ديوان الشاعرعماد المطاريحي (المئذنة والبحر الاخضر)

عماد المطاريحي

الحوار المتمدن-العدد: 5254 - 2016 / 8 / 14 - 15:35
المحور: الادب والفن
    

المأذنة والبحر الأخضر


المجموعة الفائزة الأولى بمسابقة جريدة الصباح لشعراء العراق الشعبيين 2008


عماد المطاريحي


الطبعة الثانية




المؤلف: عماد المطاريحي
(المأذنة والبحر الأخضر)
جميع حقوق الطبع محفوظة للمؤلف
لوحة الغلاف والتخطيطات الداخلية للفنان
المراسلة على العنوان التالي:
عراق – ديوانية/ حي النهضة الثالثة

E-mail: [email protected]










قصائدي:

دستورا للحب
من يحق لهم التصويت
-الفراشات
-الأزهار
-الناس الحلوين
صندوق الاقتراع (قلب عاشق)
المكان: خارج جغرافية الخرائط
الوقت: من هذا الصباح.. إلى صباح آخر
صوتوا
لنعيد للحمامات أجنحتها
للورود براءتها
للحقول ألوانها المختطفة





إلى /

الإنسان في جنوب الأرض أم في شمالها.. اسود كان أم ابيض، ما دام وطنه المحبة ودينه الإنسانية..









(أمـــــــــــــــــــي)




أمي بسنين العجاف
نكتفي بريحة حضنها ..
ومن نجوع،
تثرد الجوع بلبنها!!
ولو عطشنه ..
تعصر عيون العطش وتجيبه ماي
وتحلب الصيف وتشربنه نده!!
وتطحن برحة صبرها ..
العوز وتسويه غده
* * * *
امي اخذ لونه الفرح من لونها
امي اخذ لونه الحزن من لونها
امي كاس ايامي حنظل
شنته بليمونها ..
ترفع بچفها لواء اسمه الحنان
وقربة العباس ماي عيونها

مره حزنت ..
حيل حزنت ..
لان خاصمنه الرغيف
نزل قرص الشمس حافي
ومدد بماعونها !!

ومن تسولف تمطر الدنيه دفو
ولو بچت تترس غطانه حمام
وتحط دمعتها مخدّه
فقره .. ما عدنه سرير
من عصر تفرش جفنها
وتضم دمعتها ضوه بجيب الليالي
ولذلك من يمرنه الليل بخدوده وشم

ومن تلولي..
تستحي منها الحروب
الشجر ينزع ضحكته ويلبس ثياب الغروب
والقذايف تعتنق دين الورد
والعراق يصيح
غطوني .. برد

والنخيل يقدم بصينيه عمره
ومن تهز كاروكنه ..
تنام المجره

أمي …
مدري من الوسن عجنوا جفنها
مدري من جفن امي معجون الوسن؟
مدري من طين الوطن مخلوقه أمي؟
مدري من طين امي مخلوق الوطن؟





أمي ..
جنة اليدخل بلايه حساب
وجنة الله تريد من عندك مهر

وأمي كعبه..
اتشيدت حب وحنان
وكعبة ابراهيم من طين وحجر!!

وأمي من تنعه (يوليدي)
تردد وياها المسله ..
ويوگف بطوله الفرات
بروح ابوچ يــگلها (عيدي)

أمي ..
لو صلت.... مناره ..
يصلي وياها الشجر

أمي لو تنسه الاذان
يصير مذهبنا حجر

ومن نغيب..
توگف عله الباب صفصافه حزينه
وتظل تدعي ..
وتظل تدعي ..

ربي يرجع بالسلام
مره رديت ولگيت مبيّض بچفها الحمام !!!




أمي خاف يمسنه سوء
تعوف قرآن العشگ وچفوف اديها ..

أمي من اتروح يعني نموت جوع
ولهذا اتعوف كل مره ثديها !!

- ويوم ترحل
يرحل وياها الرحيل
العصافير برجاها ..


أمي من تمشي النهر ينحب وراها
وعافت بـ(باب)الحنيه
معلــّگ ويندب گلبها..
وخاف نحزن خلت عله الرف دمعها

ومره دورنه الغراض
إلگينه دمعتها وضلعها !!!












((بعدين نبني جسر))


أتمنى عدنه شعب ما يقبل بموته
واتمنى عدنه
گمر ما تاكله الحوته!!

أتمنى أصحه الصبح ألگه عله بابي ورد!!
ومن امر بالسيطره..
تارس جيوبي برد!!
وماريد ساعد قوي..
ولااريد جرحك نسر


ممنوع يبچي طفل گلب الوطن ينكسر
ممنوع زينب بعد.. توگف بحضرة شمر
كافي دمار وقتل مو خلص حتى السدر

أنريد نبني وطن؟؟
نحتاج نبني فكر.. يستوعب المطرقه
بعدين نبني جسر!!!












- 1-

يذبحني منظر طفل أمزگه ثيابه
خيالته من گصب..
ويصيح نحن (العرب)..
وسلاحه نشابه
لو راد يلعب .. (عرك)
يرسم سواتر وهم




ويترس الگاع بجثث للخاسرين الحرب
بس همه نفس الجثث بالواقع اصحابه!!



















-2-

ويعجبني منظر طفل مرتبه ثيابه
من كثر حب الوطن - حط روحه بكتابه -
اتگول چنه نبي وساجد بمحرابه
اشگد عنده طيبة نفس ويلاه .... يايابه!!
من زغره ابوه منتبه.. معتجب بآدابه
من يشتكي من العطش..
ما يشرب ويكتفي، ايشرب اللعابه!

يمشي وي ابوه للحقل..
يشتل مروءه ومُثل..
ويترس شليله فرح ويوزع احبابه
يرسم طيور.. ومطر..
ويغسّل من المطر..
ويرسمله كوخ ونهر، ويمدد بـ(بابه)
يطلب هديته ورد لو نجح بالمدرسه
ما يطلب من الاهل
جيبولي دبابه!!!



















((بوسة عيد))




الى (إ) نافورة العطر الأسمر..



من سمارك
رضعت الحنطه سمار
وغنج شرّبت الطيور ، وفرح شرّبت الزغار
انتَ وحدك ترسم بروحي النهار
انتَ من تنزل ضحكتك يصعد بروحي الخضار
انتَ من تسكت مناجل تحصد بروحي الخضار

ومن اشوفك حضني يدفه
وحده يدفه ، مدري ليش
وروحي كلها تصير شفه !!
تذكر الغيم الصعد مره بسماي؟
ومطرت عيونك غوه ثلاثين ليله ..

واعتذرنه من السوالف
والنوافذ والضوه
والخناجر والقبيله
وفصلت جفني ستاير
وشيعت روحي بخور وقدمتلك گلبي – هيله –





وخضرت كلي عشب ..
من راسي حد راس الجديله ...
ومن تغيب
الورد يسأل والنجم والحلم ، وذراعي
ونبض گلبي الحنين ..
كلها تسأل – وين –
وين – وين !!
وين غايب .. ؟
واني جامد ... !!
ومن أشوفك
إگبالك اتخيل سرير وحضن دافي والليل بارد


ياملاذ ودنيه غابه
غابه مزروعه خناجر
أنتَ وحدك تسكن بروحي قصيده
أنتَ وحدك ممكن تسويني " شاعر "

وممكن تسويني – آنه-
وممكن تسويني- غير-
ممكن تسويني دمعه
وممكن تسويني شمعه
وممكن تسويني طير

أعطش
وشفتك كوثر ؟
أبرد
وطولك حرير ؟




وياك أحب حتى النهار يصير ليل
وياك أحب اقره الخرايط من جديد
وياك أحب الريح يعصف
حيل يعصف ..
حتى أسد شباكنه بحجة الريح
حتى أفك شباك ( رفضك ) وأستريح
وياك أحب إيامي كلها تصير عيد
حتى افلح شفتك بوسات..
واليمنعني – أگله اليوم عيد –



ـــ ياحياتي ـــ
لان أدري انتَ فراشه
قررت أبقى غصن
وانتَ يلكلك ترافه ...
آني محتاجك حضن
وماإگلك آني – أحبك ..
خاف يتغير طعمها ..
الشفه خاف تبوگ من عدها الترافه
ولذلك راح اضمها ...
...................
...................

ـــ أغنيه أخيره ـــ
جوعان
ماخذني الخجل
ونهدك طفل اگبالنه ايبدي عسل!!!



((مسخرة))


مسخره
الكره الارضيه مسرح
يعرض اكبر مجزره
ينتحب جزء الجنوبي ويستغيث
ويضحك الجزء الشمالي من الكره؟؟
مسرحيه تجسد احلام الكراسي

الستاره بلا ضمير
الاضاءه مزوره
كل بطاقات الدخول مزوره
كلشي بالمسرح غريب
اخذ ديكور الجماجم — واخذ جثه مبعثره
محور القصه عصابه

المؤلف من توضه بدم حمامه؟!
العصابه – الذبحت احلام اليتامه
بين بوابة جهنم
وبين تحذير القيامه
ينهض الطف يمتلي المسرح بدمعة كربله!!!
يمتلي بدم الرضيع
يمتلي بلاء الحسين




لا—لا—لا—
لا..لكلمن ينتخي وماينتخي..نعم للماينتخي ويلزم سره
لا..لكل مثل وفه ومابي وفه ..نعم للجسد وفه ومادبره
لا..لثورية حرف وكت السلم
لا..لسلم الحرف وكت الزمجره
لا..لكل لافته انخطت للامام ..بنية ارجع ليوره!!!
ومعذره..

- للاقلام اللبست اثياب الشرف
- للشريف الماتوضه (بمحبره)
- للخطيب اللبس چلماته چفن
وشال تابوته خشب .. من منبره
- لليصير بعوز خوانه جسر..من تهب الريح يتحول ذره
لليموت ومن يحسبونه عدل..
لليطلگن غانماته بدفتره
للفقير الماتوسل بالرغيف..ولاسنونه بخبز غيره موشره!!

ياترى...
من .. يجاوب ياترى؟
منين أجيبن علي ..وفقار ..وكتاب ..
ومنذر ينادي بشعاب ام القرى...
شجب...واستنكار
ملينه الشجب ..



الهتافات القديمه مزنجره!!
يمته..نسرج خيلنه ويبدي الزحف


نغسل العار...وشرفنه انحرره!!





اني احب
أولاً...اني احب الماعقد هدنه ويموته وسايره!!
ثانياً...اليلبس جروحه اذا مسه العره!!
ثالثاً...اليفصل ثوب ليله وماحتاج المسطره!!
رابعاً..تابع..التابع عبد...حال العبيد...ومالمست التابعيه بعنتره!!!
خامساً..
سابعاً..
عاشراًَ.. أسف ماأگول... ... !؟










((إستفتاءات شعرية))















مطابقة لفتاوى السيد الضمير

* الساهون

- أفضل من ناس يصلون
يحسبون إعله الله الركعات
وتالي الليل ..
يتوضون بدم الفقره

* الصايم

- عن دم الناس

أفضل من صايم رمضان
ومتطوع..
صايم عن جده؟
ويفطر بآخر يومه بخبزة غيره








* الشايل ورده

- أفضل من تمثال يدوّر( قبله)!!
بس لو .. شاف الناس
يطول السجده
حيل إيطول السجده ..




* ماحكم اليزرع

- اليزرع طبعاً ينفع



*واليزرع رمان؟

- أكتب لاتزرع رمان
لازم يزعل حرف الراء إعله الرمان؟
حتى يصير بــ( بيتي ) أمان
لازم يزعل حرف الراء إعله الرمان
حتى الطيبين ..
إيردونه لحضن البستان






* الراد يحج


- خل يحفظ جاره ...
حرمة جاره ... أكبر من حرمة بيت الله!!
لن ربك من تهدم بيته
ممكن يغفر
بس يزعل
من تهدم بيت يعود – لعبده –



* الراد يجاهد

- خل يغسل ذاته ...
خل يلزم مهرة نزواته
خل يفتح بسطيه ازغيره
بـ(باب) العوز



* اليتصدق

- مو بفلوس ..
ممكن يدفع ضحكه بريئه
بوجه الناس التعبانين
يضمد جروح الناس
وينسى جروحه


* الناسك

- خل يرفع شوكه من الشارع
يعلم طفله يصلي عراق
إعله أجمل سجاده
تمتد..
من الفاو .. لزاخو


* الماباگ المصرف

-أفضل من واحد يتمنى يرد يوم الطف
.. ومن ردّ الطف
عاف حسين لوحده ينادي الغوث ..
وراح يلبي نداء المصرف !!
باگ المصرف !!


* الماباگ المصرف ؟

-أفضل من واحد چذاب يرتل مصحف









* الفاعل

-كافي يظل مرفوع
والمجرور
كافي يظل مجرور



* السلطان

- صورّه يحطهن بالجنسيه
يشتري ألبوم؟
بس لا يترس وجه الشارع
عدنه أطفال
تخاف البوم!!!



* الأول بالإيثار


- الماصب الزيت عله النار
الحط طابوگه بسور الدار








* رجل الدين

- إمبين لو صار البنيان
شايل طاسة طين
والمغرب يرجع لطفاله
بخبزه وتمره
وسوالف عن الحريه




* الشايل طاسة طين
- آني باستفتائي الشعري
أعتبره أفقه واحد بالدين !!!















(( العش والحطاب))



العش مو حطب !!!
خل يفهم الحطاب
العش بيت شرعي وساكناته طيور
وأحياناً يضم عشاگ متصافين ..

أحلام ،

وأريكه
ونافذه إعله النور

أعله غفله من الزمن
لن بيتهن مهدوم ...
والغصن اليشيله من الاصل مبتور

الدستور؟؟
منقوص إعله هذا الحال
الحقيقه ، العشگ لازم ينكتب دستور
العصافير أعتراض إلهن أعله الحطاب
جاب عشوشهن
ونطاها للتنور !!!
******







أزرع گاع روحك
رازقي ونسرين ..
وأشتلها گصب من يشح ماي الهور
وأفطم منجلك
لوراد يحصد غيم
وأكسر منجلك لو راد يحصد زور؟
واخذ دمعة عزيزك
وأستعيره أفراح
ولبسه العيد بيدك وأكشخ بعاشور!!!

أنشدني ..
العسل ماضايگه النحال ..
القاروره بيده
والعسل محضور
من تلثم فراشه
خدود زهره تنام
تسكر بالندى وتطيح بالمحذور
شارب من خضار
عيونك الصفصاف
وراضع من بياض خدودك البلور
روح أشتل حياتي بشجرة الصبير
أنا احلامي عوانس
مايهمها البور!!
أفرشلي ضحكتك
خلي ، أمدد كيف
وخل في ّ الضفيره يدغدغ الناطور






تغرف روحي مني
بچفك النعسان ؟؟
وتشربني خطيه وخاطرك مكسور!!
جمعنه المايصير
البرد والنيران
شفتي تنث بروده
وشفتك تنث نور

يقام الحدّ
على من لمس شفتك يوم ؟؟
ويُحاسب ، مثل مايتحاسب المخمور
أخذ مني دمع
ماطالبك بالدين
يمته النهر راد فصول من ناعور
تدريني سَليل ،
الما يشم مشموم ،
إبن بيت العفاف
الصاوغ الله نحور
بعد شبرين عنك والحضن ينخاك
أشم ريحة ثيابك
والگلب مسحور
ياجنة عدن
يادنيه تنبت روز
ياسحر الهند وأحلام نيسابور
هسه الحب حضاره
وبابها كرستال
تتلاگه المجره بكل مسيه تدور
أنا روحي ندى
وروح البنات ورود !!



أنا موتي ندى
وگلب البنات أگبور !!
بالك تحط روحك
دكـه للتغسيل
جثمان الفرح مافززه الكافور؟؟؟

















((تراجيديا وطن))























قراءة تراجيدية لانهيار كوميدي


- الزمان (آخر ورگه من آذار /
تاسع ورگه من نيسان )

- المكان (كل الوطن شبر..شبر)



- يطفي النور
يبدي المشهد باول دور
ديناصور!
التهم المسرح والجمهور
أكل الناقد والديكور
شرب النور
- يضوي النور
يفز المسرح والجمهور

لا.. تمثال..
يا حيال..!!!
چان يمثل ديناصور



2
- وصوت طاح
الناس ركضت.. طاح.. طاح.. طاح
طاح تمثال (الخليفه)
شاهد.. من سمع صوت القذيفه
اخر.. انغشه عليه
ثالث.. طاح سيفه.. رابع .. طاح زيفه
- صاح نحات التماثيل الوجيه
طاح من يومين تمثال (الخليفه)
هذا تمثال الشبيه!

- المسرح بعيونه شضيه
وجه تبخرّ
يتثاوب وفراشه طيوف
وزعّ حلمه الحلگ اظنونه
ودار بكاسه جروح وخوف

- ضوه
ابو نؤاس.. كاسه فارغ
..راسه فارغ
التفت ماكو امير.. ولا خيول ولا بيارغ
اليجيدون الصياح
المايشرفون السلاح
الخالفو درب الصراط
المشو درب السياط




الشعراء اللاعبين
الشعراء الاحتياط
راد يقره اخر قصيده..
التفت ماكو بلاط!!!

- شاف دجله يغسل ذنوب القصايد
غسل گلبه
وردّ غسل گلب المنصه
طالب بعدة حقائب
ضمن تشكيل الوزاره الهامشيه
وكاسه فارغ
چان مثقوب بشظيه!!


- وبالهروله..
الزعيم التحق باقرب (مزبله)
من الجحور
يصيح حي عله الجهاد
قاتلوا المستعمرين
انتم احفاد الحسين
السنه ممنوع الزياره الكربله!!










- من بعيد
صوت (زرياب) المغني
ونفس عوّاد الامير
تكررت نفس المظاهر
القاعه والجمهور والمزمار
شباك التذاكر
زلم عوز
الفرق بس (الامير)
اليوم صاير (قره قوز)




- إعله المسرح ..
ممتده جنازه
تغسلها دموع الجمهور
المسرح بيده الكافور
وكلها تمثل دور الخايف
ومزروع التاريخ اگبور!!!
انفاس العالم محبوسه
وطن بجيب الدكتاتور

- عنتره.. اتنكر بهيئة مره
- حاتم: اليطعم الجايع متسول لزم بيبان الجوامع
- (عروه): ذاك ابن الورد
مات ماشاف الورد




- السمؤل: باع سيفه الغجريه
- المهلب: هارب من العسكريه
- المهلهل: عاف دم (كليب) وتقبل الديه

- العربات البابليه!
ترست عيون الشوارع
ضمن شغل البلديه!!!

- المشكله الثور المجنح
رادو يحلبونه ما جاد بحليب

والغريب..
اشتراه گصاب ( ديمقراطي) جداً
ساطوره عصري.. كلشي يذبح
حتى لو يذبح ضميره
المهم يربح.. زبون



- وزي الهوى
هاي اول مره اغني وجرحي يفرح بالدوه!
هاي اول ساعه من يوم القيامه بالشكل والمحتوى
هاي اول مره يتساوى الفقير ويه الامير
كوخي والقصر الاميري بلا ضوه..







- ومنشورات
مطر المسرح منشورات
صور واسماء وناعور
ودنيه تدور
مطلوبين .. مطلوبين
اللعبو عالمسرح شكلين
الباگ الفرحه وذبح العيد
الذبح الهور
مطلوبين .. انكشف الدور


- الياكل من راس التاريخ..
اليشرب من دم الحلاج
- العاف المهره وباع السيف ونزع التاج
- اليضحك والنهران تموت
- الراد يحط شعبه بتابوت
- اهل الوجهين..
الكل مطلوبين
...


ومشهد موته
افواج افواج
وطن أمدد
بين الجوع .. وكرسي العاج !!!



- المشهد.. خالي من الشاهد
والنص فاسد..


- وحمورابي
لسه يحلم بالاماره البابليه
والطقوس العسكريه
يريد يتفقد الناس ويعرف احوال الرعيه
نزل بالمره الاخيره.. بليله ظلمه
وچانت الدنيه مطيره
يوم .. يومين
شهر
وحمورابي لا وصيه ولا خبر
استنفار
من مدير المتحف الحد التماثيل الزغار
وين راح
وين صار
حمورابي من يضيع اكبر خساره
واخيرا..
اتصل جندي من التحالف
حمورابي..
يريد دشداشه وفراش
وحيل معتاز الجگاره !!!

--------------





- وعقرب الساعه
لدغ حيل الزمن
والوطن ضايع يدور عن وطن!!!
وآه يا وطن..


- المسرح صامت
وحقي الشبلي بغير لسان
والديكور بغير عيون
يتلمس وين البيبان..


- الطبري
عيونه تنشد لسانه ما شايل سوالف
راد يكتب ما لگه يسجل مواقف!!
باع (تاريخ الملوك)
واشتراله رغيف حار
رغيف من تنور ما نصبو (تتار)
نوخ (بعيره) إعله دجله
وشطب سجله
وفرش سجادة دمعته
ومزگ اوراقه الكتبها لكل امير..
لكل خليفه
ورجع يكتب من جديد
من سقوط الصنم
حدّ موت الصريفه!!






- وضحك المسرح..
وقنديل توهج خدّ دجله
وخيط جرحه المسرح كله .. بـ( بسمة) طفله


-الشمس صاحت (يا عراق)
طاح تمثال (الزعيم)
وحطت بروحك قصيده
وحطت بروحي فراشه


والحمام..
وگف بالكاظم مناير
وشفت (ليلى الاخيليه)
قرت (بالمربد) قصيده
وصفگت للحاج (زاير)
ورجع گلبك..
والعراق وگلبي شاعر
آذار / 2003










((السما مطرت عصافير))



مد ، چفوفك اغرگ بيك
اغرگ حد اموت ،
الموت يمك طيف ،
ياغض ،ياترف ، يلما عرفت الزيف
دنيا عيونك وتمطر
عصافير ، وفراشات وورد نعسان ..


ثغر ؟ ينزف كناري ونوم !!
ضحكاتك اتخضر نوم .؟
ونهدك بالعسل مختوم !!
شفافك لون جوري
بطعم ... فلفل حار
ممزوج بتمر مكتوم..


منهو الگالك تمثال ؟!
يا تمثال ؟!
انتَ احساسك يكفي شعب محروم !!!




وحضنتك ..
والعسل يگطر من الشباچ
حضنتك
واشتعل حضني وطفه الشباچ
حضنتك ..
وانتَ تشربني (غوه) براسك
وأصب روحي ( نده ) وتشرب ..
ونزلت غيمه بيضا
وشرّبتنه الليل ..


نزل وحي الغرام ..
وشرّبانه ـــ الناي ـــ
وغفينه ونامت الساعه
وغفه الشباچ
وصحينه وما صحت فيروز
والشباچ !!؟
















((فوتوغراف))




* سعال

فتحت عيوني إعله الدنيه
وامي تلولي إعله الثار
اتسولف عن جدي العاشر

چان محزّم – يمثل( ثائر)
وشارعنه يعاني الاهمال ...
وتحيط بمدرستي مواضع
وعدنه معلم ..

چان محزّم ، يسولف عن الميدان
عن الرده ..
إعله الجولان..
علمنه البلبل فتان ، معقوله البلبل فتان !؟
فتحت عيوني إعله الدنيه









ومدفع يسعل !!!
يسعل من يزعل سلطان
يسعل من يفرح سلطان
بالاعياد ..
بالاحزان ..
يسعل من نكبة تشرين الحد الآن !!!


- مشارك في خمسه حزيران

- مشارك في سابع عدوان

- مشارك في ذبح السكان

شگد مسكين ..

نفس المدفع ، سد عيونه وضرب حسين
مازال يعاني الادمان
مايدرك ضرر التدخين !!











* شارع

كاتدرائيه ودم راهب
ومسجد ماضاگ الاذان
وانجيل إعله الرف حلمان
وقرآن إعله الرف بردان

وشارع يخجل من يتمدد ثوبه اسنين بغير اردان !!!



* طيور

- طير يغني بلا جنحان
ويسولف عن الحريه

-وطير إعله الشجره ومرتاح ينادي الثوره ..


وابن العاص ..
من يتمكن يرفع سيفه
ومن يتوازه يطلع العوره !!








* حصان
- أشطب..
لاترسم ميدان

طلعوا من ورق الفرسان
بالساحه انشيد نافوره

لو عصفور يشم عصفوره !!
مو كل ساحه إنحط حصان !!!























((كتبوا بلوح الثلج))


-1-

ضحكه ميته..
وحلم فاسد ..
ظنونهم تشتم يقينك
لأن عالمهم خريطه عله الجدار
من صحو
ماشافو عرينك ..



-2-
ضيعوا لون الخريطه
ورسم الجدار
وشربوا دموع الجدار
من وريدك
صار مفتاح القرار
دفع شريانك
معاناته نذر
واحتفل بيك النهار





-3-
من طلع نجم الثريه
الغنوا
بشجرة احلامك
اتبينوا غربان سود
الشمس
صاحت حرامي؟؟؟


-4-
اشتل..
ظنونك خيم
ازرع..
دموعك شيم
المعول
اليهدم احلامك ...مات غيض؟
ويلفظ انفاسه بدهاليز الندم!!


-5-
من غمض جفن الشمس
كتبوا بلوح الثلج تاريخهم
وخضبت تاريخك .. بدم الحجر






-6-
أنخه عزمك
ينتهضلك صولجان
وسكّت أوهام الشته
بهمسة دفو


-7-
ياغرس دين المحبه
ازرع ايامي وفه





-8-
انتَ اخر حبه من زخة حلم
واني اخر قطره
من دم الشعر
نصرخ بوجه الصبح
وين الورد ..
ونمسح العثره بمناديل الصبر؟؟












((قررت ابقى فقير))



أسكن خربه كان الطنطل قد غادرها مهزوماً قبل سنين



اني احس روحي نبي هذا الزمان
معجزاتي ثيابي بيض
بوسط عالم ثوبه غيم
رغم تاريخ الدوائر
والخطوط الجانبيه
والارقام المستحيله
وانا عايش مستقيم

اني عوفوني .. نبي الشمام
والحب والنسيم
آني يكفيني الوحيد بهالزمان
لو فرغ جيبي أگول الله كريم
وغيري ...
من مليان جيبه ..
يصيح لله يامحسنين !!





وعشت بالدنيه يتيم
بزمن بي شاب الجنين
بوطن بي ردت قريش
وماكو أبو طالب حنين؟
وبيتي جرحي ورفضي باب ..



ماافكر أبني موضع
ولاادور عن شبيه
ولااخاف من انقلاب
وماأفتش عن مغاره
وروحي يسكنها حراء!!



ـ شعاراتي :

قل أعوذ من الحضاره ....
التوگف اعله اشلاء اهلها ..
قل أعوذ من الارث لو صار آفه
قل أعوذ من الخلاف عله الخلافه!!















- قراراتي :

1. ما يجوز أشعري يرجع حكم
لو منافق يرتقي المنبر امير

2. ما أحب بالمدرسه
ينادون وين ابن الوزير

3. ما أحب قصر الاماره
يشيل خشمه عله الفقير!!

آني كائن من حرير
ينذبح عصفور أموت
ينولد عصفور أطير ...

وماكو ضير
من تطالبني بكتاب آني قرآني ضمير!!





وما أتوسل بالبرد
الله سجلي سماه كله غطه
والعراق ..
عرف ماعندي سرير
گال ... هاك الخارطه







جاري أبو ذر الغفاري

من اجوع ... يقسم وياي الرغيف

ومن يجوع بچفي أشربه دموع عيني
وثلمه من گلبي العفيف ..
والغموس شويه ماي
من نهر مد روحه غِيره ..
حتى يروينه محنه

عندي خير
شماغ إبوي من نمده ..
تنام بي دجله وفرات

وشيلة أمي بيها تتغطه العشيره
وتستر جروح البنات

عندي ثوب ..
عندي خبزه ..
وكوخ عندي ..

عندي أمان ..

وگلبي سجادة ندى
يصلي عليها الاقحوان
ومن يشح بي الفرح
أستعير .. ضحكه خضره
حتى اضمها الصاحبي بموسم
( الماكو )


ومن يمسني العوز أغني
حتى اسجل تهمة (البطران ) ضدي!!


وعيدي من يطعمني فرحه
ما اضمها ..
اوزعها اعله الوجوه الما عرفها
إعله الزغار
إعله العجايز
إعله الشبابيچ النست طعم الضوه
إعله العيون المانشد عنها الضوه
إعله الضوه المحد يگله انتَ ضوه!!!

آني يكفيني فقير

ما اسد بابي لان باب الله بابي
ما اكلف عيني تسهر
ولا احط ناطور يندب منهو ذوله ؟
ولا اتعبلي حرامي
يزورني ومايلگه حاجه !!!

صعبه من يطوي مسافات – الرذيله –
ويجي مايترس شليله ؟
يصعد بسلم ذنوبه
ويعبر سياج الخطيه واصرخ بوجه حرامي؟!!







استحي ينزع حيائه ويبقى عاري
كون ابدل بيدي ثوبه ..
كون املي جيوبه
چكليت وچفافي
خاف طفله متانيه ، وتذبح حلمها ..



مااتراجع عن قراري
مصر أن ابقى فقير
- ما اجوع وعندي اخوتي
- نهر واحدهم يصير
- جسر واحدهم يصير
- خبز واحدهم يصير


- نخله بصريه حنينه ، سمعت اطفالي عرايه
انتفضت ونزعت سعفها
ودّت الكوخي حصير!!!
















((مراسيم الضوه))

يا درج دنيه الفرح
يا تراتيل الشعاع..
الطرزت وجه الصبح
يا مراسيم الضوه وحلم الضباب
بحة المزمار تهديلك حلم
ولوعة .. التفاح ..
ترسملك جواب

يا ورد .. مزروع
بسفوح العمر
اشرب ذنوب الخواطر
عرج السدرة حلمنه
وصيح ..
بوجوه الخناجر
من عرفتك ..
عاند الساني الجرح
ماتن الچلمات وظنونك ..
رصاص
الليل ..
يتركلي فواتير الصبح !!







الليل .. قارب ذكرياتي
- انتَ قارب للطفوله
- جرحي ..
قارب .. للألم ..
جعت للضحكات ..
مجدافي اعتناك ..
أحس .. بسماتك مناديل الربيع
ويه ..
كل حبة مطر ..
يضحك شتاك
صوت ساحر ..
ناي مفجوع بقصيده!!
أنثر نجوم الضفيره
أفرش المهجه فيافي
ازرع ..
الجرح
التريده



حبك بعرض امنياتي
بطعم جرحي
بطول سجادة صلاتي
تحلم ابحور الرمال .. بلون وردي
وتحلم ..
أحلامك
بسلة ذكرياتي



علمتني ..
- أجمل اللوحات من نوح الطيور

- لو نطق حرف القصيده ..
يضوي نور

- لو ردت تجمع عسل
صير والي عله الزهور

أحتضن حلمي الجديد
أسبح بعالم عيونك
أكتب سنين العمر
كل لحظه عيد

وانتزعنه الفجر من چف الظلام
من الورد نرسم فراشه
من الشعاع نخط
قصايد ..
يا عصافير الخضر ..
شباچي نام


















((ذنوب النهار))
لأنك الشمس فأنك تهب الدفء للجميع


- گال إبوي إتحب علي
- گتله أذوب

- گال ذوب (بشرط أن تعرف علي )
علي يؤمن بالحوار
يحترم رأي المعارض ضد قوانين الأماره...
علي يوليدي حضاره
علي ماأطلق سراح سارق أموال اليتامى
وأعتقل واحد مزاجي
برمضان ...
جمع كل حالات رفضه
وقرر يدخن جگاره !!!
بس جگاره..

علي مايقبل بتقسيم الشعوب
ماكو عالم ثالث بعالم علي ..
علي أول خارطه
ماتأطرها حدود ، ولاتمثلها مسافه




علي نور ..
ينتمي الكل الجمال ..


علي مو صحنه النجف صحنه الارض
علي لو صلى عشگ
يمتد شعاع
ويوگف بهيئة ندى طول الفرض!!

- علي يوليدي العراقي
شفته من مر الحصار
لابس ثيابه القديمه
يغمس رغيفه الخشن بدموع رفضه
وما آكل وكت الفطور .. قدّم رغيفه لفقير

علي من جاع العراق
شطر گلبه !!
بدون مايسمع صراخ
بدون مايسمع أغاثه ..
بغير ذله بلا سؤال
قسم گلبه

الفقراء أهل الجنوب
الفقراء أهل الشمال
ولبّس أطفال العراق ثياب عمره
وأرتدى ثيابه السمال
علي تاريخ الرجال ..






- شفته من مر الحصار
واگف يدخن فرط !!
ويندب بوسط الزغار

- أبشروا أبناء ( الجديدة )*
لازم يرد النهار
والعراق يرد معافى

- بانتفاضات الشعوب إعله الكراسي
علي ظل هو الامام
- بالحروب .. علي شال السيف مرغم
رايد يجيب السلام
- بالمزارات الكريمه
علي طش جروحه حنطه
نذر لعيون الحمام

- بـ(برلمانات )الشعوب
علي ظل نقطة نظام !!
بالشوارع ..
علي واگف بالشوارع حتى مايحصل زحام
بالمدارس ..
يعبر أطفال المدارس
من محطات العبور
علي يمثل الاحترام !!
علي يمثل الالتزام!!




وردّ إبوي أتحب علي؟
گتله أذوب..؟
گال أسالك...

ممكن أطلگ جروحك بالثلاث؟
ممكن تعيش الفقر وانتَ أمير؟
ممكن تبين ذنوبك بالنهار؟
تفتش أعله اطفال جارك ..
مو اطفالك !!
من يصير الانفجار!!
- ممكن تعيش الوسط
لايمين ولايسار؟
بأختصار
تظل عراقي ...
بس عراقي …
وآخر شرط
لاتفكر تسجد بحضرة زعيم
ولا تدنگ راسك الكاك النفط!!








ـــــــــــــــــــــــــــــــ
*أقدم حي شعبي في مدينة الديوانية








((أحب الليل))

أحب الليل
بصمته ... برهبته
بثوبه المطرز خيل
الصرايف
تحت جنحه تنام
أذوب .. بحضنه المهيّل
دمعته البيضه يفرشها
ويغطيني بحمام ابيض!!

أحب الليل
فراشة ورد سكرانه تغني لكل غصن حلمان
الليل يضيف كل زهره
.. يزور كل بستان
يجيب ..
لكل جرح جمره
إعله چف قنديل
.. يفرشلي الموائد وآكل بـ(بالي)
واضوگ بعيني من طعمه
واشرب من نبع حسه






- اركب قارب احلامي
بشواطي الليل
من مرسه الطفوله لحد مراسي الشيب


- أحب الليل
الليل يعوض الخسران
الليل يتوج الفقره
تيجان عله چف الروج
بس تطلع شمس يتوسلون
التوج !!


أحب الليل –
من ينشر عباته
ويضم عصفورين ...
وأنا وياك أحب الليل
خلص كل الحچي ،والليل ،والهمسات
ومات آخر نفس من مستحه الضويات
وبگد ماحضنتك..
سبل عينه الليل









ومااشبع ...
خلصت ريحتك من كثر ماشميت
ونفذت شامتك گد ماخذت شمات
خلص ماي الضفاير ،
واني اصيح الماي !!


وتمدد أگبالك ..
وانتَ من روجات
خلصت شفتي وماطفت بي النار!!
وخلص خدك من البوسات!!


وماأشبع ..
وأحب الليل


















((شرف دجلة))

علي بابا (موحرامي)؟؟؟
لاتظلمونه ابختكم ، الزلمه تاريخه نظيف
جداً.. (عصامي)
باختصار ( إبن أجاويد )!!
وزّع الحريه لابناء الشعب
بالشته جاب الرطب ...
وزّع علينه مساكن
جيوبنه نترست سكينه
جاب بالصيف المطر
زرع تموز بـ( برد )
وعالبطاقه
بير من نفط العراق الكل فرد!!


الوعد ناكل عنب
ضاعن علينه السلال...
وكفو من ولد ( الحلال )
عاشو الساده الحمر
الموت للساده السمر
وكفو من الساده الزنوج !!
السچچ عوج..



الزقوره ..نصبو عليها (هُبل)
ثاني جديد !!
وكل نساوين المحله نثرن بحضرته (ملبّس)
كلمن يحددله قبله ...
كلمن يحطله شريعه ...

وبالمزاج ...وماكو ..زور
وگفت أحزاب الطحالب
تنافس ( أحزاب الزهور)
أحزاب غايتها الانسان !!

- من معاش
- السكن فاخر
- جوز مالح
المهم عندك أسنان!!
أحزاب غايتها الاحسان
الاقربون ...
(سعيد حضك كونك من الاقربون)؟؟
الابعدون ...
( يطيح صبغك كونك من الابعدون )؟؟
كلهاغايتها الانسان
الرفق بالحيوان ...






والشعار الأزلي ( ترى للحايط إذن )
أكرر إذن وحده
مو إثنين ..
وحده گطعوها لأن مره تخاذل
ما كتب تقرير زين !!


- وجبهة احزاب النبات
اخذ حزب - الشمبلان –
- واتحاد العاطلين
المن ضمنهم اني وانتَ


وبوشكين..
ويسنين ..
- وحزب ثاني
- وحزب عاشر

وجاري باع عگال أبوه
حتى يشري رغيف حار
مستحي چان من أبوه
ماحفظ تاريخ أبوه
ومحرج يشوف الزغار
الجوع كافر ..
الشرفاء
ثلث منهم مات جوع ..
وثلث يتأمل الغيم يجيب صيف
وثلث آخر عيب أضيف
راح أسولف
ناس ماتت عالرصيف
وناس ماتت بالمصيف
الشارع بتابوته ينزف
ومات مذهول الرصيف
وقصر مبني اعله الجماجم
وصولجان
وتاج بي ريحة مذله
واحنه نقسم ياعراق
مانعوفك ياعراق
وشرف دجله ...





























((حزن النوارس))



أجوع ..
ومنهو يدري بحالي جوعان؟
الينشدني أكَله أتوسط الخير
هواي تنازلوا من مسهم الضيج
وانه..
إعله الماي اغمس خبزة شعير
مامديت چفي بحجة العوز
ونمت جوعان يم اهل التنانير!!

صدگ مجروح
بس ماعوفك أوحيد
تلوع أطفال وتنوح القوارير
وگفت جروح واتحملت السيوف
ومشيت أدروب مزروعه بمسامير
وصحت مابيع
والغير أشترى وباع
ولابدلت حبكم بالدنانير؟







صحيح أتبدلت
بعض العناوين
وصحيح أتغيرت
بعض التصاوير
بس ظليت ثابت رافع الراس
أصيل ويكتب بچفه المقادير
أهدعش كوكب سجدلي وماتعاليت
وكتمت اسرار اخوتي وقصة البير!!


أنه..
بگاعك زرعت جروحي دايات
ثارن دون ساتركم شواجير
وجبت الگاعنه النوماس نيشان
وصفن عشرين مليون الاساوير

جبل حمرين
أخذ من خوذتي اوشاح
وتتبعني الخنادق وين ماسير

أمس قرصي وهويتي تعنوا البيت
دگو بابنه بحجة مسايير
گالوا لامي وين الچان عنوان؟!
عدل ، ميت؟؟
نريد اليوم تفسير؟
يخاله الطف بدت والطاغيه يجول
ونريد حسين محد يقبل يصير!!!


توضه بدم وريدي وكبّر السيف
ونوح أمي مأذن خضرّ ودير


أحزنت دجله
إعله موتي وصبغة الثوب
وبچت حتى النوارس والمزامير

انه ياصاح ضاع الملف بالفاو
ومادونت موقف بالاضابير
ولافضلي حسبته اعلى الوطن دين
ولاسجلته باوراق وفواتير
احس الوطن خط بروحي چلمات
كتب هذا الرجل ماعنده تقصير؟؟
1999

















((وطن بلون الناس))

بلون الطين
أحلم بيت لكل مسكين
بطعم الماي
ارسم كوخ وراعي وناي
أرسم حنطه
بلون الفضه
ماتندل خدها الغربان!!

امزج كل هاي الالوان
وارسم وطن..
بغير احزان
مابي مثكوله بواحدها
وأم تتوسل بالسجان
ولاقيد بمعصم عريس
ولازفه الغرفة دفان

ولاعكازه ..
يوميه تشيع إلها جنازه
وطن بلون الناس
مابي واحد يهدم بيته
ويعمر بيت الترباس!!
مابي ناس تموت إعله بعيرة جساس






مابي دمعات بتصريح
ولاضحكه تمر بالتفتيش

ولاجاسوس إعله الشباك
ولاحراس
لاملعون يفتش راسك ويصادر غيرة عباس!!


مااريد نشاهد سياف
ولاعلي بابا ولاحواف
مانقبل مقبره ممتده
من الحد .. للحد
وسفاح يسميها حديقه
ومجبوره العالم تصطاف!!

وما ازرع غابه بنص وطني
باچر ينزل بيها الذيب
ولااشطب تاريخي بأيدي
واكتب بس عن سنحاريب؟



احلم وطن بلون الناس
بي باچر احلى من اليوم
وطن ترابه نجوم
اطفاله نجوم
انجومه انجوم






وطن الفقره
السهرانين وورده تغفي ..
وطن الفقره العدهم خبزه
وماي ووطن ويكفي



وطن جروحه احباب
اشجاره اخوان
اعشوشه اخوان
كله ربيع مابي آب..

- بي كل ذره ممكن تتحول نواب
- بي سياب من يشتاگ يمد جروحه يصيرن باب
- بي ضحكات لطفله بريئه يصيرن غنوه لزرياب
- بي اطفال تحب تتمرجح

بس ماتصعد بالدولاب
لحد يصعد بالدولاب!!
الدولاب
الدولاب
لحد يصعد بالدولاب؟!

هسه امزج كل الالوان
طيفي وطائفتي وقوميتي
وحرماني ودمي وحريتي
وشجرة بيتي..
وأرسم وطن





((المئذنة والبحر الابيض))


روح تصعد لكن بهيئة
آذان
وروح تصعد.. تصعد بهيئة

دخان
وفرق..
بين المأذنة والمدخنه؟!
بين اكون وبين اضيع
بين أموت واسمي عايش
وبين عايش بس وضيع!!
بين اريد..
وبين اخاف اعله الوريد؟
الذمه غطاها الجليد
الديره غطاها الجليد..


الجليد..
الجليد..
الجليد..





يستغيث الشرف من يدفع وريد؟

- من هو يتسودن اصولي ويكفر برأيه (السديد) ؟

- من هو يترك دين خوفه وينتمي الدينه الجديد ؟

- من هو يكسر صنم جرحه ويلبس الجرح المجيد؟

- من هو من يكتب قصيده بلون قضبان الحديد؟

- من يدورله
- عله سيف.. اهديله راي
-بس يعجزني اليدورله عله ايد!!

-من يفك شفرة دمعته
-من يترجم لغز صمته
-من هو من تمتدله چف السوط..
تطلب آه.. ويحط بيها سكته!!!

وما أريد..
نهر من دم سال .. خوف
انطيني قطرة دم شريفه..
انطيك..
تاريخ الطفوف






ازرعلك الكوكب
اباء
وانبياء
وشعراء
انطيك طبق الاصل صوره الكربلاء
قطره تحمل روح
من ريحة صدگ
وخارطه تغني عراق ومأذنه.. تكبر عشگ
......


من هو يملك قطره من دم
قطره وحده وما اريد
نضيفها..
عله البحر البيض
يصر..
بحر..أحمر جديد!!!

شي اكيد.. اني ما بدل مفيد بلا مفيد

اني ما بدل نزف جرحي بصديد

اني ما بدل دمعتي..
بضحك باير من بليد؟








اني اكره
كل قلم ما يشتعل..
كل ورق ما ضاگ نوماس الفعل


احتقر.. كل ظل
كبر حظه ويدور له عله ظل!!


اكره..
من العدل لو باگ العدل

واكره الميزان من ينسى العدل

احترم..كل طفل في هيئة طفل!!

واحتقر كل فارس براسه طفل!!











اني احب..
كل فجر مولود من رحم الظلام
كل خساره تحولت بيدر شيم
كل مناره تصيح – حي عله الذمم

- حي على خير الذمم

- حي على خير القمم

- حي على خير الأنوف

- قد قامت الطفوف

- قد قامت الطفوف

- اكره الچلمه التطوف وما تطوف

- اكره الرايه التحج وما تحج

- اني اكره كل نشيد ينادي (ثوره)

- من قلم راضع ثلج ؟؟؟












((نافذة))




روحي دايه
وشاطي عينك
حلم يزرعني إعله جرفه
وعمري صدفه
أنتَ روحك نافذه
تجيب الضوه..
وضحكتك عصفور حط بحضن شرفه
وماي اصابيعك .. أتمس الماي يغفه!!
أنتَ بستان المحبه
تدري بسيوف العطش تذبح الرغبه
تذبح أزهار البنفسج
والنوارس
والسوالف
والبدايه
تدري من ترويني أكبر
أزرع طيوفك
شمس والديره عنبر
آه ..
لاتحرمني نبعك
تذبل ورودي
وتموت بشوگ دمعك





جرحي يضحك وانت تضحك
واني اتبعك
من مزامير اليشيعوني
احس ريحة شماته
وذاب عمري
وظل نداكم
ينعه ذاته

مايفيد اللوم
شاطيكم نبت صوبين حلفه !!
تعذرت منه البلابل
ردت وتندب حلمها
بغير زفه
ونايكم خضر حزن
وجروحي شفه !!
وروحي دايه



















((الغراب والصحيفة))

تنفس الطاغوت فاحترق البنفسج

الغراب
نشر جنحه إعله المدينه
الغراب
يريد يلغي اسم الجهات
وممكن ادوخ السفينه
الغراب
يريد يكفر بالورد
والمراجيح
وسواليف الشواطي

- شيعّ بصوته الفرح

- نشر تاريخ السواد

ريشه صار رماح يشتل بالعجاف ؟؟
اعيونه تمطر
من جهنم ..
من سعير ..
آ.. يروحي عله البلابل
آ.. يعيني إعله الورود التستجير





من فتح سجل الفصول
ومسح عنوان
الربيع
صاحت عليه سنبله ؟!

- شال بستان البنفسج
والحمامه بلا جنح

- سيف خاب
-
وسيف غاب

وسيف مايملك جواب

- والاشجار أثمرت خوف

والچفوف إتعذرت من الزنود

أيام سود










- ضاعت البوصله الاولى
الاحداثيات ..
نقطة التوكيد
مفتاح الطلاسم
كل حسابات الحياة
يالتشتمون البنفسج؟
يالتسبون العنب؟
الجوع ..
ما يلغي هويه
الخوف ..
مايشرب قضيه

لازم نعيد الشمس والناس
والعباس وچفوف الصريفه

لازم نعيد الفرح والنور
والدستور والبيعه النظيفه

لازم نفزز (العثه )
الوگفت بوجه الصحيفه !!!
تموز / 1997








((سالوفة برد))


طبعك طبع سنبله
الريح لو عاندك .. بالحول بيدر ترد
ارتاح لو عاندت بردك بلمسة دفو
وارتاح لو حوّلت نار الشماته برد
تعجبني من تنجرح
مودم
نزيفك ورد!!

بستان عمري عطش
وطيور حبك خضر
وضحكاتك الهن جنح
حطـّن بروحي العصر
وسالوفتك من برد
وهمساتك من الندى
وعيون نشوة خمر










يعجبني موت الشمع
يفرش لروحه اللحد
ويعجبني موت الندى
من ينزل من السما
يختار حضن الورد !!
الله يموت العشگ
الله يموت الكحل
من ينتحر عالجرف

نفسي .. أنتصب (مأذنه)
للناس أغني الحمد
نفسي .. أشتعل وأشتعل
ومحرابي برزخ ضوه
بين النهد ..
والنهد..




بس طبعي مرود كحل

- أبحر بعين الشگر
وأبحر بعين السمر
- ومن يجي الليل أنتحر
وأرجع طفل منكسر
أفرش سريري ملح ..
واتوسد الزنجار




وابقى أحلم بمكحله
مابيها مرود غفه
مابيها مرود دفه
مابيها مرود( دار)
أحلم ...
بخصلة شعر مامسها چف الصبغ
وأحلم
بنهد أرتفع ماطافته الزوار























((أرض الحرام))




الزفاف نشيعه دم
والغريب ..
انسلم العفه المناديل الرهان
والدليل
نريد دم
(وذمة) المنديل تخطي
ومن تصيب تريد دم!!
يمتلي الميزان ذل
ومع ذلك لازم ابحث عن عدل
وين أدوّر
بالمهاد تنام سچينه ورضيع؟
من تلولي أم الرضيع
جيب ثارك..
شيل سيفك..
ويوميه..
( يصل والخلفك عربيد ومربى إبطن حيه )!!
وما تغنيله محبه
ولاترتله حياة




ومع ذلك لازم أبحث عن محبه
وللامان لازم نخوض أمتحان
بي نجاح..
وبي فشل..
وحالتين بالفرح نحتاج دم
وبالحزن نحتاج دم
ألتمت الناس عله دم .. أنفضت الناس عله دم


كلشي دم
الله أكبر .. كلشي دم ؟؟؟
ومع ذلك لازم أبحث عن سلام
لازم نوصي الجرح ينزف حمام
لازم أزرع ورده
بالارض الحرام
تنتمي الارض الحلال !!!




















((الحقيبة))

"هرب من سوط الجلاد وسطوة الجوع"
ليرسل لي ( تعال ) ... فكان جوابي :



قط :
ماخان جرحي ولارجف خوف
نبي يحمل رساله
شلون أخونه

اهلنه علمونه الموت تاريخ
ومن ثدي الصعايب رضعونه
أرحل والخناجر تسكن البيت
واشيلن عن صرحنه المتنه دونه

واعوفن والدي ؟
الرباني بالضيم
وعمامي البلعسر مافارگونه
اتصور يجون أطفالي يبچون
يبويه ، ليش شايل عيرونه
وأهم چانوا اطفالي شلون وكحين
اليشتم جار ابوهم ياكلونه !!!



أنا ...
جرحي بحر يتلاطم امواج
يحسبها ذنب لحظة سكونه

ابونه احنه العراق ... ويندب(الغوث)
( ألا من ناصر ٍٍ ) ..
يولاد ابونه

تگلي شيل
اگلك جرحي يغتاظ
ومن يغتاظ جرحي شلون اجيبه؟

انتَ شحصلت ...
من جرحك اغتاظ خسرت الوالده..
وخنت الحليبه؟

اشعجب ؟ مو أبوك ابو سرحان لوجال
وأمك ..... من نعد
نحسبها ذيبه

ماشفناك ابن شداد بالضيج
ولاشفناك فارس بالكتيبه

لاثغر البوارق بسمه راواك ...
لا (عبله) ولا(ضحكة) حبيبه




المصيبه اشلون "مالك" يقتنع بيك
اذا مايقتنع (مالك)... مصيبه

بعد محد يگلك عود شداد
ويردونك نسب لامك زبيبه


هلك ...
يستنكفون تموت "يذياب"
غريب ومحد يشيلك يهيبه
نرد الخال – خاله
الخالف العود

وانعيره اليعيش بسد نسيبه
وذوله اجناب ...

ويلبسونك اسمال
وياهو من الغرب رد مملي جيبه

أنا ...
عن نفسي باقي
بگاعي مزروع ..
أموت – من ارضع الگاع الغريبه
أشم گاعي ، وتشمني
محاضن أطفال

نگف لبوه وشبل ؟
وكت المصيبه :



ارحل ...
بس اليه شروط صعبات
أنذرك....
كل شرط لازم تجيبه
اريد ..
آخذ مسلة بابل وياي
بمعالمها ...
بجناينها العجيبه

وأريد ...
آخذ فرات ودجله والناس
وأريد
آخذ صريفتنه النجيبه
الحره ...
الماغفت بحضان القصور ولايم اجنبي حلت گصيبه

وأريد آخذ جروحي البسهن ثياب
يسوع وعيب ماينزع صليبه

وأخذ كربلائي وقبة حسين
اشيلن لوعته وطعم المصيبه

دبرلي حقيبه تشيل .. العراق
وين الگه مثل هاي الحقيبه!!!

شباط/ 1998







ببلوغرافيا
عماد المطاريحي
-شاعر عراقي، حصل على العديد من الألقاب والجوائز
أهم تلك الألقاب:
-عدم امتداح السلطان
-عدم الاصطفاف مع الطائفية
-غرس في حقل الطبيعة خمس أزهار
-قلبه مشطور بين ناصرية القيثارة وديوانية الفرات
-يعمل في حقل الإعلام

#عماد_المطاريحي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات