مثل وردة ونبع صافي

جمعة العتاگ

الحوار المتمدن-العدد: 3740 - 2012 / 5 / 27 - 08:48
المحور: كتابات ساخرة
    

يا عراق الخير والكرم , يا عراق المحبة والسلام , يا عراق الأخاء والوفاء , يا عراق التاريخ والحضارة , يا عراق الشموخ والصمود .
يا عراق أما ان لك أن تنهض يا عراق , أما ان لك أن تقف وتقول لا بأعلى صوتك في وجه كل ظالم .
والله أحنه العراقيين أجمل وأطيب شعب وأعرق شعب , أحنه ولد الخير , أحنه أهل الكرم والمحبة والشجاعة , أحنه أهل النخوة , أحنة أرض الأيتام الواقفين بكل عز وشموخ , أحنة العلمنة العالم شنو معنه الأنسانية والألفة والأخاء .
أرجوا أن لا أكن قد أطلت عليكم أعزائي القراء بتكرار هذا الأسطوانة التي يرددها الجميع , القاصي والداني , والتي أختفى بريقها وفقدت مضمونها وأصبحت مجرد كلام منمق تردده الألسنة ولا تؤمن به القلوب .
ومثل ما كلتلكم هاي الجنجلوتية سالفة الذكر القصد من وراها هو مجرد تعريف وتمهيد لمخاطبة اللاشرفاء اللاسادة اللامسؤولين كل بأسمه :
جلال الطالباني : أحترم نفسك , اكعد عوج وأحجي عدل , ترة العراق مو نكتة من نكاتك التافهه , أستقيل وما أستقيل , ألوح وأدعوا وأرجوا وأتمنى وأحلم , شنو شبيك شيوجعك دولة الرئيس وشتريد منه .
نوري المالكي : لا تظل معارك على كرسي الحلاق , تره ما دام لغيرك حتى يدوملك , تره لهذا الشعب حوبة , ما يعرفها الباع الوطن والتهى بالمناصب والغنائم , شغل مخك وأتذكر شصار بالقبلك , أوين صفت بيهم الدنيا .
مسعود البرزاني : والله دوختنه وسطرتنة لا ليلنا ليل ولا نهارنا نهار , شكال الأقليم وشحجة الأقليم (من أشتعل جدك وجد الأقليم) شنو لازم مالت الخلفك , تريد حكم وتريد أقليم وتريد نفط وميزانية وشوربة عدس ومكعد جماعتك أبغداد ركبة ونص , عمي ما تنفصل وتخلصنه (بس انسه كركوك حب) .
طارق الهاشمي : ابو زياد الأبهة مثل ما تعرف أتعددت الأسباب والموت واحد , ولا تتوقع راح تفلت , وداعتك كلمن أتجرأ على دم أبسط مواطن عراقي أنحمس حمس , وصدكني الك يوم .
علي الأديب : ها أبو التكليف الشرعي , أنت عجيب أمور غريب قضية , كلنه نعرف من توفه الرسول , أنقطعت عن أهل الأرض أخبار السماء (بشرفكم شلوني بالفصحى) , فياريت تفهمني شلون تكليفك بالوزارة شرعي , عيني علاوي عوف شرب العرك بدون مزة ترة يسوي أوهام وأتلاحك روحك وراجع أبو الباطنية .
صالح المطلك : هسه مفتهمنه المالكي دكتاتور لو لا ومن تشوفة ترزلة لو تبوسة (ولك شتبوسة عبالك مريام فارس هو) , عوف العراق للعراقيين لأن خربت الكيا من صعد بيها صالح , وحشه القارئ (أنته بنعجتين ما أسرحك) .
مقتدى الصدر : صدك من كال (صفه البيت لمطيره وطارت بي فرد طيرة) حبيبي لو صح التعبير صفينة بيد الزعاطيط , بس حلو الديكور الجديد والصبغ بين بيك (قداوي صاير تشبه مورينيو مدرب ريال مدريد) , عوف العراق لأهله الطيبين وأرجع أشتريلك بلاي ستيشن والعب أنته والدلوع المهضوم كتير عمار الحكيم , وداعتك هذا البلاي ستيشن الجديد بي العاب تخبل .
أياد علاوي : علاوي مو أبنه يخمط وميجيبلنه , أنته خوب كل عندك متفتهم , بس والله بهاي أتفق وياك , بس كلي بروح أبوك يعني أنته التفتهم , مرغلت روحك على منصب وأنوب شلون منصب حتى أسمه مو سياحي , رئيس مجلس السياسات الأستراتيجية العليا , ذكرتني بسوالف القذافي , متكلي وين لكيت هذا الأسم والله حتى بروتانا خليجية مطالع .
وطبعاً لو ردت أخاطب كل اللاشرفاء فالقائمة ستطول وقد تقضي عمرك سيدي القارئ دون أن تكمل ربعها .
وهسه أرجع عالجنجلوتية الحجيتها بالبداية التي تخص الشعب العراقي ولاتمت للسياسيين بأي صلة وأحب أبشركم يا لاسادة (ولا مخطط) يا حكومة ويا نواب ويا قضاء ويا كلشي وكلاشي بحكومة السرقة الوطنية , أحب أكللكم تره أرض العراق وشعبه , بكل طوائفه وبعيداً عنكم يا حرامية , أحب أكللكم ترة أحنة مثل ما كال المطرب العراقي الكبير قحطان العطار (أنه وأنته أثنين جنه مثل وردة ونبع صافي) .
ـــــــــــــــــــــــــــــــــــــــــــــــــــــــــــــــــ
[email protected]

#جمعة_العتاگ (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات