علشان هدوم المدرسة
ياهل ترى المقتول بسيف الذل قاتل؟
ملعون من الله؟
طب دا رب الرحمة عادل
***
يشهد عليه هم العيال
إنه شريف
وشهيد طابور اللقمة..وطابور الرغيف
واما العيال بصوا بعيون مكسورة..ياه
قلبه الرقيق ماقدرش يستحمل شقاه
والإيد ماهيش طايلة..ومش متدنسة
ومنين يجيب ليهم هدوم المدرسة؟
***
كتم شجاه وخرج..وهم تقيل حناه
ورجع ينام..
وعنيه مفنجلة في الضلام
تبري سواد الليل
سواد الليل براه!
والسم ـ م المر اللي شاربه ـ كان دواه
***
ياصاحب العفو الجميل
افتح له احضان جنتك
الدنيا كانت قاسية والزاد كان قليل
الصبر والصبار وحنضل المرار
فناه شجاه في الليل وبلواه بالنهار
دا كان جمل واتجن
وهج م الهجانة، سامحه على الرحيل
واشفيه من الدنيا بجمال حنيتك
الرحمة والغفران يارب
دا مات عشان انسان..
وأب