دردشة عجائز مغتربات

عبد الإله السباهي

الحوار المتمدن-العدد: 2323 - 2008 / 6 / 25 - 06:47
المحور: الادب والفن
    

سيدي القارئ الكريم:
ليس من السهل كتابة اللغة (العامية) المتداولة في جنوب العراق، وأقصد في محافظة ميسان حصرا، فحروف أبجديتنا العربية لا تغطي كل الأصوات المستخدمة في كلماتها بكثرة هناك. فالعديد من الكلمات المستعملة يوميا تجد فيها حروف مثل (چ) وتحتها ثلاث نقط أي ch والحرف (ﮔ) وفوقه خط إضافي G وغيرها، ولكوني سأستعمل العامية هنا أرجو منكم التأني في القراءة وخاصة مع الكلمات ( الطوخ) فهي كما أشرت وشكرا.

دردشة عجائز مغتربات

هله ومية هله بأم زياد، ولج معقولة ثلث اسنين ما أشوفج !
ولج هياتها برلين، شدعوة، البطاقة تكتل روحها بمية يورو.
خيه أم طارق، جا إنتي ليش ما تجين؟
هم هياتها كوبنهاكن ،أظن البطاقة هنا بنفس السعر، خو أركبي وتعالي، لو مشتاقه صدك .
خلينه من العتب، اجيتج هسه بعد اشتردين، والما يجي وياك تعال وياه،
شأخبارج ؟ بعدها توجعج ايدج ؟
يمعوده، ماكو فايده، عجزت من الأطباء، الطب هنانه سكط ، سولها عمليه وما فادت، غسلت إيدي منهم، يا عيني على أطباء بغداد، هسه يلله عرفنا قيدرهم.
يمعوده الله كريم، تطيب من كيفهه.
لا طابت، شو الشمس ما نشوفها إلا بالشهر مره، تكول يوزعوها بالبطاقة التموينية، والبرد، تعرفين، بتموز ولحافي عليه.
أكلج شلونج بالألماني، تعلمتي، بعدج ؟
ماشاء الله جني بلبل، شعرف ولج خيه غير( الدانكشن)، خليهه سنطه . خو مو مثلج، ما شاء الله ختمتيها للغة. وج هاي هم سهله، طايحه براس البنات، وشابعه منيه، بس دشوفي النوبه اسمي ما يعرفون يكولنه.
طبعا ما يعرفون يكولون اسمج ، ليش هوه اسمج اسم عدل؟ أكوا واحد يسمي (عجيبه)؟
جا آنه شبيدي غير أمي سمتني بهل الأسم. بالعراق المعلمات يضحكن عليه، هله عجيبه، بعدج عجيبه؟ ومن هلخريط
وهنا محد يلفظه، شنهو الصعوبه بيه؟، مو عجيبه بالله؟ هنا نصه يموع بالحلك.
أصفن واكول هسه ما لكيتوا غير هذا الأسم؟
كلت أحسن شي ابدل اسمي هنا، شو هيه ضايعه، سميت روحي ( داليدا)، مو حلو الأسم، إحجي
الصدك بداعت طارق عليج ؟
ولج جا آنه شأكول ؟ (خنفشار)، أكو واحد يسمي بنته خنفشار؟ زين شنو معناها؟ دورت كل القواميس وماكو فايده. بالله انتي أحسن مني عجيبه اسم حلو اشبيه؟ على الأقل ينفهم، وأصلن أول ما سموج نجاح ليش قلبوا؟ .
أي صدك جان اسمي نجاح ، لكن شنسوي لأمنا الجاهلة، كل أموراتها جانت بيد ذيج التعرفينهه الله يرحمها، جانت تتحكم بالكل، من سمعت سمونّي نجاح، راحت اتدك وتلطم ، ولج (تسواهن)،
يا فطيره، تسمينها نجاح وأبوها توه أخذته الشرطه؟ مو عجيب أمرج يا رعنه ؟ باجر بس يسمع يطلكج، وكولي كالته.
جا شسميها خيه، شوري علي؟
خوت ضروسج كليله الأسامي؟ سميها عجيبه.
وهل اتشوفين صرت عجيبه.
زين إنتي أكو سبب وسموج عجيبه، آنه ليش سميتوني بهذا الأسم؟
جا مو صار عد أمج درزن بنات، وشكد يحب أبوج البنات الله يرحمه!
ولج جنه نسمي ( طنطل) بيت رسن خنفشار. وترى اسمج التحفة هم من بركات المرحومة الما تتسمه.
شكو، بدلي اسمج مثلي، تردين استنكيلج أسم؟
جنج بكلبي أم زياد، آنه هم بدلت اسمي.
الصدك، المدرسات الدنماركيات الوياي بالحضانة سمني (كاتيا)، مو حلو؟
أحجي الصدق أم زياد كاتيا مو أحلى من خنفشار؟
كلش حلو، خل نسأل ابنج.
ولك خاله طارق، شنو رايك بأسامينا الجديدة؟ مو أحلى وأسهل؟
والله خاله أساميجن كلش حلوه بس بيها فد شي .
شنو خاله، ما عجبتك، لو حرام علينه؟
لا خاله الأسماء أصلا كلش حلوه، بس هذي أسماء نسوان مشهورات هنا.
بعد أحسن، أحنا هم صرنه مشهورات.
اسطبري خاله غير تعرفين أبيش مشهورات؟
اسطبرنه ابن خنفشار، ابيش هنه أحسن مني؟
خاله بطلات كل أفلام ومسلسلات وره نص الليل، أساميهن، كاتيا وداليدا.
يعني شنو ؟ لا تزعل عليه خاله شو ما افتهمت؟
وج خاله هذني المشهورات يمثلن أفلام جنس، أفتهمتي لو هم هاي عجيبه؟
تفو عليك، ولك ما لكيت النه غيرهن؟
طارق، ما تستحي تحجي ويه خالتك هل الحجي ؟
يمه آني شيخصني، قابل كذبت؟
أمده هل الحظ، جا ولهنا الفكر لاحكج عجيّبه؟
صدك لو كالوا: الفكر فوك الجمل والجلب عضه.
زين هاي منين طلعتلي؟،
لا خاله خليني على عجيبه وأنجب أحسن لي، بطلت من داليده، خلي أمك تصير فنانه.
بدلي عجيبه الموضوع أحسن.
هذا مثل أبوه ما ينحجي كدانه شي إذا ما يصنف عليه.
خل نحجي على الطبخ أحسن.
أي والله خيه لا عاب حلكج.




عبد الإله السباهي
الدنمارك
20/6/2008

#عبد_الإله_السباهي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل