات
ونريدك صبح وتخضر ابساتين .. منتظرين

وعدنه احلام بس بيهه الامل مامات
ومشنوقه ابزلم بالواحد وتسعين .. منتظرين

وينك يا صدگ .. وينك يا صدگ .. نكظيهه بالصفنات
موصار الچذب من گد نفوس الصين .. منتظرين

ونكتبلك شعر واسم الوطن الابيات
حته انكون انه وانته منتظرين .. منتظرين



ضرغام العراقي
www.dhrgamaliraqi.jeeran.com
العراق - الديوانيه

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل