مسرحية التمثال

هادي الخزاعي -

الحوار المتمدن-العدد: 2414 - 2008 / 9 / 24 - 06:12
المحور: الادب والفن
    

مسـرحيــــــــــة

التــمثـــــــــــــــــــال


تاليف
عـزيـز ينســـين



اعداد وتعريق
هادي الخزاعي
عن مسرحية
(لا يزال أسمي غارا)












المكان ساحة معده لأحتفال ازاحة الستار عن نصب شهيد عسكري من ابناء البلده .في الساحه قاعدة لتمثال ينتصب عليها نصب لشخص بلا ملامح ، وعلى يمين المكان منصة خطابة عليها عدد من الميكروفونات تشــــير الــى اسماء فضائيات افتراضيه . اعلام زينه ولافتات تغطي المكان . كـتــب على اللأفتات شعارات تمجد بصاحب التمثال مثلا ( ستبقى جســـومـــي حيـــا في ضميرنا الى الأبد)، ( لن تضيع تضحياتك يا جســـومي هــدرا)، ( تمثالك يمثل اسمى نماذج الشهداء من اجل الوطن ).
حركة على المسرح من قبل الفنيين الذين هيئوا للأحتفال . منهم من يرتب المكرفونات. ومنهم من يجمع باقات الورود المركونة قرب التمثال ، ومنهم من يرتب الكراسي . يدخل شخص يبدو عليه العرج في رجله اليسرى ويتعكز على عصا و أسمه ( زلاطه ). يتحدث مع الموجودين على المسرح بلغه آمره.

زلاطه : يله يمعودين الساده المسؤولين راح يرحون وانتو بعدكم لهسه تفرون برواحكم.. معقوله. يله فضوهه.. شدتسوون صواريخ خوما صواريخ.. يله فضوهه . ( يذهب جهة التمثال ويتطلع اليه بلا تعبير ) والله صرت آدمي براسنه جسومي افندي . . حته المسؤولين الكبار اجو وشالو الستار عنك جسومي ..
فني 1 : (لصاحبه) متكلي منو هذه؟! بس ينطز عبالك زنبلك!
فني 2 : منو ؟! أكو غيره ؟!
فني 1 : منو بروح امك!
فني 2 : ( يشاوره ) مسؤول امن الولايه.
فني 1 : عوذه!.. تقريبا كمل كل شي .. والمسؤولين قرو كلماتهم.. كله لصاحبك ، نروح لو نبقه بعد ؟
فني 2 : هسه أسأله... استاذ زلاطه كملْ كلشي.. نروح لو بعد..
زلاطه : بعد بابه بعد.. بقت بس كلمة مدير الناحيه وترحون براحتكم.
فني 2 : يعني الترتيبات اللي سويناهه للمسؤولين الكبار عجبتك؟
زلاطه : عفيه عليكم عفيه .. كلش عجبتني .. عفيه.. هسه يله ، كلمن يروح لمكانه ، ولا تنسون ، من يخطب مدير الناحيه، وره كل جمله تصفكون وتهتفون مثل ما فهموكم الجماعه. ( يؤشر بيده اشارة الى النقود .ينسحبون . ينظر الى ساعته ) هم زين مدير الناحيه يعرف يقره ويكتب. (يتطلع الى جهة يمين المسرح فتنشرح اساريره ) تفضل استاذ.. تفضل .. لكم سووا درب لمدير الناحيه تفضل استاذ .
( يدخل مدير الناحيه شخص مبتور اليد اليسرى ، بدين متهالك . ملابسه تدل على عدم امتلاكه للذوق في الملبس . يصاحب المشهد هتافات واصوات تشير لوجود اعداد هائله من الناس).
مدير الناحيه : ها زلاطه شلون مشت الأمور؟
زلاطه : مثل الورد استاد.. كلشي تمام استاد ومثل ما يعجبك .
مدير الناحيه : ممتاز. بيضت وجهنه كدام المسؤولين؟ لعد وين زوجة الشهيد؟
زلاطه : استاذ من شافت التمثال راد يغمه عليهه هلكد ما يشبه المرحوم.. فترجيتهه تروح ترتاح وطبعا هيه تسمع كلامي ..فراحت ترتاح.
مدير الناحيه : الله يساعدهه ...أكلك شوكت أخطب ؟
زلاطه : هسه .. محضر كلمتك؟ خو ما طويله؟
مدير الناحيه : طويلتيش هيه جم جلمه وابوك الله يرحمه.
زلاطه : وهو المطلوب.. تحضر آني رايح للمنصه اقدمك حته تلقي الكلمه .
مدير الناحيه : يله عفيه عليك بس مو تنسه تكول السيد .. السيد مدير الناحيه.. مو تنسه .. تره هلمره المسؤولين الكبار موجودين . افتهمت..السيد .. مو مثل كل مره تبلع السيد.
زلاطه : مثل متريد استاد .. السيد مدير الناحيه .. ( يذهب الى المنصه ويحرك يدية للجمهور من اجل ان يهدأ ) شكرا .. شكرا على هدوئكم.. الساده المسؤولين .. ضيوف ناحيتنا المبجلين .. ابناء مدينتنا الأجلاء .. لقد تم اليوم ازاحة الستار عن تمثال ابن مدينكتم جسومي البطل وبهذه المناسبه نشكر الساده المسؤولين في البلد على حضورهم هذا الأحتفال ونشكر هذه الألوف المؤلفه من ابناء مدينتنا الباسله على تجشمهم عناء الحضور لهذه الأحتفاليه المكرسه لأزاحة الستار عن نصب بطلنا القومي جسومي (يصفق ويشير بتصفيقه للحضور بالتصفيق ايضا ) فجسومي يا جماعه يستاهل اكثر من هذا .. على كل حال فخير من يتحدث عن المناسبه من جهه ، وعن الشهيد جسومي من جهة ثانية ، هو السيد مدير ناحيتنا المحترم الذي لم يبخل بشئ من اجل ان يخلد الشهيد جسومي البطل.. السيد مدير الناحيه المحترم يتفضل لألقاء كلمته التي هي مسك ختام احتفالنا العظيم هذا . وهنا لا بد ان اكرر السيد.. نعم السيد مدير الناحيه ( يصفق بنفس الحركه السابقه ويترك المنصه وهدير من التصفيق قد ملء المسرح . يذهب مدير الناحيه الى المنصه وعند وقوفه على المنصه ،يخرج من جيبه منديلا ابيض ومن جيبه الآخر يخرج مجموعة من الأوراق. يفتح الأوراق ببطأ متصنعا الحزن ثم ينظر الى الجمهور ويؤشر بيديه طلبا للهدوء)
مدير الناحيه : مسؤولونه المفتدون حفضكم الله ورعاكم أيها المحترمين! ضيوفنا الكرام والكبار! يا من شرفتم ناحيتنا! أخوتي الأعزاء ... يا ابناء ناحيتنا المحترمين ... نرحب بكم اجمل ترحيب في مدينتنا الصغيره والتي هي كبيره، وكبيره جدا بوجود ابطال فيها مثل الشهيد الحي جسومي البطل
( تصفيق هادر يقوده زلاطه )ان ازاحة الستار عن النصب التذكاري لأبن مدينتنا البار جسومي من قبل مسؤولين كبار مثلكم لهو شرف كبير لنا . كما ان كل المبجلين الذين تحدثوا من على هذا المنبرعن بطلنا القومي جسومي قبل كلمتي هذه انما تحدثوا عن البطل جسومي الذي اكسب مدينتنا صفحات مشرفه ستبقى ما بقي هذا الصرح القومي العظيم ( مشيرا الى النصب ). ان كل الخطباء تحدثوا عن الشخصية النموذجيه لجسومي ، وعن بطولاته في ساحات القتال. أما أنا...أنا.. انا السيد ..مدير الناحيه فسأوجز الكلام حتى لا احملكم عناء تعب الأستماع في هذا الجو الحار الخانق، خصوصا وانكم منذ الصباح في هذا الوضع المتعب ( همهمات واصوات بطبقه عاليه)..
فني 1 : لقد مات من اجلنا
فني 2 : مات في سبيل وطنه
فني 1 : جسومي الخالد مات فداءا للجميع
فني 2 : لذلك فأرواحنا فداءا لك جسومي...
فني 1 : تابع.. استمر...
فني 2 : احنه ما نشعر بتعب استاذ .. أستمر يرحم والديك..
زلاطه : ( ينظر اليهم وهو يشير بأصبعيه علامة الفلوس ، ويتحدث اليهم بصوت خافت ) تستاهلون عفيه عليكم.. عفيه ..
مدير الناحيه : ( مستمرا في خطابه ) ردت أكول .. هاي اذا سمحتولي وتكرمتم عليه.. ردت ان اذكر عددا من الذكريات عن صديقي المحبوب جسومي.. ان جسومي .. جسومي الخالد.. كان اقرب أصدقائي ( بصوت مرتجف بسبب جيشان العواطف ) لقد كان صديقا عزيزا ألي.. كان كل شئ بالنسبة ألي.. كان صديقي من جان زغير.. من جان زعطوط هلكبره ( يشير بيده الى ارتفاع نصف قامته ).. وأنا الآن ومن هنا سأذكر لكم احدى ذكرياتي
لا بوصفي مدير الناحيه، بل بوصفي صديقا للبطل الذي لا مثيل له، جسومي.
مهما نسيت فلن انسى... ( يتذكر ) اها تذكرت ..انه ذات مره قال لي... " يا اخي سيد ستار" ، لا ، لم يقل اخي ستار ، ما زلت اذكر كلامه كما لو كان اليوم بالذات ، قال " يا أخي العزيز .. أسمعوا زين ، قال " اخي العزيز سيد ستار، هسه تشوف ، راح يجي يوم تصير بيه مدير ناحيه ويصيحولك الســيد مديــر الناحيه " . يعني بالضبط مثل ما كالـــهه قبل شويه أستاذ زلاطـــه المحتـــرم .. " يصيحولك السيد مدير الناحيه ".. هيج كال، ولكني لم اصدق كلامه أنذاك.. غير ان الذي قاله هو في ذلك الوقت نجده اليوم وقد تحقق ، ثم تابع جسومي البطل كلامه قائلا : " أخي الحبيب سيد ستار، سترى انك بعد ان تصير مدير الناحيه ، ستصبح عضوا في المجلس الوطني ايضا " نعم.. هذا ما قاله.. لقد كان جسومي البطل نافذ البصيره منذ ذلك الحين . ( تصفيق حاد وهتافات من زلاطه والفنيين واحد وأثنين ). ثم قال لي جسومي البطل " ولكن للأسف الشديد أنا سوف لن ارى ذلك اليوم يا اخي الحبيب سيد ستار " ( يتحدث وهو يشرق بدموعه مغالبا البكاء ). فسألته: " لماذا تقول ذلك يا اخي العزيزجسومي؟" أجاب " ذلك لأنني سأموت في يوم جمعه عند الظهر تماما وعند بلوغي الثلاثين من العمر تماما " شئ لا يصدق ، ولكنها الحقيقه عينها .. لقد صدق كلام جسومي ، مات في اللحظه التي حددها ( يبكي ) لقد عرف تأريخ موته باليوم والساعه .. ( أصوات هي نفس اصوات الفنيون وزلاطه )
ــ الله ومصلي على محمد والي محمد ( تصفيق )
ــ جسومي ابد ما مات لا والله.. جسومي ابد ما مات لا والله ( بتون يشبه الهوسات المعهوده )..
ــ جسومي انت بطل حي وخالد في قلوبنا ..
ــ المجد والخلود للشهيد جسومي ...
زلاطه : رغم انك ترقد في التراب فأنك بيننا حي لا تفارقنا جسومي البطل
مدير الناحيه :(يمسح دموعه بمنديله ويتمخط ويركز بنبرات صوته )أن الأبطال هم أولئك الذين لا يموتون في معاركهم الأولى ولكنهم لا يعيشون بعد معاركهم الأخيره.( يمسح دموعه بمنديله الأبيض ) .. لقد كان جسومي بطلا من هؤلاء.( تصفيق ) أنني اتصوره الآن أمام عيني ، مره هنا في ناحيتنا أصيب بجرح في مشاجرة جرت في الحي من جراء حجر ألقي عليه فأصاب جبهته. سال الدم غزيرا حتى تملكنا الخوف من انه سيموت، أما هو فقال : " لا تخافوا لن أموت لأن هذه ليست معركتي الأخيره ".
الواقفون : اللهم ومصلي على محمد وآل محمد(تصفيق )
مدير الناحيه :أهالي ناحيتنا الأعزاء! لقد زف لنا المسؤولين بشرى كريمه. أريد ، اذا سمح لي المسؤولين، ان انقلها أليكم. سيطلق على مدينتنا ذات التأريخ العريق ، من الآن ، اسم البطل الذي ترعرع فيها ، سيطلق على مدينتنا اسم مدينة جسومي، وهكذا فأن مدينتنا ستعرف بمدينة جسومي منذ هذه اللحظه ( تصفيق. يمد مدير الناحيه جسده نحو النصب )أخي الحبيب جسومي .. اقرب الناس اليك (يؤشر على نفسه ) السيد ستار مدير الناحيه ينادي.. أن اهالي مدينة جسومي يعاهدونك على السير في طريقك ...
أصوات : كلنه وياك جسومي .. كلنه وياك جسومي ...بالروح بالدم نفديك جسومي .. بالروح بالدم نفديك جسومي ...
زلاطه : المجد والخلود لك جسومي .. عاش جسومي عاش عاش عاش
(ينزل مدير الناحيه من على المنبر . الأصوات تبتعد . زلاطه يشد على يد مدير الناحيه ويعانقه مهنئا ).
مدير الناحيه : شلون جان الخطاب ؟؟
زلاطه : يخبل.. اهنيك من كل كلبي..
مدير الناحيه : شكرا استاذ زلاطه..
زلاطه : أكيد تعبت !
مدير الناحيه : هواي
زلاطه : آني راح اعلن نهاية الأحتفال حته تروح تودع المسؤولين وتروح ترتاح.
مدير الناحيه : بسرعه وآني اروح
زلاطه : تفضل روح (يذهب مدير الناحيه خارج المسرح، ويتوجه زلاطه للمنصه )
الأكارم ضيوفنا وأبناء ناحيتنا الأعزاء.. نعلن انتهاء مراسم رفع الستار عن تمثال بطلنا القومي جسومي وشكرا للجميع ( الى الفنيين ) يله يا جماعه لملموا كلشي حته ترحون ترتاحون...( تدخل امرأة اربعينيه للمسرح اسمها جاسميه ، ترتدي السواد وهي خاليه من اي ملمح للجمال ) هاي وين جنتي ام جاسم.. مدير الناحيه سأل عنج .. كتله راسهه وجعهه ويمكن راحت تزوع.. ها هسه شلونج ام جاسم ؟! (تتوجه جاسميه الى التمثال وتنظر أليه بشزر وتهز بيديها استخفافا)
جاسميه : بهي بهي ..صدك لو كالوا " اليدري يدري والمايدري كضبة عدس ".. ايييييييييييييييي ، يله ، عيش وشوف..
زلاطه : تفضلي ام جاسم هنا ( يشير الى كرسي قبالة التمثال ) أكيد عجبج التمثال..يشبهه للمرحوم مو؟! انتي زوجته وتعرفيه احسن من اي واحد بالولايه، حته مني آني اللي جان اربعه وعشرين ساعه لازك بيه، خصوصا من جنتي تذبين هدومه بالشارع وتطرديه من البيت. جان يجي يمي وينام عله كلبي الى ان الله يهديج وتسمحيله يرجع للبيت .. جنت ويه النحات ليل نهار .. سوي هاي وشيل هاي حته يطلع التمثال نسخه طبق الأصل من جسومي ويشيل راسنه.. والحمد لله مثل ما تشوفين عبالك جسومي بشحمه ولحمه ! مو تمام ؟!
جاسميه :تمام..بس شو ايده شويه كصيره ! مو تمام زلاطه أفندي.
زلاطه :ياكصيره جاسميه خاتون .. مو ايده واصله لركبته !
جاسميه : ولو.. بس هم بعدهه كصيره زلاطه افندي .. متذكر شلون جانت ايده طويله!؟ متذكر شلون جنت انته وياه مكلين جيوب العالم.. ما خليتو جيب بالولايه يعتب عليكم!
زلاطه : جنه ام جاسم جنه ..بس هسه تغير كلشي، يعني بالقلم العريض، لازم تنسين كلشي اسمه جان .. يعني كلشي اسمه جان .. بح .. راح. ام جاسم لازم تنسين اللي جان وتفكرين بهسه وبس، خصوصا الناحيه انطتج احسن بيت بالولايه لأن جنابج زوجة الشهيد جسومي .. وكَعَدوا ولدج بأحسن مدرسه ، لأن ذوله ولد الشهيد جسومي .. بعد وين اكو احسن من هلخير يا ام جاسم .. انسي .. أنسي اللي جان وسويله بي باي .. مع السلامه ..
جاسميه : هيه هم هيج .. مراح افكر بالراح لأن جان كله مر ومرار ويه جسومي الله لا يرحمه . بس اكو شغلتين باقيه حسره بكلبي..
زلاطه : بس أأمري كلشي يصير مثل ما تريدين.. بس أشري وبيج خير وأدللي..
جاسميه : متكَدر تسوي شي زلاطه ، لأن حسرتي الأولى .. لهسه ما كدرت اعرف شلون جسومي ضحه بنفسه من اجل غيره مثل ما تكول الجرايد..وآني اعرفه كلش زين ما يبول عله ايد مجروح ..
زلاطه : والحسره الثانيه ام جاسم
جاسميه : اشتعل وراح وما كطعت النعال عله راسه..
زلاطه : هيج جان شالع فوادج؟!
جاسميه : ليش انته متدري ؟ مو جان صاحبك وتعرف كل مكسراتهه..
زلاطه : جان ام جاسم جان .. شكَلنه قبل شويه.. جان .. جان وهسه هوه شهيد وهذه تمثاله والناس شايلته بالصلوات.. دشوفي الناس واحد فوك اللاخ وبديهم اللافتات ، متقرين..( لنفسه ) لكن صدك انتي هم اميه مثله لا قرايه ولا كتابه.. بس سبحان مغير الأحوال.. ( تنهض جاسميه من كرسيها ) وين كَايمه ام جاسم ..
جاسميه : اروح لأن ما اتحمل هذه السيبندي ( تشير الى التمثال ) يصير آدمي وهو ما يسوه طكَاكَيه .
زلاطه: أعرف يا أم جاسم . أعرف! تعلميني بيه ؟! .. بس هذه هوه الزمن .. يوم يصَعْد ، ويوم ينَزْل . وبعدين هوه رجلج ، والخير اللي انتي بيه من وراه .
جاسميه : زلاطه مو كلما اباوع للتمثال اتذكر كل سوالفه الطايحظهه، خصوصا لما يخليني الزم النعال بيدي وأركض وراه وآني أصيح لك جسومي اوكفلي.. إلا أكطع النعال عله راسك ( تنظر الى التمثال فتزداد نرفزتا فتخرج وهي تردد ) بس مع الأسف النعال لهسه متكَطع.

زلاطه : (لوحده ) والله محد كتله وسواه تمثال غيرج، انتي وطلايبج وياه وصياحج عليه وهجولتج أله كل يوم من شارع لشارع..( للجمهور ) أعرفهه لجاسميه شلون طماعه وظالمه وقاسيه ، وخصوصا من تلزم النعال..أويلي (يمسك رأسه ) ما تهده إله من يعنجر الراس. ( يتجه للتمثال ) لك روح خلصت.. الله يساعدك شلون جنت جارعهه .. لا جهره ولا جهامه ولا اخلاق .. (يخاطب الحاضرين ) مو تمام ؟ بربكم؟ ( يذهب الى المنبر ويتطلع الى الأفق) حيل.. هاي شبلعجل سيارات المسؤولين عبرت الجسر.. عبالك ما صدكَوا يخلص الأحتفال ( يلمح مدير الناحيه فينزل متجها أليه ) الجماعه كَلبوا بالعجل..
مدير الناحيه : اي كَالو عدنه شغل بالعاصمه وما قبلوا يبقون عله العشه .. الله وياهم..
زلاطه : راح تروح للمديريه ؟ اهناك اتمدد واخذ راحتك .
مدير الناحيه : بلي راح اروح لأن آني ميت من التعب وما اكَدر اتحرك خطوه ..لأن تعرف الأعْداد للأحتفال هد حيلي.. شغل شغل ، صار خمستشهر .. بس هم زين فضت ، والمسؤولين كلش مرتاحين وراضين خصوصا عن كلمتي وتحديدا عله حجي الشهيد جسومي اللي كَلته .. جانوا كلش راضين ..
زلاطه: (يفرك يديه ) يعني راح تصير..
مدير الناحيه : ( مقاطعا ) بعد بعد .. مو هسه .. شنو هلغيره يا زلاطه !!!
زلاطه : لا والله استاذ ولا غيره ولا ابد .. بس ردت أخمن كَلولك شي لو لا ؟!
مدير الناحيه :عله كل حال.. خلصنه من هاي المصيبه مال الأحتفال ..
زلاطه : (حائرا أزاء كلمة المصيبه ) مصيبه !!!!؟؟؟؟ شكَلت شكَلت استاذ ؟!ما افتهملي شكَلت حضرتك؟
مدير الناحيه : كلشي ما كَلت.. اقصد هذه الشغل اللي سويناه مو سهل سيد زلاطه .. جان كله براسي ، لأن آني رئيس الأحتفال ومدير الناحيه ..
زلاطه : طبعا طبعا استاد .. وهاي اكبر مصيبه ( يذهب للنصب ويحادثه بعد ان ينشغل مدير الناحيه ببعض الأوراق)آخ منك جسومي آخ.. منو جان يتصور يجي يوم تصير بيه بطل والناس هيج مهتمه بقصص بطولاتك وتسويلك تمثال ؟ كلشي جنت اتصور بس هاي السالفه مجانت أبالي هينوب .. جسومي يصير بطل قومي..صدك جذب !؟.. مو بلاش أهل عفج من كَالو" قيم الركاع من ديرة عفج " احنه هم راح نقيم ، مثل اهل عفج ..
مدير الناحيه : شبيك شو دردم .. شنو ما عاجبك الشغل؟
زلاطه : لا يمعود استاد.. الشغل كلش مضبوط!
مدير الناحيه : لعد ليش تهز بيدك يم تمثال الشهيد البطل القومي جسومي؟!
زلاطه : لك بابه يا بطل يا قومي.. أصلا جسومي جان اجبن من الدجاجه. أسألني عنه.. آني صاحبه وأعرفه كلش زين شلون جان جبينه. اصلا جسومي اجبن واحد بولايتنه.
مدير الناحيه : لتكَول ولايتنه ، من اليوم المدينه صارت مدينة جسومي وبس
زلاطه : وشنو يعني .. دأكَلك جسومي جان جبينه .. وما ظل واحد من شباب الولايه وشيابهه وحته نسوانهه ما مشبعه جلاليق ونعل.
مدير الناحيه : مو بيده لأنه جان جبينه. . يعني لازم اكو سبب لهذا الجبن! اكيد تعرف السبب .. شنو السبب زلاطه؟؟؟!!
زلاطه : وآني شمدريني ليش جان جبينه .. هوه الله خالقه هلشكَل.. خو اذا ما ينتبن يوميه كتله مينام الليل .. اصلا اذا ما ينضرب .. جلده يكَوم يحكه .. مو بس هاي ..
مدير الناحيه : شنو بعد؟!
زلاطه : مجان يرضه بجلاق واحد .. من تلاثه وفوك .. اكَله لك جسومي ليش ؟ يكَلي الجدر ميوكَف إلا عله تلث عراوي.. ( ينتبه لنفسه ) أكَلك صدك.. أنته ليش تسألني هاي الأسئله!؟ ليش انته متعرفه؟ انته مو كلت بالخطاب انه جان اقرب الناس ألك، وانه اعز اصدقاءك!!
مدير الناحيه : ولو ما دأتذكره زين .. بس جان من اعز اصدقائي ..
زلاطه :اذا هيج تكَدر توصفلياه !؟
مدير الناحيه طبعا اوصفلكَياه وأوصف ابوه همين .
زلاطه : فنك.
مدير الناحيه : (يتطلع الى التمثال) هوه جان طويل ومتروس وعريض المنكبين وحلو وابيض مثل الثلج ..
زلاطه : ( مقاطعا بالضحك) أكَلك.. تره التمثال شي وجسومي الله يرحمه شي ثاني.. أشو جان خشمه بكَد خشم أبو ألياس، وطوله بكَد آشتي.بعد منين سويته جميل وطويل القامه وعريض المنكبين الله يخليك ! بعدين يا متروس ؟! أشو جان اضعف من سالم الزغير..جان يتغده ما يتعشه، وجان من الجوع يبوك البيض من كَن دجاج الجيران حته ياكله لكَمه ، بعد منين متروس!؟.. ستوري شوفلك غيرهه .
مدير الناحيه : زلاطه تره ما اسمحلك تحجي وياي بهذي الطريقه ، وبعدين آني كَايلك الف مره آني سيد ستار مو ستوري .وايضا ما اسمحلك ولا يمكن ان اسمحلك تحجي وره الميت ، خصوصا اذا جان هذه الميت بطل قومي..
زلاطه : خاف مترضه.. مو ثنينه دافنيه سوه. اصلا انته لا تعرفه لجسومي ولا تستعرفه. وكل اللي كَلته آني ، مجرد تعليق على وصفك اله بالخطاب .. لأن خبصتنه.. كَال شجاع وكَال صدامي .. كاَل طويل وكَال ابيض ..وكَال عريض المنكبين .. شنو هوه القعقاع لو عنتر ابن شداد ..
مدير الناحيه : اي شنو قابل القعقاع احسن من جسومي..
زلاطه : ستوري ..
مدير الناحيه: هم رجعنه زلاطه
زلاطه : العفو سيد ستار .. اقصد انته طوختهه بوصف جسومي وكَلت كلام كلش حلوعله جسومي .. بس جان قياس حجيك أكس أكس أكس لارج ..
مدير الناحيه : آني اللي كَلته كلام وكلمات خاصه بخطاب احتفال مو اكثر .. لعد شتريدني أكَول عن واحد كل هلهلمه تكَوم وتكَعد وهيه تسبح بأسمه يا زلاطه يا عيني..
زلاطه : ما اختلفنه يا سيد ستار .. بس انته تصر على انه جان بطل قومي.. وجان طويل القامه وعريض المنكبين وخشمه زغير ومتروس وحلو..وووو وبالحقيقه جسومي مو هلشكل.. جسومي جان عباره عن صلبوخه معنجره ولا ينطبق عليه اي وصف كَلته انته.. يعني أكس أكس اكس لارج..
مدير الناحيه : تريد الصدك زلاطه ؟
زلاطه : استاذ تره آني مفتح باللبن.. ولا تنسه رجل أمن..
مدير الناحيه :اعرف كلش زين منو انته زلاطه افندي . والحقيقه اللي خلاني هيج احجي هيه هذي الجماهير مثل ما تشوفهه اللي لحد الان ما راحت .. مدتشوف ( يؤشر الى الجمهور ويقلدهم ) بالروح بالدم نفديك يا جسومي .؟ بالروح بالدم نفديك يا جسومي.. لك ذوله متخبلين عله جسومي .. ولهذا ماراح اتحرك منا إلا يروح آخر واحد منهم .. ولو آني ميت من التعب.. ( يجلس الى قاعدة التمثال)
زلاطه : آني هم كَلت للسايق روح وآني ارجع مشي..
مدير الناحيه : مرات افكر.. اكَول لوما مكَطومه ايدي بالحرب..شجان يصير بيه ؟ أكيد اجدي..يعني صفر..
زلاطه : بس ماشاء الله هسه انته مدير الناحيه..
مدير الناحيه : اقصد لو بقت بس ايدي وراحت كل لشتي..
زلاطه : تقصد؟( يعض لسانه بأسنانه) يعني لو ...؟
مدير الناحيه : بلي..( يقلد حركته )..اكيد الحياة حلوه زلاطه.. بس من يصير الواحد بطل فأكيد شكَد حلو، ويمكن احله من الحياة نفسهه!.. شفايتلي لو ميت وصاير بطل مثل جسومي.. مو احسن من واحد يعيش مثل عيشتنه ....
زلاطه : أستاد الكل تتمنه تصير ابطال.. لكن هذه مو هين .. مو سهل .. وانت تعرف اللي ماتوا بالحرب كَلش هواي .. بس ولا واحد منهم صـــار بطل قومي مــثل المرحوم جسومي ..
مدير الناحيه : يعني ؟!
زلاطه : يعني لو كل واحد مات يصير بطل .. جان انترسنه ابطال .. لكن ابطال مثل جسومي حسب ما حجت الجرايد عن بطولاته بالحرب ما يتكررون ، واذا تكرروا فكل جم مية سنه يطلع واحد..
مدير الناحيه : آخ .. بس لو باقيه ايدي.. بس راحت..
زلاطه : آني هم راحت رجلي بالحرب .. لكن الف الحمد لله والشكر.. ( يقبل يده من الجهتبن ) المهم باقي حي واتنفس ولو صرت اعرج ( ممسدا على الوسام الذي على صدره ) ولو هذه الوسام ميسوي اللي جانت تسويه رجلي.. بس بنهاية الأمر رجلي مجانت تكَدر تسويلي مثل ما سوالي وديسولي هذا الوسام... مدير أمن وبيت وجاه .. وألف الحمد لله والشكر( يقبل يده من الجانبين )..
مدير الناحيه : تريد الصدك .. آني كلما اباوع عله التمثال احسد جسومي.. زلاطه : متكَلي عليش حاسده .. عله هلصخره الواكَفه..
مدير الناحيه: وعله هل الهوسه ..شكَد صحفيين وفضائيات ومصورين أجوي من كل مكان .. الناس شالته بالصلوات..جاسميه المتسوه فلس صارت احوال وسياره توديهه وسياره تجيبهه .. اولده اللي جانو ميشوفون الدشداشه الجديده حته بالعيد ، اترتبوا وكَامت توديهم السياره لأحسن المحلات وأحسن المدارس .. تصور المسؤولين امروني احول الخرابه اللي جان يعيش بيهه جسومي الى متحف ..مو بس الخرابه كل مكان جان عايش بيه جسومي.. يعني حته بيتكم ، وطبعا هذه كله مو بلاش.. وولايتنه الي ما شامه ريحة قيم مقام بعمرهه ، انترست بأكبر الصماخات خصوصا الصماخ الجبير اللي زاح الستار ..خو شفت .. اجه بزره لولايتنه التعبانه وكَال مدينة جسومي لازم تصير من المدن المهمه بالبلد.. وتريدني ما اغار؟!
زلاطه : حجيش هذا ستوري؟!
مدير الناحيه: شو ستوري ؟! موكَلنه تصيحلي سيد ستار..
زلاطه : العفو ستوري هاي من المحبه.. وبعدين الغيره مشروعه كلش صحيح ، يعني واحد يغار من واحد ناجح بالمدرسه بالوظيفه او من واحد يصير بالمجلس الوطني..هذه أمر طبيعي.. بس مو واحد يغار من واحد فاطس يا ستوري..
مدير الناحيه : هم رجعنه لستوري..
زلاطه : العفو سيد ستارمن المحبه ..بس وينك.. تره جسومي راح وصار عضام وحته كَبر ما حصل سوية البشر..يعني عاش حافي ومات حافي الله يرحمه.. عليش واحد يغار منه يا سيد ستار..
مدير الناحيه: فعلا.. شنو الفايده من هلفخفخه.. والرجال انطانه عمره ؟ شكَد حلو لو كل هلهوسه صايره بحال حياته .. جان تونس أكيد..بس شنو الفايده .. راح.. صار بح كَولتك ..
زلاطه : ليكن يا استاد ..( بعدم مبالاه )واذا مات! .. اللي سوتهه الحكومه لأمه ومرته وولده ميشوفوه بالحلم .. وداعتك لو باقيه عله جسومي جان ما خلفلهم نعال .. هاي اذا جان عده نعال.. آني صاحبه واعرفه حق المعرفه.. واحنه هم .. أشو ما مقصرين باللغف من وره المشاريع اللي دتسويه الحكومه لتكريم جسومي .. والخير جاي.. ولازم نجلب بيه .. مو نغار من جسومي .
مدير الناحيه : زلاطه احترم تره آني مو لغاف ..
زلاطه : يمعود انعل ابوه اللي يكَلك لغاف سيد ستار.. احنه دندير مشاريع اعمار الولايه وبس يا ستوري..
مدير الناحيه : هم رجعنه لستوري .. لك بابه كلمة ستوري تذكرني بالفقر والجوع .. آني هسه سيد ستار .. افتهمت؟ زلاطه افندي؟!
زلاطه : افتهمت سيد ستار.. وخلفلله عليك حجسومي .. ستوري من حبك لاشاك.. وآني أحبك .
مدير الناحيه : ( مع نفسه ) طز بهيج محبه.
زلاطه : سيد ستار من اكَلك ستوري اعتبرهه من جانبك زلة لسان.. وألف رحمه عله روحك جسومي عله هل الخيرالبربعنه بيه من وراك.. آمين .. كَول آمين..
مدير الناحيه : ( على مضض ) آمين .. بالمناسبه زلاطه ، آني عدي مشروع تأليف كتاب أسمه "صديقي جسومي"
زلاطه : ليش لا ..خوش مشروع.. كيميه.. يجيب فلوس يابو فلوس..بس ليش تكَلي ألي ستوري؟!!!! .. وهلمره ستوري بدون زلة لسان ومع سبق الأصرار .
مدير الناحيه : بطل عاد من سوالفك . مو دنحجي جد .
زلاطه : آني هم أحجي جد .. ليش تاخذ رأيي؟! هاي مو بلاش !
مدير الناحيه :لأن انته تعرفه كلش زين وتعرف كل سوالفه الحلوه والحامضه
( يضحكان ضحكه طويله وهما يضربان كفيهما ببعض. وفي هذه الأثناء يظهر شخص بملابس رثه واشعث الشعر وحافي القدمين وبيده عصا يتكي عليها وفي الأخرى صرة ملابس ، ويتجه نحو التمثال فيقف تحته ويفتح سحاب بنطاله ويبدأ بالبول والصفير بلحن محدد . يتوقفان عن الضحك وينظران ناحية الشخص الذي يصفر ويبول )
زلاطه : (بدهشه كبيره ) هذي الأغنيه وهذه الصفير مو غريب عليه!
مدير الناحيه :هي انته ولك .. هاي شدتسوي ملعون الوالدين. . اكو واحد يبول عله هذه التمثال..
زلاطه : تفو عليك وعل الخلفوك ياسافل يا حقير.. ملكَيت غير هذه المكان تبول بيه؟!
(يلتفت أليهما الشخص حائرا جزعا وهو ماسك بسحاب بنطاله الذي يابى الحركه فتبقى فتحة البنطال مفتوحه ويبان منها اللباس الداخلي للشخص )
مدير الناحيه : سد زنجيل بنطرونك اثول .. وسخ .. اليوم آني ألك.. ( يركض ليخطف العصا المسنده الى قاعدة التمثال ويهوي بها على الشخص ، اما زلاطه فيستند الى النصب ويهوي بعكازه على الشخص الذي يحاول ان تحاشى الضرب بيديه دون ابداء اي مقاومه )
مدير الناحيه : لك ما لكَيت غير هلمكان تبول بيه هاي ارعن.. قذر!
زلاطه : لك متخجل؟ تبول عله نصب بطلنا القومي اللي مصار ساعه من زحنه الستار عنه ! قذر.( فيما كان الشخص يحاول تغيير وضعيته لأتقاء الضرب تلتقي عيناه بعيني زلاطه بشكل مفاجئ. وفي لحظه من الحيره والدهشه يصرخ على مدير الناحيه الذي كان رافعا العصا ليهوي بها على رأس الشخص) ستوري أوكَف .. لتضربه اوكَف....! (صمت وترقب مشوب بالقلق الشديد) ستوري هذه الشخص مثل اللي شايفه.. ( ينظر اليه بتمعن) معقوله!!!!!!!؟؟؟؟؟( يمسك عصا مدير الناحيه الذي هم بالضرب) هاي شدتسوي ستوري؟! باوع زين ! لك هذه جسومي.......
مدير الناحيه : ( بحيره متناهيه) شتكَول زلاطه !؟ معقوله هذه جسومي !؟
زلاطه : ( بنفس الحيره ) بلي،هذه جسومي!
مدير الناحيه : جسومينه؟! جسومينه!؟
زلاطه : اي! جسومينه.
جسومي : ( بدهشه مشابهه لدهشتهم) هاي انتو!؟؟( مسرورا بالغ السرور للقائه بصديقه زلاطه ، يتقدم اليه فاتحا ذراعه ) لك صدك جذب اشوفك من جديد زلاطه ورده.. صديقي الحبيب الطيب.. زلاطه .. زلاطه هذه انته؟ هم زين خلصتني من هذه الظالم .. كسر ضلوعي بهاي العصا وجماله مالتي.. الله لا ينطيه ولا ينطيك.. ليش وكعتولي دك ؟! بس اريد اعرف ليش ؟! شسويت؟! شنو الجنيته؟ ها ؟! احجي زلاطه حبيب.
زلاطه : ( متراجعا برهبه) من صدك انته؟! .. انته؟! اقصد انته متأكد انته صديقي جسومي؟!!!!!!!
جسومي :طبعا حبيب زلاطه .. آني جسومي هاي شبيك زلاطه.. ومثل ما انته زلاطه آني جسومي .. معقوله لهسه متذكرتني زلاطه.. يعني كل سنوات عمرنه اللي عشناهه سوه وتحملنه بيه ذاك العذاب، تننسي ؟ معقوله؟!( يصفق بيديه ويجلس متهالكا ) معقوله هيج الناس تنسه بالعجل؟!!!
زلاطه : لك صدك هذه شي يخبل!.. (يسحب مدير الناحيه الى زاويه ويهمس في اذنه ) يعني معقوله طلع من الكَبر!!؟ معقوله واحد يموت ويندفن وبعد سنين يطلع عدل؟!! ستوري باوعله زين.. هوه بعينه .. ماكو غيره!
مدير الناحيه : ( بذات الذهول ) منهوه؟!!
زلاطه : جسومي!
مدير الناحيه : يا جسومي
زلاطه : ستوري هاي شبيك ،لهسه معرفته؟!
مدير الناحيه : اصلا بعمري ما شايف هيج خلفه.
زلاطه : لعد شجنت تحجي بخطابك.. وذكرياتك عن صديق الطفوله من جان زعطوط .. جان كله ..
مدير الناحيه . ( مقاطعا ) خرط .. كله خرط ، شسوي؟ غير حته تمشي اموري . وهسه ؟هذه المطكَطك صدك جسومي؟!!!( يؤشر زلاطه برأسه علامة الأيجاب).
جسومي :( موجها كلامه الى زلاطه الذي يغمغم مبتعدا عنه ) لك داد زلاطه ليش هيج ما تعبرني؟ هاي تاليت الصداقه ؟ لك زلاطه بعد كل هلغيبه اللي صارله سنوات أشوفك و متعبرني ؟ شمسويلك ؟ سويت دونيه وياك ؟ مو جنه دهن ودبس يا زلاطه ؟ بس ألي ألله . هاي عود انته اول واحد من الولايه اشوفه ، وهيج مستعبرتني.. لعد البقيه شلون؟!ألك الله يا غافل .
زلاطه : ( يتحاشى جسومي الذي يتقدم نحوه برهبه )تصورناك متت جسومي. صدك انته ما متت؟!
جسومي : لك شمتت؟! مو دتشوفني كدامك هرش ما طاكَني ! هاي شبيك زلاطه؟ اكو شي صاير وراي؟
زلاطه : يعني هسه انته تتنفس؟ يعني حي ترزق ؟!
جسومي : لك داد زلاطه هاي شبيك !؟ خوما مريض فدوه . باوعني زين! آني حي .. آني جسومي . مشفتني قبل شويه ابول يم التمثال ، سامع بعمرك واحد ميت يبول.. لك آني جسومي .. جسومي ابو العراوي ابو الجلاليق وعدل وصاغ سليم. واذا تريد هوية الأحوال الشخصيه ، ما عدي مانع باجر اروح لنفوس الناحيه واطلعهه. بعد شتريد اكثر؟!
زلاطه : (متراجعا )يعني انته مميت ؟
جسومي : لك داد زلاطه ميتيش ؟ مو آني كَدامك ، تفضل هاي أيدي ألزمهه..
زلاطه : يعني انته مو روح جسومي ؟! ملاك جسومي ؟
جسومي : هاي شبيك!!!!!!( يضحك بقوه )هاي شبيك زلاطه ؟! تره تصرفاتك كَلش عجيبه! تمام آني ردت اموت. بس مكَدرت..هذه كل ما في الأمر.. زلاطه الكَاع تاخذ أحسن الناس واسبعهم. وانت تعرفني،جبان وسرسري، فشلهه الكَاع بواحد مثلي ، زلاطه أني ما ألي مكان ، لافوك الكَاع ولا جواهه..آني فد واحد هتر .. هتلي وبايع ومخلص ، وما انفع لأأي شي ، لهذه عدي قناعه أَنْ ما اموت للأبد ،لأن الكَاع لا يمكن أن تقبل بواحد وسخ مثلي. وحته لو متت فد يوم واندفنت ،فأكيد الكَاع راح تزوعني بسرعه..
مدير الناحيه : اخي ..يعني انته متأكد انته جسومي؟!
جسومي : باوع هذه اللاخ !هاي شبيكم ؟ لكم بابه آني جسومي وجيبو قرآن احلف.
مدير الناحيه : زين آني منو .
جسومي : هاي شنو .. انته مو ستوري ابو العلوج لو لا؟
مدير الناحيه : هوه ...... هذه صدك جسومي. انتهينه زلاطه هذه جسومي
الصدك.. لا روحه ولا هم يحزنون .
زلاطه : مع كل اسف طلع هوه ..جسومي بعده عدل!!!!!!!!؟ لعد هاي الهوسه شنو؟؟!
جسومي : يعني شنو زلاطه .. جان لازم اموت؟!
زلاطه : طبعا جسومي .. مو بس هاي .. المفروض انته هسه ميت وشابع موت.. جسومي انته تدري انته متت؟!
جسومي : ( يضحك بسخريه )لك يا متت !مو هياني كَدامك. بعدين خاف عبالكم آني شبح .. لا آني جسومي بلحمه وبشحمه وبأذانه المزروفه هاي..
زلاطه : شو بله.. اي والله صدك .. هاي أذن جسومي المزروفه ..
مدير الناحيه : يعني هوه؟!
جسومي : طبعا هوه .. لعد مو هوه.. هاي ابو العلوج..داد زلاطه اريدك تفهمني وتحجي الصدك. ليش وكَعتولي دك من شفتوني أبول هنا قبل شويه ، اواحدكم عيونه صارت بالحق؟
مدير الناحيه :اي هاي المنطقه شكبرهه، ملكَيت غير مكان تبول بيه؟! وشمعنه إله تجي تبول هنا؟! ها؟
جسومي :والقرآن عله اللهِ .. جنت محصور كلش ، وما لكَيت أقرب من هذه المكان ابول بيه.. هنا شويه اكو فَيْ .. يعني الواحد يوكَف براحته .. المنطقه كلهه شمس وموت حر .. اكَلكَم آني بكل عمري مشايف مثل هذه المكان بمدينتنه! متكَلولي هاي شنو كومة الحجار المخربطه ؟!
زلاطه : هذه يسموه نصب تذكاري.
جسومي : وشنو يعني! اذا بلت عليه راح يصير غير شي؟ وحته لو يصير غير شي..من تنشف البوله يرجع من جديد نصب تذكاري وأبوكم الله يرحمه.
مدير الناحيه : بس جنابك خليتله كيمياوي.. يعني يمكن يصير غير شي..
جسومي : ابو العلوج لاتشتري بعقلي حلاوه .. زين وهاي الصخره الواكفه شنو؟!
مدير الناحيه : أقره . باوع الكتابه المحفوره عله القاعده...
جسومي :اساسا آني لا قرايه ولا كتابه.. خو زلاطه يعرف.. آني بعمري ما كَعدت عله رَحْله بصف ..
زلاطه : ليش بالجيش ما محوأ اميتك؟!
جسومي : ( يضحك ) زلاطه عدي هذه الراس ويمحون اميتي .. مو انته تعرفني حق المعرفه دجه دبنك .
زلاطه : هسه معلينه. شجابك لهنا؟!
مدير الناحيه : اي صدك ليش جاي لهنا؟!
جسومي : حنيت.. حنيت للمكان اللي صرت بيه وكبرت..
زلاطه : وبعد ؟
جسومي : هاي هيه .. (يبتسم ) ها هسه افتهمت السؤال..لتخافون.. مراح امد أيدي وأبوك.. تكَدرون تكَولون آني بطلت البوكَه ، وحته العرك تبت منه .. يعني جسومي مال هسه مو جسومي مال كَبل. ولعلمكم آني مراح ابقه هنا.. كَلهه جم يوم واكَلب الى ...
مديرالناحيه : أحسن..لوين راح تكَلب؟
جسومي : تردون الصدك؟ ما اعرف.. لا عله التعيين.. أما اذا شافلي زلاطه فد شغله اشتغلهه هنا فأكيد راح ابقه.. صدك زلاطه هسه انته شتشتغل ؟
زلاطه : هسه آني مدير أمن الناحيه.
جسومي : يمه!.. لاصدك شتشتغل زلاطه؟
مدير الناحيه : مو كلك.. مدير جهاز امن الناحيه.
جسومي : زلاطه يعني هسه انته اكبر سري بالولايه؟
زلاطه : رئيس جهاز الأمن السري...
جسومي : لك هذه الأسم شطوله .. اكيد شغلتك صعبه مثل الأسم ؟
مديرالناحيه: طبعا شغله مهم لأنه يحافظ على امن الناحيه كَلهه..
جسومي : لعد مدير الناحيه منو ؟
زلاطه : (يؤشر على مدير البلديه ) سيد ستار .. هسه هوه مدير الناحيه...
جسومي : قفلت ! ستوري ابو العلوج مدير الناحيه؟!وصديقي زلاطه مدير الأمن .. يعني حصلت عله شغل.. الحمد لله يا ربي أخيرا راح اشتغل..
مدير الناحيه : ( مشتاطا ويرفع العصا ليهم بضربه ) لك معاجبك ستوري ؟
جسومي : لا العفو. بالعكس .. تعجبني ونص ستوري ابو العلوج.
زلاطه : بعد ماكو .. لا ستوري ولا علوج .. هسه هوه سيد ستار..افتهمت؟ .. هسه سيد ستار هوه مدير ناحيتنه..
مدير الناحيه : ( بنفس سورة الغضب ) سيد ستار وغصبا عله أمك وأبوك ..وانته اصلا ما كان لازم تجي لهنا ابد.
زلاطه : فعلا جسومي كان ملازم تجي لهنا...
جسومي : هيج لعد !؟ ( زلاطه ومدير الناحيه يؤشران برأسيهما علامة الأيجاب ) زين .. اذا هلشكل يعني مراح ابقه بالولايه هواي.. يعني جم يوم واروح.. وحته لو توسلتوا بيه ابقه .. مراح ابقه .. ما اكَدر ابقه هنا ولا دقيقه، لأن ما اريد اشوف وجه جاسميه .. بس ما اضم عليكم ، شويه حنيت لولدي .. صدك زلاطه امي بعده طيبه لو كَرضت الحبل ؟
زلاطه : ( بخبث واضعا يده على كتف جسومي تعبيرا عن ود مصطنع ) جسومي عزيزي..
جسومي : بلي زلاطه...
زلاطه : جسومي عزيزي ...
جسومي : بلي زلاطه...
زلاطه : جسومي حبيبي ...
جسومي : بلي حبيــ
مدير الناحيه : ( يقاطعه بعصبيه ) دخليه ياكل خر........ استغفر الله يا ربي .. العفو استاد زلاطه العتب عله هذه الطنطل..
زلاطه : ولا يهمك ستوري .. العفو اقصد سيد ستار.. اسمع جسومي ..
جسومي : بلي زلاطه..
مدير الناحيه : وتالي وياك ..
جسومي : هاي هيه .. ( يضع يده على فمه ) صاموط لاموط واليحجي يموت..ها اها...
زلاطه : جسومي احسن شي تسويه .. هو أن ترجع من وين ما جيت.. وما تمر بالناحيه ابد.. جسومي اسمع كلامي احسنلك.
مدير الناحيه : جسومي اسمع كلام صديقك زلاطه .. لصالحك ولصالح ولدك.
زلاطه : فعلا جسومي .. اسمع نصيحة اخوك.
جسومي : موافق ..( بحزن ويأس ) بس اول مره اشوف ولدي وأمي وأروح ما ارجع ...
زلاطه : لا ، ماكو داعي تشوفهم ... ارجع منا بدون ان تمر بالولايه وأسمع كلامي.....
جسومي : افتهمت ، انته الريس مال..( يحاول ان يتذكر ) مال هذه الأسم الطويل المدري شسميته .. يعني انته متريد ان تضطر تحبسني اذا بكَت او سويتلي مكسوره ، يعني بوكَه او اي شي بيه حرام.. بس والله ، اني احلفلك بصداقة العمر آني ما بنيتي اسوي أي شي يأذي أحد... زلاطه.
زلاطه : بلي
جسومي : عدك جكَاره ؟
مدير الناحيه : هاك هذه باكيت وشخاطه...( يشعل جسومي سيجاره وينفث دخانها مع حسره كبيره) جسومي شلون اشتركت بالحرب .. احنه سمعنه انه أنت تطوعت؟
جسومي : (يضحك بأفتعال معبرا عن سخريه مره )متطوع !!!!!!!!!؟
دصلوا عله النبي! أكَلكم.. صدك الناس عبالهم أني اتطوعت بالحرب؟
زلاطه ومدير الناحيه : هيج اسمعنه.. انته تطوعت!
جسومي : بس الحقيقه غير شكل ....
الأثنان : يا شكل !؟
جسومي : الحقيقه .. آني جنت بس اريد اخلص من جاسميه ... هذه هو السبب وماكو شي ثاني.......
مدير الناحيه : يعني مجنت متطوع بالحرب !!!؟
جسومي : متطوعيش ستور .... العفو، اقصد سيد ستار.. طبعا آني شاركت بالحرب ومحد يعرف السبب، ليش شاركت.. حته زلاطه ميعرف.. ( الأثنان ينتبهان لحديثه )صحيح آني حرامي، مهرب ،كلاوجي ،آني كلشي ، بس ما اتحمل يكَلولون عني حجي يخلي راسي بالكَاع .. وكلكم تعرفون شلون جاسميه نزلت راسي بالكاع كَدام الناس.. وكلما أكَله طلكَيني ( مستدركا ) لأن جانت العصمه بيدهه ، مترضه أتطلكَني ، وفعلا ما طلكَتني ، لأن دائما جانت تكول " اسمك رجل يعبيد من وحشة الليل " أكلهه لج شبيج آني مو عبيد آني جسومي تضحك وتلطني بالنعال وتكَول وين الكَي رجل احسن منك عبيد.. فكرت ويه روحي وكلت، بدل ما استمر وياهه ، اموت ، احسن من هاي الحياة المصخمه ، اموت احسن.. فجربت انتحر، جبنت والدنيه حلت بعيني ، جربت وجربت اموت ، مكَدرت ، بكل مره جنت اجبن، جنت اخاف من الموت.. طبعا جانوا بالجيش ميقبلوني اتطوع لأن جنت حرامي وما عدي شهادة حسن سلوك.. من كَامت الحرب كَاموا يجندون عامي شامي .. جيبه ولبسه خاكي.. دبرتلي شهادة حسن سلوك مزوره وطلبت تطوع بالجيش ( يشعل سيجاره جديده ) هاي هيه الحقيقه وما ضميت عليكم أي شي وداعت ولدي .
زلاطه : صحيح جسومي مصدكَيك .. طبعا احنه سمعنه انه انته قاتلت بالخطوط الأماميه بالحرب... وسمعنه انه انته جنت تهجم على العدو مثل الأسد.. وسمعنه على انه انته حصلت عله عدد من انواط الشجاعه !؟
مدير الناحيه : هواي سمعنه عنك جسومي.
جسومي : صدك ، مو كَلتلكم جنت اريد انتحر حته اخلص من جاسميه .. مثل ما تعرفني زلاطه آني أكبر مخنث.. ولما خفت من الأنتحار، كَلت اسوي طريقه ثانيه للموت.. فشسويت ..
الأثنان : شسويت ؟؟!!
جسومي : كَمت اركض كَدام الموت .. كَمت اركض ويه رصاص العدو بلكَت تجيني وحده تايهه وأخلص .. جنت اطب بحقول الألغام مال العدو وما أنفجر ولا لغم.. جنت اطب بنص الرصاص اللي جان ينزل مثل المطر وهم ماكو فايده..الطلقات اللي جانت تجي عليه عدل ، من توصلني تروح عله صفحه عبالك تستنكف مني .. شحجيلكم.
زلاطه : والأوسمه اللي انطوكياهه عليش لعد؟!
جسومي : صدك شلون عرفتو آني أخذت اوسمة شجاعه؟!
مدير الناحيه (يتبادل النظرات مع زلاطه ليقررا ما اذا كانا سيستمر بالحديث ام لا ) الجرايد .. الجرايد نشرتهه..
زلاطه : كل الجرايد نشرت هذه الخبر ....
جسومي : ( بحيره ) دتحجون صدك؟!
مدير الناحيه : طبعا صدك.
جسومي : وأسمي طلع بالجرايد؟!
زلاطه : وصورك همين.
جسومي : ( يطلق ضحكه مجلجله ) لك ذوله صدك مخابيل.. تره كلشي بالعكس..
الأثنان : شلون بالعكس؟
جسومي : كلما في الأمر آني كلما اشرد من الطلقات حته ما اموت.. اصير بغابه مال نيران المدفعيه ، وأطلع سالم.. والجماعه ينطوني بهل الأوسمه وما يلحكَون.. خو صدري وجتافي وحته ظهري انترسو اوسمه .. هسه ليش تروح بعيد ( يبحث في جيوبه) أكيد راح ألكَي جم وسام بجيوبي ( يخرج من جيبه وساما واحدا ) وطبعا الباقي بعتهه.. خو مره قشمرتلك واحد بوسام مقابل باكيت جكَاير.. وواحد بقوطية سمج.. خو واحد بدلته ابصطال ما بيه قيطان جان صاحبه مسويه طكَاكَيه..
مدير الناحيه : لك هاي وين صايره ؟! نوط شجاعه بطكَاكَيه.
جسومي : ولعلمك الوسام مجان مالتي، جان لواحد غيري...
زلاطه : يعني بايكَه ؟!
جسومي : شسوي بيه ابوكَه .. عايز ثكل بجيبوبي؟!
زلاطه : لعد شلون حصلته؟!
جسومي : بالشته من جنه بالجبهه ، جنه نلعب قمار بالأوسمه.. وبهلشكل آني ربحت الأوسمه بالقمار مو بالحرب..
زلاطه : شكو بيهه. ماكو فرق.
جسومي : مره لعبنه عله وسام ويه جنود العدو.. واحد منهم ربح شعدي من اوسمه .. يداعيكم طخت عده ، كَلت معقوله هلطرطور يكَعدني علرنكَات.. اول ما دار ظهره نيمت براسه صخره محترمه.. ورجعت كل اوسمتي اللي ربحهه..
زلاطه : يعني كتلته ؟!
جسومي : لعد شسوي.
مدير الناحيه : لك صدك انته حقير ونذل.
جسومي : (يخرج يده من جيبه ) هم زين لكَيته.. هاذه الوسام اللي انطونياه باللواء .. خوش وسام مو؟ زلاطه آني مستعد ابيعلكياه.
زلاطه : وهذه الوسام مالتك لو هم بوكَه؟
جسومي : مالتي وداعتك زلاطه .
زلاطه : زين احلف.
جسومي : يابه اكَمع مرتي مية مره ، هذه الوسام مالتي.
مدير الناحيه : لعد ليش ما معلكَه عله صدرك؟!
جسومي : ( يضحك بألم) مدتشوفني شلابس يا ستوري .. الوسام ينرادله هدوم كشخه.. هاي الهدوم مو مال وسام يتعلك عليهه.. خو فد مره قرر اللواء مالتي ان يمنحوني وسام .. وبالأ ستعراض كَلت للقائد بالضحك " سيدي ممكن تنطوني زوج بسطال بدل هذه الوسام؟ خصوصا احنه عله ابواب شته وبسطالي مزروف " وجان يكَوم عليه أمر اللواء.. راد ياكلني.. وبده يقره براسي جنجلوتيه شطولهه .. بعدين العريف جرني عله صفحه وكَلي بابه الميره كلهه مابيه ولا تك بسطال .. بس مليانه اوسمه ، المخازن كلهه اوسمه ،وباجر اطيك بدل الواحد ثنين.. اخذتهن وأمري لله.. واحد بدلته بجواريب وهذه الثاني .. ديلله زلاطه راح اراعيك بالسعر.. والله ردت اقدملكياه هديه بس ما اضم عليك ، ما عدي ولا متليك ، وميت من الجوع ( يشعل سيكاره جديده ويتوجه الى مدير الناحيه ) تشتريه انته ؟ بس شويه نظف الشريط مالته ويرجع جديد( يضعه على صدر مدير الناحيه ) شوف شلون لايكَلك ، خصوصا هاذه القاط جديد.. يصير ورث منك لولك ولولد ولد ولد ولدك أنشاء الله..
مدير الناحيه: عدي واحد .
زلاطه :ليش انطوك كلهل الأوسمه ؟!
جسومي : ها ( يحاول ان يتذكر) والله نسيت. هنه هواي.. شراح يذكرني؟
زلاطه : سمعت متصوب بجم طعنة حربه من اشتبكتوا ويه العدو بالسلاح الأبيض ؟
جسومي : ( يطلق ضحكات مجلجله كما لو كان قد سمع شيئا مضحكا ) بلي.. بلي .. انجرحت.. وجرحي جان خطير ...
مدير الناحيه : احجيلنه بله شلون انجرحت...
جسومي : سألتني شلون انجرحت ؟ فراح اجاوب .. طبعا شكَد ردت انكَتل خصوصا من تصير المعركه بالسلاح الأبيض .. وصارت بكَلبي مثل الخرعه ..الخوفه ، تخليني بكل مره افر من المعركه.. بس بهاي المعركه مكَدرت وبلت عله روحي من الخوف .. يا أخي الجنود كلسا واكَع واحد .. من يمنتي من يسرتي من وراي من كَدامي ! يعني مذبحه .. بوكَتهه كَلت لازم افر .. مو بس من المعركه ، من كل الجيش.. طبعا بهل الأثناء العدو استعمل السلاح الأبيض.. جنه سريه والعدو اكثر من لواء .. اشتبكت الأمه! وصار الدم للرجاب.. يداعيكم كام يزحف،، وأزحف أزحف ، الى ان صرت خارج المعركه ، وما اسمعلك غير صوت النقيب مالنه " عـــد " .. باوعت.. لك شعد مو بس ارجع انكَتل .. حرت بروحي .. اذا انهزم ، النقيب يكتلني.. واذا بقيت راح يلزموني ويعدموني .. وبهل الهوسه صلاني النقيب بمسدسه ( يكشف عن ساقه ) وجان يصوبني برجلي .. ما اطولهه عليكم ، وكَعت علكَاع . وآني دأوكَع اجتي قنبله موذحهه طيرت وحدتنه بالهوه.. رجل منا وأيد منا وراس منا.. يداعيكم خرب كالعاده .. هناك ..حسيت عله روحي.. فتحت عيني وألكَالك النقيب بحضني ، بس شنو، بدون راس ، وجان يغمالك عليه من جديد.. بعدين صحيت ، لكَيت نفسي بالمستشفه.. جان يكَلولي انته الوحيد اللي بقه من السريه.. غميت وجهي عله هلحظ ..ظليت بالمستشفه هواي ..وفد يوم جان يجي واحد جتفه متروس سيوف ونجوم وتاج ويوكَعلي بوس من راسي ومن كَصتي ومن خدي ومن جتفي ، وجان يعلك وسام عله صدري ..
مدير الناحيه : ليش؟!
جسومي : شكَلك .. آني جنت متصوب صواب جبير، وشلت النقيب كيلومتر بين اديه حته اخلصه.. وهمه ميدرون بجثة النقيب اجتني طايره بالهوه أووكَعت بين اديه ..
مدير الناحيه : والله امرك عجيب جسومي ..
زلاطه : شي ولا يتصدك .. والله سوالفك تعَجْب جسومي..
جسومي : آني هم مثلك زلاطه تعجبت !! حقك تتعجب ..
مدير الناحيه :لعد شنو هذه الحجي القريناه بالجرايد ؟!
جسومي : حجيش ؟!
زلاطه : عله اساس انته وحدك اسرت سريه وفكيت الحصار عن جماعتك ..
جسومي : شنو هاي الجرايد ما عده شغل وعمل بس آني!؟ يمعودين كل الجرايد تجذب.. تمام هو كل الحجي جذب ، بس هم بيه شويه صدك .. هوه صار شي من هلقبيل.. بس عله ناصي ههههههههههه ..زلاطه انت اعز صديق الي .. ومن جنه زغار لهسه ما ضام عليك اي شي ، وراح احجيلك كلشي وروح عمتي..زلاطه ..آني جنت اتجسس للعدو.
مدير الناحيه : تفو عليك يا قذر..
زلاطه : صدك نذل .
جسومي : اذا ما عاجبكم الحجي ، راح اسكت .. ها اها ( يضع يده على فمه ) ويا جلمه ردي لمكانج ..
مدير الناحيه : لا تتمقلج .. احجي وفضهه..
زلاطه : احجي .. احجي يا بيه عار ..
جسومي : هاي عود انته صديقي الله يجرم..
زلاطه : احجي وخلصنه ..
جسومي : راح احجيلكم بما انزلت .. طبعا هاي مال الحصار وأسرت وفكيت الحصار جذب بجذب .. ولأنه آني جاسوس للعدو ، فجانو يسهلولي الطريق حته اوصل يمهم ..وما جذبت خبر .. رحت لقيادة العدو اللي جانو متمركزين عله تله كَبالنه وانطيتهم المعلومات اللي رادوهه .. بس ثاني يوم الفجرهجمت قواتنه هجوم مضبط واحتلت التله .. طبعا كَلت بكَلبي اجاك الموت يا تارك الصلاة .. وهلكَد ما جنت خايف وارجف ، اصبعي اجه عله زناد البندقيه .. وما اشوفلك غير جثه فوكَي .. باوعت ، شفته القائد اللي سلمته المعلومات .. لزمته دأوخره عني وما اشوفلك إلا واحد يعرت بيه وهو يصيح لزمنـــاه .. لزمناه.. لك هذه النقيب مال سريتنه كَمت اصيح مو آني مو آني .. وجان يخمطني ابوسه ويهنيني ، ويكَلي عفيه عليك شلون كتلته .. وطوني رتبة ضابط ، بس لأن آني أمي لاقرايه ولا كتابه انطوني نوط شجاعه ..
مدير الناحيه : ( مستغربا ) أكَلك يعني كل الأخبار اللي سمعناهه جذب بجذب !؟
جسومي : ليش شسمعتو ؟!
مدير الناحيه: انه انته شلت عله ظهرك ربعك الجرحه يوم كامل حته توصلهم للطبابه اللي بالمؤخره ..
جسومي : هاي يا زوج كال هيج؟! ها اي تذكرت.. بس مو مثل ما حجيت انته.. اللي شلته عله ظهري ( يستدرك ) ومو اللي شلتهم على ظهري.. مجان مجروح .. جان ميت..آني شلته لضابط العينه مالتنه من بين جثث هواي ماتوا بالمعركه .. مو حته اخلصه ..لا .. شلته لأن اعرف أكو بجيبه فلوس هواي.. كَلت آخذه عله صفحة وأدور براحتي .. يعني مو معقوله ادور بجيوبه كَدام الجرحه.. وآني شايله عله ظهري وكَفت عله غفله سياره قياده بصفي.. جانت سيارة امر الفرقه ابو السيوف والنجمات.. كَلي هاي شنو .. كَتلهه سيدي انقل هذه الضابط المجروح للمستشفه...
مدير الناحيه : ( مقاطعا ) كافي .. كافي!
جسومي : اللي جنت من صدك شايله وردت اوديه للطبابه وهوه جريح .. واحد اسمه عريف شلاكه.. بس بالطريق من شفته كَام يعالج .. كَلت خطيه يتألم .. الصدك متحملت.. فخليت طلقه براسه حته يرتاح .. وآني ماشي شلعت من فجه تلث سنون ذهب .. كَلت تفيدني من أحتاج...
مدير الناحيه :لك انته صدك لا ذمه ولا ضمير.. يله ولي منا .. ولي ..
جسومي : هاي شبيك .. آني هم رايح ( يمشي بأتجاه المدينه ) مو صوجكم صوج اليحجيلكم الصدك..
زلاطه : هاي وين رايح مناك؟!
جسومي : غير للولايه .
زلاطه : لك يا ولايه .. لعد شحجينه قبل شويه ؟! ارجع منين ما جيت.
جسومي : يعني معقوله ارجع للبحر!
زلاطه : شنو جيت من البحر؟!
جسومي : جنت بسفينه حربيه غركَت بنص البحر، وكل جماعتي غركَو.. بس حظي ذبني عله الجرف ، شلون ما ادري.. وظليت امشي امشي يوم يومين اسبوع شهر ويمكن سنوات.. بعدين عرفت الحرب منتهيه صارله مده طويله. طبعا جنت عايش عله اللي ابوكه واللي احصله منا ومنا .. روحي طلعت يالله عرفت آني وين ..
زلاطه : بس احنه افتهمنه انه من غركَت السفينه انته هم غركَت وطلعت روحك !؟
جسومي : جذب .. وداعتك جذب ..مدتشوفني كَدامك.. آني صحيح تطوعت بهاي السفينه اللي يسموهه سفينة الموت لأن اليصعد بيهه يعني مستحيل يبقه حي.. كَلت وهو المطلوب بلكت اموت بهاي السفينه وأخلص.. بس يبين عمر الشقي بقي .. شو حظي دزني يمكم صاغ سليم..
زلاطه : يلله هسه انقلع منا ودير بالك تمر بالولايه.
جسومي : يمعودين مروتكم بس اشوف أمي وجهالي ، صار سنين ما شايفهم.
مدير الناحيه : امك ماتت.
جسومي : لعد خلي اشوف ولدي.
زلاطه : مراح يعرفوك .
جسومي : ولو .. بس اشوفهم ، لن آني اعرفهم..
مدير الناحيه ولدك هم راحو .
جسومي : لوين ؟
زلاطه : أكلك ، انته متريد تشوف مرتك جاسميه؟
جسومي : اشوف دم سنوني وما اشوفهه.. أكلك زلاطه جانت أكو نبكه جبيره يم بيتنه.. تذكرهه؟ بنفسي اشوفهه . عدي ذكريات حلوه جواهه.. تتذكر من كتبتلي اسمي عليهه.. مدري ليش جانت تجيني بالطيف خصوصا من جنت نايم بالمستشفه.
زلاطه : جسومي ، كَتلك انقلع.
مدير الناحيه : انته ليش ما تسمع كلام ؟ مو كَلك انقلع.
زلاطه : ( يضع يده فوق كتف جسومي ويكلمه بهدوء )جسومي انته صديقي من جنه زغار.. واسمعني زين لخاطر هاي الصداقه. .قبل شويه كَتلك سيد ستارصار مديرالناحيه ،ويمكن بعد جم يوم يصير بالمجلس الوطني للبلد .. وآني هسه رئيس جهاز الأمن السري... أفتهمت لو لا؟
جسومي : بلي افتهمت .. وآني هلكَد فرحان بوظايفكم ، طاير من الفرح..
زلاطه :انته حجيتلنه عن كل جرايمك ، وعن كل الدونيات اللي مسويهه ..
جسومي : غير من ثقتي بيكم ...
زلاطه : جسومي انت صرت واحد خاين للوطن وكذاب ومنافق ..
مدير الناحيه : وحرامي .
زلاطه : ومجرم.
مدير الناحيه : وجاسوس .
مدير الناحيه : وما عدك شرف ونذل وسافل .
زلاطه وأذا تروح للناحيه فاحنه نضطر لأن نعتقلك، وتتحاكم وأكيد تنعدم.. هسه افتهمت ؟
جسومي : بلي افتهمت.
مدير البلديه : ديلله انقلع لعد ، ودير بالك تمر بالناحيه.. روحتك بيه مصلحه بالنسبه للناحيه وبالنسبه لكل الناس اللي بيهه ، وحته بالنسبه ألنه ، وبانسبه للوطن وبالنسبه للتاريخ.
جسومي : ما افتهمت ، هاي النسبات ، ألمن؟!
زلاطه : بالنسبه لكل الدنيه والك خاصه.. لأن من تروح للناحيه يلزموك ويشنقوك .. تره الحكومه كَالبه الدنيه عليك وحاكمتك غيابي بالأعدام .. يعني شنق..
جسومي : ( مباشرة وبدون تفكير ) اقبل .. ومن هسه آني بعد ما أخاف من الموت وخل يشنقوني ، بس عله شرط ، تشنقوني بساحة الناحيه وكَدام الناس.
زلاطه : لك ليش متريد تفتهم ؟!
جسومي : افتهمت كلش زين .. ويكفيني اشوف الولايه ولو مره، وخل تصير الأخيره...
زلاطه : لك مستحيل يا جسومي .. ما ممكن يا عيوني.. افهمني.
مدير الناحيه : لك مو دنتوسل بيك .. اسمع ؟ اذا ماعدك فلوس (يمد يده الى جيبه ويخرج رزمه من النقود ويعطيها له ) أخذ هذه المبلغ تصرف بيه .. يله أخذه وروح...
جسومي : مثل ما تردون . راح انقلع .
زلاطه : هسه صرت عاقل .. يله روح .. روح لأبعد مكان بالدنيه..
جسومي : مع السلامه زلاطه .. مع السلامه ابو العلوج ..
مدير الناحيه : دروح ، يابه روحه بلا رده .
زلاطه : الله وياك جسومي ...
( يلتقط جسومي صرة ملابسه وعصاه ويبتعد وهو يصفر ولا يتحرك اي شئ على المسرح الى ان يتلاشى صفيره ).
زلاطه : ( مفكرا ) متعتقد الفلوس اللي انطيناهياه قليله ؟ هذه متكفيه مصرف اسبوع..وما توصله لمكان بعيد مثل ماكَلناله.. هذه ما عده مانع يرجع للولايه من جديد ...
مدير الناحيه : والله مو بعيد .. هذه صلف ويسويهه... راح اصيحه ونطيه زياده ( يصعد على المنبر ويصيح ) جسومي .. لك جسومي .. جسومي..عدنه شغله ألك .. تعال بسرعه ( وهو لا يزال يتطلع الى الجهة التي ذهب منها جسومي ) هم زين تفطنت لهشي زلاطه .. هذه لازم تترس جيبوبه حته ينقلع من صدك!
زلاطه : أكَول ستوري ......( يتوقف مفكرا )
مدير الناحيه : كَول .. شكو ؟!
زلاطه : افرض جسومي ركب الباص.. وافرض الباص انكلب لو دعمته شاحنه .... ( وهو لايزال في حالة تفكير)
مدير الناحيه : ( بخبث) وأفترض مات جسومي ..(يصل جسومي )
جسومي : ها ابو العلوج ليش صحتني ؟!
مدير الناحيه : ( يقدم لجسومي حزمه من النقود ) ألزم هاي الفلوس ألك حته تروح لأبعد مكان منا.. مفهوم ؟
جسومي : ( يأخذ المبلغ ويبدأ بعده ) الله يوفقك ويخليك مثل ما كَال زلاطه. .
يعني عضو بمجلس النواب .. لا لا العفو .. المجلس الوطني ، مو هلشكل سيد زلاطه ؟؟
زلاطه : اي هلشكل ..( يخرج من جيبه رزمه من النقود ويقدمها الى جسومي ) وهاي مني حته تمشي أمورك وما نشوفك بعد.
جسومي : والله ما قصرتو .. وما جنت ادري انتو هلكَد تحبوني ! بس والله العظيم هذه دين بركَبتي وأرجعلكمياه من تمشي اموري..
زلاطه : منريد منك أي شي ..أعتبره هديه، بس روح ..
مدير الناحيه : ودير بالك تكَول انطيناك ولو فلس واحد..
جسومي : لك انتو شكَد اشراف.. متردون تبينون رواحكم كَدام الناس ..
مدير الناحيه : ودير بالك تكَول اسمك جسومي .. كَول اي اسم بس لا جسومي...
جسومي : ( يقبلهم ) يله مع السلامه .. وبعد متشوفون خلقتي ( يذهب )
مدير الناحيه : تعتقد حس بملعوبنه؟؟ وقشمرنه ولغف الفلوس وباجر ينبصنه بالأحتفال ويحجي اللي سويناه؟!
زلاطه : لك هاي تصير فضيحه بجلاجل كَولت المصريين .
مدير الناحيه : ( يذهب الى المنصه ويتطلع الى الطريق ) لعد خلي اتأكد بيا طريق راح.. لا والله ديمشي بطريق .. الصد مارد ( يتنفس الصعداء )
( يحدث تتغيير بنمط الشخصيات ويتحول أدائهم على ضوء شخصياتهم الحقيقيه كممثلين ويتحدثون الى الجمهور بشكل مباشر )
ممثل شخصية زلاطه : نحن اليوم كنا في مواجهة الوجه اللاذع للحقيقه ..
ممثل شخصية مدير الناحيه : صحيح .. وقد واجهنا اشكال مختلفة للحقيقه ..
ممثل شخصية زلاطه : ولكن الحقيقه تبقى واحده ومطلقه..
ممثل شخصية مدير الناحيه : هناك حقيقة زلاطه ومدير الناحيه ، اعني حقيقة المجتمع ، حقيقة الوطن كله .. صدق المجتمع كله ان جسومي بطل من الأبطال. ولا يحق لأحد ان يقلب الأمر رأسا على عقب . لا يحق ذلك حتى لجسومي نفسه ... النصب التذكاري أصبح قائما ... متحفه أضحى مفتوحا للزوار ، ودخل التأريخ بطل اسمه جسومي ، تلك هي الحقيقه بالنسبة للمجتمع ...
ممثل شخصية زلاطه : وتبقى هذه الحقيقة ليست بالحقيقة المطلقه ... جسومي الذي كان هنا منذ قليل ، هو الحقيقة المطلقة ..
ممثل شخصية مدير الناحيه : وههنا يكمن التناقض الرهيب في الواقع... الحقيقه المطلقه لا تتطابق دوما مع حقيقة المجتمع .. لم يكن بوسع مدير الناحية ولا زلاطه ان يقولا ان جسومي الذي بدى سافلا هو نفسه جسومي الذي استعرضته الصحف والأخبار بطلا من عظماء الأبطال ... اذن ما اهمية الحقيقة المطلقه؟ المجتمع كان بحاجة ماسة الى بطل، وقد عثروا عليه .. الحقيقه المطلقه جسومي ليس حقيقة المجتمع .. ليس هو بطلهم ابدا..
ذلك كان جسومي آخر.. جسومي ليس اكثر من نذل وأفاق.. جسومي كان خائنا.
ممثل شخصية زلاطه : ما يحيرني انني على الرغم من عدم تصحيح ما قاله زميلي ، اجدني مضطرا لأن اسلك سلوكه ... أكان من واجب مدير الناحية ومدير الأمن ان يزيلا النصب ويغلقوا ابواب المتاحف بحجة ان الحقيقة المطلقة لا تتفق مع حقيقة المجتمع ؟ حائر انا الآن . ايهما هو الصحيح ، اعتقاد المجتمع بأن الخدعة حقيقه ، أم التوصل الى معرفة الحقيقة المطلقة ؟
ماذا لو اصر جسومي على الذهاب الى المدينه ؟ ، اقصد مدينة جسومي كما سموها.
( يعود الممثلان الى شخصيتهما التي يمثلانها ، يذهب زلاطه الى قاعدة التمثال ويجلس هناك بعد ان يشعل سيكاره. يتبعه مدير الناحيه ويقف عن القاعده )
مدير الناحيه : فد جكَاره ، هذه النذل أخذ باكيتي والشخاطه..( يسحب نفسا )والله اذا يسويهه ، مو بس اقتله .. اكَطعه وصله وصله .
زلاطه : آني هم طخت براسي نفس الفكره .. القتل!
مدير الناحيه :طبعا ، لأن محد عده استعداد يخيب آمال المجتمع... شخصيا هسه آني ما اصدك ابد.. جسومي هذه المرعبل والجذاب والمجرم والنذل واللي تنطبق عليه كل الأوصاف هوه بطلنا القومي.. بس تبقه الشغله تحير ..جسومي هوه وبنفس الوقت مو هوه.......
زلاطه : فعلا لو حست الناس بأن جسومي مو اكثر من شخص نذل صايع ،
أكيد يعفطون لكل التأريخ وبعد ميصدكون بأي ...
مدير الناحيه : ( مقاطعا )لك شلون فاتتنه؟
زلاطه : شنو؟!
مدير الناحيه : لو مدبريله هوية احوال مدنيه بغير أسم . جان فضينه كلشي.
زلاطه : لعد خل نصيحه ( يصعد الى المنصه وينادي ) جسومي .. لك جسومي تعال ، عدنه شي ألك ..جسوي .. جسومي .. ابن الكلب مدري وين صار ولا ينشاف..( يفكر ) بس حته لو كَال اني جسومي منو يصدكَه؟ أكيد راح يكَولون عليه مخبل.. سويته سوية المخابيل بالشوارع الي يتخيلون رواحهم واحد هتلر اواحد جلي جابلن .. واحد مدري ياهو ، يعني مخابيل
مدير الناحيه :وطبعا ماكو غير جسومي واحد، بطلنه القومي جسومي العظيم
.. ها وين؟
زلاطه : نروح.. صرت نبديد من التعب..
مدير الناحيه : آني هم تعبان .. خل نروح نرتاح..
( يتجهان الى احدى جهتي المسرح للمغادره . يظهر جسومي من الجهة الأخرى )
جسومي : هاي وين ؟ مو صحتوني ؟!
( زلاطه ومدير الناحية يتجمدان في مكانيهما من المفاجئه )
زلاطه : لك شو هم جيت ؟!
مدير الناحيه : بعد شتريد مو انطيناك كلشي؟
( جسومي صامت لا يرد )
زلاطه : ألك حق جسومي .. احنه صحناك ، جسومي انته يحتاجلك هويه .. بس لازم ندبرلك هويه ما بيهه أسم جسومي .. يعني غير أسم .. حته محد يعترضك بالطريق ..مو هيج؟
جسومي : عليش غير اسم .. آني اسمي جسومي وابوك الله يرحمه ..
مدير الناحيه : ( يصرخ به ) انته مو جسومي..
جسومي : يمعود كول غيرهه .. آني جسومي .. دكله يا زلاطه..
زلاطه : اسمع جسومي ! هسه انته مو جسومي ... جسومي راح .. بح ( يخرج من جيبه رزمة نقود ) هاك .. انته هسه مو جسومي . أفتهمت ؟
جسومي : ما اريد.. وهاك هاي فلوسكم ( يخرج من جيبه رزم النقود ويرميها على الأرض )
زلاطه : هاي شبيك ؟
جسومي : اريد اروح للولايه . . أريد أشوف النبكَه.
مدير الناحيه : كَصيناهه من زمان .
جسومي : اشوف مكانهه .
زلاطه : المكان هم راح .. صار بنايه من عشر طوابق .
جسومي : ميخالف .. أشوف العماره وأرجع.
زلاطه : لعد ليش ذبيت الفلوس بالكَاع ..
جسومي : عبالي اذا ما ارجعلكمياهه متخلوني ادخل للولايه !
زلاطه : لك هاي شبيك أثول .. مو دأكَلك اذا يشوفوك يشنقوك ..
جسومي : وانتو شعليكم .. خل يشنقوني .. صدك زلاطه انته يبن كلامك مسموع بالولايه ، كللهم خل يشنقوني .. يشنقوني بمكان النبكَه .. زلاطه وانته ابو العلوج أسمعوني كلش زين .. آني سويت كلشي.. بكَت وكَتلت وزورت وخنت الوطن .. وكل هل الأمور تخليني جوه المشنقه ، بس بكل مره اسوي بيهه مكسوره يطوني وسام.. ومو بعيد هلمره هم يطوني وسام اذا رحت للولايه ..
زلاطه : لك افتهم .. انته مو جسومي .. مو جسومي .. يله ولي .. روح ولي..
جسومي : لازم اروح زلاطه .. لازم .
مدير الناحيه : اذا انته مصر تروح للناحيه .. متروح منا عدل ( يخرج مسدسا ) افرغ هذه المسدس براسك ( يهدده)
جسومي : ( بتوسل ونفاذ صبر) لكم لخاطر الله ليش متردوني اروح للولايه!؟
زلاطه ومدير الناحيه : لأن انته مو جسومي.
جسومي : ( صارخا ) لعد آني منو؟!
مدير الناحيه : انته جسومي .. بس مو جسومي اللي نريده .. لأن جسومي مات .. استشهد .. والولايه صارت بأسمه.. والناس صدكت بحجي الجرايد ..
وبعد ما ممكن نرَجعْ التاريخ لوره ..
جسومي : لك داد زلاطه يا تاريخ ؟! تره كلشي مدأفتهم.. ليش تلعبون بيه ..
آني جسومي صديقك .. آني جسومي .. جسومي..
مدير الناحيه : لا انته مو جسومي .. جسومي بطل قومي وما خان الوطن ولا باك جيوب شهداءه .. انته واحد خائن ومتستحق غير الموت .. وآني راح انفذ بيك حكمنه ..( يطلق عليه الرصاص ، جسومي يقف مترنحا في المكان الذي بال فيه ويتكأ على التمثال تحاشيا من السقوط على الأرض )
زلاطه : (بلا اسف ) هاي الردتهه جسومي ؟! دروح الى قير وبئس المصير.
جسومي : ( متشبثا بالتمثال ) راح تشوفون ..راح تشوفون ، انته ابو العلوج وانته زلاطه .. اذا منطتني الحكومه نوط شجاعه آني مو جسومي .. آني مو جسومي ( يتشبث بقاعدة التمثال )

( أظلام ) 17/10/2008

#هادي_الخزاعي__- (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات