مبارك يعظ

محمود الغول

الحوار المتمدن-العدد: 3433 - 2011 / 7 / 21 - 19:24
المحور: كتابات ساخرة
    

مبارك يعظ !

عزيزي الرئيس المنتظر,
تحية "كاريوكا" و بعد..


إليك أقدم خلاصة الخلاصة, وعصير فكرى المعتق أخر تلت ست حاجات, و ده لو حضرتك عايز تخلع من الكرسي بدون قلة قيمة, أو جرس وفضايح وضرب وشتيمة.

من البداية لازم تعرف إن كل أول وليه آخر, يعنى مهما حكمت هيجي يوم تودع و تتاخر.. لو مش بمزاجك هيبقى بالجزمة, إذا يومين واخلع, أحسن الشعب يطلع.. يصطادك بالشبشب من على الحيطة كما اجدعها صرصار, ولا مؤاخذة!

وأكيد سيادتك متجوز, فلو أم العيال بتبوز.. خيالها واسع وبتحلم تفضل فى القصر و تكوش.. طلقها وإتجوز.. شوفلك واحدة تانية ترضى بقليله, حتى ولو كانت أم لولو.. وفهمها إنكم ضيوف عليها, مش أصحاب بلد تشتروا وتبيعوا فيها.

وإذا كنت أبو العيال هاتلك شيال..أه شيال يعينك على تربيتهم رباية صح الصح, والواد إللى يغلط إديله على عينه "واوا أح".. اكسرله ضلع تحمى ضلعك أنت م الكسر, و إللى يطلب منهم عربية ولا قصر.. طرقعله م الصبح لحد العصر.

و إذا يوم جالك صاحب معرض سيارات ولا حتى طيارات أو عبارات, وقالك البيه الصغير عايز يشاركني بالعافية ماتقولوش "وماله ده زى ابنك".. حط ابنك فى أوضة الفيران و قوله "ده كان زمان يا حصان " هو المفروض "حمار" بس معلهش القافية تحكم!

عزيزي رئيس مصر إللى جاى..
ماتصاحبش فى يوم " نظيف ولا عبيد أو سالم وشريف " ما تأمنش لـ "عزمي أو سرور".. و أوعى ابنك فى يوم " يصاحب "عز ولا كمال" دول ناس سو يشفطوا دم الغلابة بأرخص شاليموه من كاس الوطن المعصور فى خمارة ولاد الـ...

أوعاك فى يوم تطلع عبيط و تصدق أمريكانى فى البيت الأبيض بيحكم بشرع "كوهين" يقولك سلام يطلع كمين!

شعبك هو سيدك.. لو تطيعو تملك يمينك, وان يوم عاصيته.. تطلع عينك, وتسير عبد لكل كلب.. مرسوم على ديله نجمه زرقا بحبر كوبيه.. كوبيه زى عيشتك يا عم.. ولو كنت ساكن قصر, أو بتقضى آخر أيامك فى شرم.

شعبك لو يوم تجوعه..يكلك..يكرهك.. ويلعن أبو خاش أهلك.. ما تأخذوش أصل الجوع كافر, والناس عايشة تعافر.. بتعافر علشان تعيش.. و أنت مفيش.. لا سكر, ولا عربدة, و نسوان وحشيش..انسي مخدات الريش والبقشيش و التقفيش, لا تروح ماتجيش.. يا حللو!


عزيزي ساكن القصر الجديد..

السجن للجدعان و الأعيان والحكام و اللعيبة و الهليبة.. البيه أبو بدلة و إللى راسم على قورته زبيبة, أو حاطط فى ودنه دبلة.. يمكن فـ يوم تبقى من سكان "أراميدان".. مطلوب للعدالة, مستني المشنقة المنصوبة, وعينيك معصوبة..اصل الطوبة دايما تيجى فى المعطوبة!
إبنيلك فى السجن "كنيف" شيك ولطيف.. ريحته حلوة واسع و"نضيف" يمكن.. بقول يعنى يمكن.. تكون زميل عز وسرور والشريف.

فتح و دانك قبل عينيك..اسمع صوت الحق وقول شبيك لبيك, لو دولة الظلم ساعة دولة الحق ساعة ويوم وشهر و لحد يوم الساعة.

عزيزي الحاكم بأمره..

قول لـ "حبيبك" الجديد ما يحكمشى الناس بالنار والحديد.. والقهر والتهديد.. دا الشاب شاب والشعب جاب.. جاب ولد عترة ما يخافشى من هوهوة الكلاب..رابض فى الميدان ويا أهله.. فاتح للموت صدره.. وعينيه بالشوق بتلمع.
عسكر فى المعسكر.. أمنك طول الليل بيسكر.. من عرق الغلابة يشرب و يضرب..يحبس ويسجن.. يقتل ويسحل.. وسيادتك أعمى و أطرش.. لو صوت قنابل ما تسمع.

عزيزي صاحب الصولجان..
الملك لصاحب الملك مش لإنس ولا جان.. اجمع دهب وياقوت ومرجان, و انسي إنك إنسان.. مخلوق ضعيف وجبان.. لو يوم أتملى الميدان أصبح سيادتك فى خبر كان.

#محمود_الغول (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات